ବ୍ରହ୍ମପୁର: ୪ ଯୁବକଙ୍କୁ ଅପହରଣ ମାମଲାରେ ଜଣେ ଅଟକ। ଜଣଙ୍କୁ ଅଟକ ରଖି ତଦନ୍ତ ଚାଲିଥିବା ବ୍ରହ୍ମପୁର ଏସପି ଦେଇଛନ୍ତି ସୂଚନା। ଘଟଣାରେ ୫ରୁ ଅଧିକ ଅପହରଣକାରୀ ସାମିଲ ଥିବା ଏସ୍ପି କହିଛନ୍ତି। ଭୁବନେଶ୍ବରରୁ ସମସ୍ତଙ୍କୁ ଅପହରଣ କରି ଗଞ୍ଜାମରେ ଆଣି ରଖିଥିଲେ ଅପହରଣକାରୀ। ଋଣ କାରବାରକୁ ନେଇ ଅପହରଣ କରିଥିବା ଅଭିଯୋଗ ହୋଇଛି।
ତେବେ ଏହି ଘଟଣାରେ ଜଣେ ଅପହୃତା ଦିଲ୍ଲୀର ଓ ଅନ୍ୟ ୩ ଜଣ କଟକ ଅଞ୍ଚଳର ବୋଲି ଜଣାପଡିଛି। ୪ ଯୁବକ ଏକ ଘରୋଇ ଫାଇନାନ୍ସ ସଂସ୍ଥାର କର୍ମଚାରୀ ଅଟନ୍ତି। ଉକ୍ତ ଯୁବକଙ୍କୁ ଲୋନ୍ ଦେବା ପୂର୍ବରୁ ପ୍ରୋଜେକ୍ଟ ଦେଖିବାକୁ ଆସିଥିବା ବେଳେ ଅପହରଣ କରାଯାଇଥିଲା। ୨ କୋଟି ଟଙ୍କା ନଦେଲେ ଜୀବନରୁ ମାରିବାକୁ ଧମକ ଦେଉଥିଲେ ଦୁର୍ବୃତ୍ତ। ଏପରିକି ଟଙ୍କା ନଦେଲେ ନାଗ ସାପ ଚୋଟ ଦେବାର ଭୟ ମଧ୍ୟ ଦେଖାଉଥିଲା।
ଚିକିଟି ଗଡ଼ ଗ୍ରାମର ନୂତନଙ୍କ ଘର ବାଡ଼ିପଟେ ଥିବା ଏକ କୁଡ଼ିଆ ମଧ୍ୟରେ ଏମାନଙ୍କୁ ବନ୍ଧକ ରଖାଯାଇଥିଲା। ସେଠାରେ ଏକ ସାପ ବିକାଳି ରହିଛି। ସେଠାରେ ବହୁଳ ମାତ୍ରାରେ ଗଞ୍ଜେଇ ଗଛ ଲାଗିଥିବା ଜଣାପଡିଥିଲା। ନୂତନ ପାତ୍ର ଏବଂ ତାଙ୍କ ସହଯୋଗୀମାନେ ଉକ୍ତ ୪ ଜଣଙ୍କୁ ନର୍ଯାତନା ଦେବା ସହ ଏକ ନାଗ ସାପ ଦେଖାଇ ମାରିଦେବାକୁ ଧମକ ଦେଇ ଡରାଇ ରଖିଥିଲେ। ଅପହୃତ ୪ ଜଣଙ୍କ ମଧ୍ୟରୁ ଜଣେ ରବିବାର ଭୋରରୁ କୌଶଳ କ୍ରମେ ଖସି ଆସି ଚିକିଟି ତହସିଲ ଅଫିସ ଗ୍ରୀଲ ଡେଇଁ ତହସିଲଦାରଙ୍କ କ୍ୱାର୍ଟର ଭିତରେ ପଶି ଆମକୁ ରକ୍ଷା କର ସେମାନେ ଆମକୁ ମାରି ଦେବେ ବୋଲି ଚିତ୍କାର କରିଥିଲେ। ତହସିଲଦାର ବିଶ୍ୱରଞ୍ଜନ କଅଁର ବାହାରକୁ ଆସି ଦେଖିବା ବେଳକୁ ଯୁବକ ଜଣକ ବାରମ୍ବାର ଚେତା ହରାଇ ବସୁଥିଲେ। ସେ ତାଙ୍କ ଡ୍ରାଇଭରଙ୍କୁ ଡାକି ଯୁବକ ଜଣକୁ ପାଣି ପିଇବାକୁ ଦେଇଥିଲେ। ଯୁବକ ଜଣକ ମୋତେ ପୋଲିସରେ ହାଜର କରିବାକୁ ନେହୁରା ହେବାରୁ ତହସିଲଦାର କେ.ନୂଆଗାଁ ଥାନା ଆଇଆଇସି କିଶୋର କୁମାର ସାମଲ ଏବଂ ଚିକିଟି ଏସ୍ଡିପିଓ ବିଶ୍ୱାମିତ୍ର ହରପାଲଙ୍କୁ ଫୋନ ଯୋଗେ ଜଣାଇଥିଲେ। ପୋଲିସ ଟିମ୍ ସେଠାରେ ପହଞ୍ଚି ଯୁବକଙ୍କ ସୂଚନା କ୍ରମେ ନୂତନଙ୍କ ଘର ଉପରେ ଚଢାଉ କରିବା ସହ ଗୋଡ଼ ହାତ ବନ୍ଧା ଅବସ୍ଥାରେ ୩ ଅପହୃତ ଯୁବକଙ୍କୁ ଉଦ୍ଧାର କରିଥିଲେ।