- ବିଲୁପ୍ତ ହେବାକୁ ବସିଲେଣି ୨୯ ପ୍ରଜାତିର ଜୀବଜନ୍ତୁ
- ଲୋପ ପାଇବାର ମୁଖ୍ୟ କାରଣ ହେଉଛି ଜଳବାୟୁ ପରିବର୍ତ୍ତନ
- ସଂରକ୍ଷଣ ପାଇଁ ଅଣ୍ଟା ନ ଭିଡିଲେ ହଜିଯିବେ ଅନେକ ପ୍ରଜାତି
ନ୍ୟୁଜ୍ ବ୍ୟୁରୋ; ସାରା ଦୁନିଆରେ ଅନେକ ପ୍ରଜାତିର ଜୀବଜନ୍ତୁ ଓ ଉଦ୍ଭିଦ ରହିଛନ୍ତି । କିନ୍ତୁ ଏବେ ଅନେକ ପ୍ରଜାତିର ଜୀବଜନ୍ତୁ ବିଲୁପ୍ତ ପ୍ରାୟ ହୋଇଗଲେଣି । କେବଳ ଭାରତରେ ୨୯ ପ୍ରଜାତିର ଜୀବଜନ୍ତୁ ବିଲୁପ୍ତ ହେବାକୁ ବସିଲେଣି । ନିକଟରେ ଆଇୟୁସିଏନ୍ ଏକ ରିପୋର୍ଟ ଜାରି କରିଛି । ଏଥିରେ ଆଇୟୁସିଏନ୍ ଦର୍ଶାଇଛି ଯେ ଭାରତରେ ୨୯ ପ୍ରଜାତି ଏବେ ବିଲୁପ୍ତ ହୋଇଯିବେ । ତେବେ ଏମାନେ ବିଲୁପ୍ତ ହେବାର ମୁୂଖ୍ୟ କାରଣ ହେଉଛି ପରିବେଶ ପ୍ରଦୂଷଣ ଏବଂ ଜଳବାୟୁ ପରିବର୍ତ୍ତନ । ଆଇୟୁସିଏନ୍ର ତାର ରେଡ୍ ତାଲିକାରେ ୩ଟି ପ୍ରଜାତିକୁ ଅଧିକ ଗୁରୁତ୍ୱ ଦେଇଛି । ରିପୋର୍ଟ ଅନୁଯାୟୀ ଦେଶରେ ୩ଟି ପ୍ରଜାତିକୁ ଅଧିକ ବିପଦ ରହିଛି । ଏହି ୩ଟି ପ୍ରଜାତି ହେଉଛନ୍ତି ଧଳାରଙ୍ଗର ଡ୍ୟାନ୍ସିଙ୍ଗ ବେଙ୍ଗ, ଆଣ୍ଡାମାନ ସ୍ମୁଥ୍ହାଉଣ୍ଡ ସାର୍କ ଏବଂ ହିମାଳୟରେ ଥିବା ଫ୍ରିଟିଲାରୀ ଫୁଲ୍ । ଯଦି ଏହାର ସଠିକ୍ ରକ୍ଷଣାବେକ୍ଷଣା କରାନଯାଏ ତେବେ ଏହି ପ୍ରଜାତି ଖୁବଶୀଘ୍ର ବିଲୋପ ହୋଇଯିବ ଏଥିରେ କୌଣସି ସନ୍ଦେହ ନାହିଁ ।
ଅନେକ ବୈଜ୍ଞାନିକଙ୍କ ମତରେ ଜଳବାୟୁ ପରିବର୍ତ୍ତନ ଯୋଗୁଁ ଆଗାମୀ କିଛି ବର୍ଷ ମଧ୍ୟରେ ଅନେକ ଜୀବମାନେ ପୃଥିବୀରୁ ବିଲୁପ୍ତ ହୋଇଯିବେ । ତେବେ ପ୍ରଥମରେ ଜାଣିବା ଧଳାରଙ୍ଗର ଡ୍ୟାନ୍ସିଙ୍ଗ ବେଙ୍ଗ ବିଷୟରେ । ଏହି ବେଙ୍ଗ ସାଧାରଣତଃ କର୍ଣ୍ଣାଟକରେ ଦେଖିବାକୁ ମିଳିଥାନ୍ତି । ପୂର୍ବରୁ ଏହି ଜୀବମାନଙ୍କୁ ସବୁଠି ଦେଖିବାକୁ ମିଳୁଥିବା ବେଳେ ବର୍ତ୍ତମାନ ଏମାନେ ୧୬୭ ବର୍ଗକିଲୋମିଟର ତଥା ଆହୁରି ଦୂରରେ କାଁ ଭାଁ ଦେଖିବାକୁ ମିଳୁଛନ୍ତି । ତେବେ ଏହି ପ୍ରଜାତି ବିଲୁପ୍ତ ହେବାର ମୁଖ୍ୟ କାରଣ ହେଉଛି, ଏମାନଙ୍କ ପାଇଁ ଏବେ ରହିବା ପାଇଁ ସ୍ଥାନ ନାହିଁ । କାରଣ ବାଦାମ ଏବଂ କଫି ଚାଷ ପାଇଁ ଜଙ୍ଗଲ କଟାଯାଉଛି । ଯାହା ଫଳରେ ଏମାନେ ନିଜର ବାସ ହରାଉଛନ୍ତି । ଏନେଇ ଜିଜିଏସ୍ ଇନ୍ଦ୍ରପ୍ରସ୍ଥ ବିଶ୍ୱବିଦ୍ୟାଳୟର ବନ୍ୟପ୍ରାଣୀ ଜୀବବିଜ୍ଞାନୀ ଡକ୍ଟର ସୁମିତ ଡୁକିଆ କହିଛନ୍ତି ଯେ, ଏହି ଡ୍ୟାନ୍ସିଙ୍ଗ ବେଙ୍ଗର ପ୍ରାୟ ୩୦ ପ୍ରତିଶତ ପ୍ରଜାତି ବିପଦରେ ରହିଛନ୍ତି । ଯଦି ସରକାର ଏମାନଙ୍କ ସଂରକ୍ଷଣ ପାଇଁ କୌଣସି ପଦକ୍ଷେପ ନ ନିଅନ୍ତି, ତେବେ ଏମାନେ ଖୁବଶୀଘ୍ର ସମାପ୍ତ ହୋଇଯିବେ ।
ସେହିପରି ଦ୍ୱିତୀୟରେ ରହିଛି ସ୍ମୁଥହାଉଣ୍ଡ ସାର୍କ । ଏହି ସାର୍କ ପ୍ରଜାତି ଅଧିକ ବିପଦରେ ରହିଛି । ଏହା ପ୍ରାୟତଃ ଆଣ୍ଡାମାନ ସାଗର, ପୂର୍ବ ଭାରତ ମହାସାଗର, ମିଆଁମାର, ଥାଇଲ୍ୟାଣ୍ଡ, ଏବଂ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜର ପାଖାପାଖି ଦେଖିବାକୁ ମିଳିଥାନ୍ତି । ଏହା ଏକ ଛୋଟ ସାର୍କ ପ୍ରଜାତି । ଏମାନଙ୍କୁ ଗତବର୍ଷ ହିଁ ଚିହ୍ନଟ କରାଯାଇଥିଲା । ସେହି ସମୟରେ ହିଁ ଏହି ପ୍ରଜାତିର ନାଁ ସ୍ମୁଥହାଉଣ୍ଡ ରଖାଯାଇଥିଲା । ତେବେ ଏହି ପ୍ରଜାତି ବିଲୁପ୍ତ ହେବାର ମୁଖ୍ୟ କାରଣ ହେଉଛି ଯେ ଏମାନେ ଯେଉଁ ଗଭୀରତାରେ ବାସ କରିଥାନ୍ତି । ସେଠାରେ ହିଁ ଅଧିକ ମାତ୍ରାରେ ମାଛ ଧରାଯାଇଥାଏ । ଏମାନଙ୍କୁ ମାଛ ଧରାଳୀମାନେ ବହୁମାତ୍ରାରେ ଶିକାର କରୁଛନ୍ତି । ଯାହା ଫଳରେ ଏମାନଙ୍କ ବଂଶ ପ୍ରତି ବିପଦ ସୃଷ୍ଟି ହୋଇଛି ଏବଂ ଏମାନେ ଶୀଘ୍ର ଲୋପ ପାଇବାକୁ ଯାଉଛନ୍ତି ।
ସେହିପରି ତୃତୀୟରେ ରହିଛି ୟେଲୋ ହିମାଳୟନ୍ ଫ୍ରିଟିଲାରୀ । ଏହା ହେଉଛି ଏକ ଅତି ସୁନ୍ଦର ଫୁଲ । ଏହା ମଧ୍ୟ ବିଲୁପ୍ତ ହେବାକୁ ବସିଲାଣି । ଏହି ଫୁଲ ଲୋପ ପାଇବାର ମୁଖ୍ୟ କାରଣ ହେଉଛି ଯେ ଏହାର ସଠିକ୍ ଭାବରେ ଚାଷ କରାଯ ାଉନାହିଁ । ଯାହା ଫଳରେ ଏହା ଧ୍ୱସାଂଭିମୁଖୀ ହୋଇପଡିଛି ।
ତେବେ ଆଇୟୁସିଏନ୍ ବିଷୟରେ କହିବାକୁ ଗଲେ , ଏହା ହେଉଛି ଏକ ସଂଗଠନ, ଯାହା ଜୈବ ବିବିଧତାର ସ୍ୱାସ୍ଥ୍ୟ ସମ୍ପର୍କରେ ସୂଚନା ଦେଇଥାଏ । ଏହା ବ୍ୟତୀତ ପୃଥିବୀରେ ଥିବା ସମସ୍ତ ପ୍ରାଣୀଙ୍କ ଉପସ୍ଥିତି ଏବଂ କେଉଁ ପ୍ରଜାତି ବିଲୁପ୍ତ ହେବାକୁ ଯାଉଛନ୍ତି ତାହାର ତାଲିକା ପ୍ରକାଶ କରିଥାନ୍ତି । ପ୍ରାୟ ୧୫ ହଜାରରୁ ଅଧିକ ବୈଜ୍ଞାନିକ ଏହି ସଂଗଠନ ସହ ଜଡିତ ରହିଛନ୍ତି ।
ଏହି ବୈଜ୍ଞାନିକମାନେ ଭାରତରେ ୯୪୭୨ ପ୍ରଜାତରି ଉଦ୍ଭିଦ,ପ୍ରାଣୀ ମଧ୍ୟରୁ ୧୩୫୫ ବିଲୁପ୍ତପ୍ରାୟ ପ୍ରଜାତି ପାଇଛନ୍ତି । ଏଥିମଧ୍ୟରୁ କିଛି ଲୋପ ପାଇବାକୁ ବସିଥିବା ବେଳେ ଆଉ କିଛି ପ୍ରଜାତି ବିପଦରେ ରହିଛନ୍ତି । ତେବେ ଜଳବାୟୁ ପରିବର୍ତ୍ତନରେ ବେଶୀ ପ୍ରଭାବିତ ହେଉଛନ୍ତି ସାମୁଦ୍ରିକ ଜୀବ । ଚଳିତବର୍ଷ ଭାରତରେ ୨୩୯ ପ୍ରଜାତିର ଜୀବଜନ୍ତୁଙ୍କ ବିଷୟରେ ରିସର୍ଚ କରାଯାଇଥିଲା । ସେଥିମଧ୍ୟରୁ ୨୯ଟି ପ୍ରଜାତି ବିଲୁପ୍ତ ହେବାକୁ ଯାଉଥିବା ଜଣାପଡିଥିଲା । ତେବେ ଏହାକୁ ରୋକିବାକୁ ହେଲେ ପରିବେଶ ପ୍ରଦୂଷଣ ଏବଂ ଜଳବାୟୁ ପରିବର୍ତ୍ତନକୁ ରୋକିବାକୁ ପଡିବ । ନଚେତ୍ ଜୀବଜନ୍ତୁଙ୍କ ଠାରୁ ଆରମ୍ଭ କରି ଉଦ୍ଭିଦମାନେ ଲୋପ ପାଇଯିବେ ।