ଭାରତୀୟ କ୍ରିକେଟ ଟିମର ପୂର୍ବତନ ୱିକେଟ କିପର ବିଜୟ ଯାଦବ ଏବେ ଜୀବନ ରକ୍ଷା ପାଇଁ ଲଢୁଛନ୍ତି । ବିଜୟ ଯାଦବଙ୍କ କିଡନୀ ସମ୍ପୂର୍ଣ୍ଣ ଭାବେ ଖରାପ ହୋଇ ସାରିଛି । ହେଲେ ଏହାର ଚିକିତ୍ସା ପାଇଁ ତାଙ୍କ ପାଖରେ ଟଙ୍କା ନାହିଁ । ବିଜୟ ଯାଦବ ଏବେ ମେଡିକାଲରେ କିଡନୀ ଡାଇଲୋସିସ୍ କରୁଛନ୍ତି । ବିଜୟ ୧୯୯୩ ମସିହାରେ ହିରୋକପ ସେମି ଫାଇନାଲରେ ଆଫ୍ରିକା ବିରୋଧରେ ଖେଳି ଦଳକୁ ଜିତାଇଥିଲେ।
ସୂଚନା ଥାଉକି; ବିଜୟ ଯାଦବ ଭାରତୀୟ ଟିମ ପାଇଁ ୧୯ ଟି ଏକଦିବସୀୟ ଓ ଗୋଟିଏ ଟେଷ୍ଟ ମ୍ୟାଚ ଖେଳିଥିଲେ । ହେଲେ ହରିୟାନା ଟିମ ପାଇଁ ସେ ୱିକେଟ କିପର ଭାବେ ଯେଭଳି ପ୍ରଦର୍ଶନ କରିଥିଲେ ସେହି ଆଧାରରେ ତାଙ୍କୁ ୧୯୯୨-୯୩ ପାଇଁ ସାଉଥ ଆଫ୍ରିକା ବିରୋଧରେ ଖେଳାଯିବାକୁ ଥିବା ସିରିଜରେ ଭାରତୀୟ ଟିମରେ ସ୍ଥାନ ମିଳିଥିଲା ।
ବିଜୟ ଯାଦବଙ୍କର ୨୦୦୬ ମସିହାରେ ଫରିଦାବାଦରେ କାର ଦୁର୍ଘଟଣା ହୋଇଥିଲା । ଯେଉଁଥିରେ ବିଜୟ ଗୁରୁତର ଆହତ ହୋଇଥିଲେ । ସେବେଠାରୁ ବିଭିନ୍ନ ସ୍ୱାସ୍ଥ୍ୟ ସମସ୍ୟାରେ ପୀଡିତ ରହୁଥିଲେ ବିଜୟ । ଏପରିକି ଏହି ଦୁର୍ଘଟଣାରେ ସେ ନିଜର ୧୧ ବର୍ଷର ଝିଅକୁ ବି ସବୁଦିନ ପାଇଁ ହରାଇଥିଲେ । ଆଉ ଏହାପରେ ତାଙ୍କର ଦୁଇ ଥର ହୃଦଘାତ ମଧ୍ୟ ହୋଇଛି । ଏସବୁ ଭିତରେ ଏବେ କିଡନୀ ସମ୍ପୂର୍ଣ୍ଣ ରୂପେ ଖରାପ ହେବା କାରଣରୁ ହସ୍ପିଟାଲରେ ଚିକିତ୍ସିତ ହେଉଛନ୍ତି ବିଜୟ । କିନ୍ତୁ ଆଗକୁ ଉନ୍ନତ ମାନର ଚିକିତ୍ସା ପାଇଁ ବିଜୟଙ୍କ ପାଖରେ ଅର୍ଥର ଅଭାବ ରହିଛି । ଯେଉଁଥିପାଇଁ କ୍ରୀଡା ସାମ୍ବାଦିକ ବିଜୟ ଲୋକପଲ୍ଲୀ ଏକ ଟ୍ୱିଟ୍ କରି ଆର୍ଥିକ ସହାୟତା କରିବାକୁ ଅପିଲ କରିଛନ୍ତି।