ରାୟଗଡ଼ା: ରାୟଗଡ଼ା ଜିଲ୍ଲା ଅମ୍ବାଦଳା ଥାନା ଅଧୀନସ୍ଥ ଅମ୍ଳଭଟ୍ଟା ଗ୍ରାମର ଏକ ସୁନା ଦୋକନରୁ ବଡ଼ ଧରଣର ଡ଼କାୟତି। ଉକ୍ତ ଚୋରି ଘଟଣାରେ ପୋଲିସ ଜଣେ ନାବାଳକ କୋର୍ଟରେ ହାଜର କରି ପରବର୍ତ୍ତୀ ସମୟରେ ବାଳ ସୁଧାର ଗୃହକୁ ପଠାଇଛି। ଏହି ଘଟଣାରେ ପୋଲିସ ୪୩୧ଗ୍ରାମ ସୁନା ଓ ଗୋଟିଏ ମୋଟରସାଇକେଲ ଜବତ କରିଛି। ଜବତ ସୁନା ଗହଣା ଭିତରେ ସୁନା ହାର ୭ଟି, ମଙ୍ଗଳ ସୂତ୍ର ଲକେଟ ୯ଟି, ସୁନା ମୁଦି ୪୮ଟି, ସୁନା ଚେନ୍ ୨ଟି, ମଙ୍ଗଳସୂତ୍ର ପଦକ ୧୨ଟି, କାନ ଫୁଲ ୨୭ ହଳ, ସୁନା ଲକେଟ ୨୬ଟି, କାନର ଟପ୍ ଓ ରିଂ ୬ ହଳ ରହିଛି।
ସୂଚନାଯୋଗ୍ୟ, ଅମ୍ବାଦଳା ଥାନା ଅଧୀନସ୍ଥ ଅମଳଭଟା ଗ୍ରାମର ଏକ ସୁନା ଦୋକାନୀ ମହେଶ୍ବର ନାୟକ ଡିସେମ୍ବର ୯ ତାରିଖ ସକାଳ ୮ଟା ସମୟରେ ପ୍ରାୟ ୫ଶହ ଗ୍ରାମ ସୁନା ଏକ ବ୍ୟାଗରେ ଧରି ଦୋକାନ ଖୋଲିବାକୁ ଯାଉଥିଲେ। ଏହି ସମୟରେ ଜଣେ ଦୁର୍ବୃତ୍ତ ଏକ ବାଇକରେ ଆସି ଉକ୍ତ ବ୍ୟାଗକୁ ଝାମ୍ପି ନେଇ ଚମ୍ପଟ ମାରିଥିଲେ। ଏନେଇ ମହେଶ୍ବର ଅମ୍ବାଦଳା ଥାନାରେ ଲିଖିତ ଅଭିଯୋଗ କରିବା ଆଇଆଇସି କଳ୍ପନା ବେହେରା କେସ ନଂ ୨୮୪ରେ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲେ।
ଏହି ଘଟଣାକୁ ଗୁରୁତ୍ବର ସହିତ ନେଇ ଏସପି ସ୍ବାଥିଙ୍କ ନିର୍ଦ୍ଦେଶକ୍ରମେ ରାୟଗଡ଼ା ଏସ୍ଡିପିଓ ରଶ୍ମୀରଞ୍ଜନ ସେନାପତି, ମୁନିଗୁଡ଼ା ଏସ୍ଡିପିଓ ସନ୍ତୋଷୀ ଓରାମ୍, ଚାନ୍ଦିଲି ଆଇଆଇସି ପ୍ରସନ୍ନ କୁମାର ବେହେରା ଓ ଅନ୍ୟ ପୋଲିସ କର୍ମଚାରୀକୁ ନେଇ ଏକ ଟିମ୍ ଗଠନ କରାଯାଇ ଏହି ଘଟଣାର ତଦନ୍ତ କରିଥିଲା ପୋଲିସ। ଏହି ଚୋରି ପଛରେ ଜଣେ ନାବାଳକ ଥିବା ପୋଲିସ ଜାଣି ତାଙ୍କୁ ଠାବ କରିବା ସହିତ ମୋଟରସାଇକେଲ ଓ ସୁନାଗହଣା ଜବତ କରିଥିଲା।