କଟକ: କଟକର ପୁରୀଘାଟ ଥାନା ନିକଟ ଏକ ଘରୋଇ ନର୍ସିଂହୋମ୍ରେ ଶନିବାର ଅପରାହ୍ନରେ ନିଆଁ ଲାଗିଯାଇଛି। ନର୍ସିଂହୋମ୍ର ତୃତୀୟ ମହଲାରେ ନିଆଁ ଲାଗିଛି। ଘଟଣାସ୍ଥଳରେ ଅଗ୍ନିଶମ ବିଭାଗ କର୍ମଚାରୀମାନେ ପହଞ୍ଚି ନିଆଁ ଲିଭାଇବା ପାଇଁ ଉଦ୍ୟମ ଜାରି ରଖିଛନ୍ତି। ଏଥିସହିତ ଆଇସିୟୁରେ ଥିବା ରୋଗୀମାନଙ୍କୁ ସୁରକ୍ଷିତ ଭାବେ ଉଦ୍ଧାର ପାଇଁ ପ୍ରୟାସ ମଧ୍ୟ ଜାରି ରଖିଛନ୍ତି। ବିଦ୍ୟୁତ୍ ଶର୍ଟସର୍କିଟ୍ ଯୋଗୁ ନିଆଁ ଲାଗିଥିବା ଅନୁମାନ କରାଯାଉଛି।
ସୂଚନାନୁଯାୟୀ, ପୁରୀଘାଟ ଥାନା ଅଞ୍ଚଳର ତ୍ରିସା ନର୍ସିଂହୋମ୍ର ତୃତୀୟ ମହଲାରେ ଅଗ୍ନିକାଣ୍ଡ ଘଟିଛି। ଏହି ତୃତୀୟ ମହଲାରେ ଆଇସିୟୁ ରହିଛି। ଆଇସିୟୁରେ ୮ରୁ ଅଧିକ ରୋଗୀ ଭର୍ତ୍ତି ହୋଇଥିଲେ। ଏହାଛଡ଼ା ସାଧାରଣ ବେଡ୍ରେ ମଧ୍ୟ ବହୁ ରୋଗୀଥିଲେ। ତେବେ ଅପରାହ୍ନରେ ହଠାତ୍ ଆଇସିୟୁରେ ବିଦ୍ୟୁତ୍ ଶର୍ଟସର୍କିଟ୍ ଯୋଗୁ ନିଆଁ ଲାଗି ଯିବା ଯୋଗୁ ତୃତୀୟ ମହଲାରେ ବ୍ୟାପି ଯାଇଥିଲା ନିଆଁ। ଧୂଆଁମୟ ହୋଇଯାଇଥିଲା ପୂରା ଫ୍ଲୋର। ଅଣ ନିଶ୍ୱାସୀ ହୋଇପଡ଼ିଥିଲେ ରୋଗୀ, ରୋଗୀଙ୍କ ସମ୍ପର୍କୀୟ ଓ ମେଡ଼ିକାଲ୍ କର୍ମଚାରୀ। ବାହାର ପାର୍ଶ୍ୱରେ ସିଡି ପକାଯାଇ ଆଇସିୟୁରେ ଭର୍ତ୍ତି ହୋଇଥିବା ରୋଗୀ ଓ ସାଧାରଣ ବେଡ଼୍ରେ ଥିବା ରୋଗୀଙ୍କୁ ଉଦ୍ଧାର କରାଯାଇ ଅନ୍ୟ ମେଡ଼ିକାଲ୍ରେ ଭର୍ତ୍ତି କରାଯାଉଛି। ନିଆଁକୁ ଆୟତ୍ତ କରିବାକୁ ଉଦ୍ୟମ କରାଯାଉଛି। ବର୍ତ୍ତମାନ ପୂରା କୋଠାକୁ ଖାଲି କରିବାକୁ ଉଦ୍ୟମ ଚାଲିଛି।