ଶିମିଳିପାଳ: ଶିମିଳିପାଳ ଅଭୟାରଣ୍ୟରୁ ଏକ କଳାବାଘର ଚମଡ଼ା ଜବତ କରାଯାଇଛି। ଏହି ବାଘ ଛାଲଟି ଦୁଇ ତିନି ମାସ ପୂର୍ବରୁ ଶିକାର କରାଯାଇଥିବା ନେଇ ସୂଚନା ରହିଛି । ଏନେଇ ଏଥିରେ ସମ୍ପୃକ୍ତ ୪ ଜଣ ଶିକାରୀଙ୍କୁ ଗିରଫ କରିଛି ବନ ବିଭାଗ।
ଶିମିଳିପାଳରେ ଦେଖାଯାଉଥିବା ବିଶ୍ବର ବିରଳ କଳା ମହାବଳ (ମେଲାନିଷ୍ଟିକ୍) ବାଘ ଛାଲ ଜବତ କରିବା ସହ ୪ ଶିକାରୀଙ୍କୁ ଗିରଫ କରିଛି ବନ ବିଭାଗ। ମୃତ କଳାବାଘର ବୟସ ପାଖାପାଖି ଦେଢବର୍ଷ ହେବ। ତେବେ କଳାବାଘକୁ ମାରି ଶିକାରୀମାନେ ଚମଡା, ନଖ ଏବଂ ଦାନ୍ତ ନେଇ ଚମ୍ପଟ ମାରିଥିଲେ। ଏବେ ସେମାନଙ୍କୁ ଗିରଫ କରିବାରେ ସଫଳ ହୋଇଛି ବନ ବିଭାଗ। ଶିମିଳିପାଳ ବ୍ୟାଘ୍ର ସଂରକ୍ଷଣ (ଏସଟିଆର) ପ୍ରକଳ୍ପ ଅଧୀନ ବାରିପଦା ବନଖଣ୍ଡ ଅନ୍ତର୍ଗତ ତଥା ଉଦଳା ଥାନା ଅଧୀନସ୍ଥ ତେନ୍ତଳା ଅଞ୍ଚଳରୁ ଦୁଇ ଜଣ ଓ ବାଲିଘାଟ ଅଞ୍ଚଳରୁ ଦୁଇ ଜଣ ଶିକାରୀଙ୍କୁ ବନ ବିଭାଗ ଗିରଫ କରିଛି।
ଗିରଫ ଅଭିଯୁକ୍ତମାନେ ହେଲେ ଅଜାମ୍ବର ନାଏକ, ପିତାମ୍ବର ନାଏକ, ରାମ ନାଏକ ଓ ବାଇରାମ ମୁର୍ମୁ। ତେବେ ଏହି ବାଘଛାଲ ଜବତ ଘଟଣାର ମାଷ୍ଟରମାଇଣ୍ଡ ବର୍ତ୍ତମାନ ସୁଦ୍ଧା ଫେରାର ରହିଥିବା ବ୍ୟାଘ୍ର ସଂରକ୍ଷଣ ପ୍ରକଳ୍ପ କର୍ତ୍ତୃପକ୍ଷ ସୂଚନା ଦେଇଛନ୍ତି। ଶିକାରୀମାନଙ୍କୁ ବନବିଭାଗ ରିମାଣ୍ଡରେ ଆଣି ଅଧିକ ପଚରାଉଚରା ପରେ ବନବିଭାଗ ପକ୍ଷରୁ ଏହି ଚଢାଉ କରାଯାଇଥିଲା। ଏହି ଘଟଣାରେ ପର୍ଯ୍ୟାୟକ୍ରମେ ଏପର୍ଯ୍ୟନ୍ତ ମୋଟ ୧୦ ଜଣକୁ ଗିରଫ କରାଯାଇଛି।