ନୂଆଦିଲ୍ଲୀ: କେନ୍ଦ୍ର ସରକାରଙ୍କ ପକ୍ଷରୁ ତିବ୍ଦତୀୟ ଧର୍ମଗୁରୁ ଦଳାଇଲାମାଙ୍କୁ ‘ଜେଡ’ ସୁରକ୍ଷା ବ୍ୟବସ୍ଥା ପ୍ରଦାନ କରାଯାଇଛି। କେନ୍ଦ୍ର ସରକାର ଦଳାଇଲାମାଙ୍କୁ ‘ଜେଡ’ ଶ୍ରେଣୀ ସିଆରପିଏଫ ସୁରକ୍ଷା ପ୍ରଦାନ କରିଛନ୍ତି। ଏହି ବର୍ଦ୍ଧିତ ସୁରକ୍ଷା ବ୍ୟବସ୍ଥା ଅଧୀନରେ, ୮୯ ବର୍ଷୀୟ ଆଧ୍ୟାତ୍ମିକ ନେତାଙ୍କୁ ମୋଟ ୩୩ ଜଣ ସୁରକ୍ଷା କର୍ମୀ ମିଳିବ। ଯେଉଁଥିରେ ହିମାଚଳ ପ୍ରଦେଶର ଧର୍ମଶାଳାରେ ତାଙ୍କ ବାସଭବନରେ ସଶସ୍ତ୍ର ସୁରକ୍ଷାକର୍ମୀ ୨୪ ଘଣ୍ଟିଆ ସୁରକ୍ଷା ପ୍ରଦାନ କରିବେ। ଏହା ସହିତ, ତାଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ପ୍ରଶିକ୍ଷିତ ଡ୍ରାଇଭର ଏବଂ ନିରୀକ୍ଷଣ କର୍ମଚାରୀ ସର୍ବଦା ଡ୍ୟୁଟିରେ ରହିବେ।
ତିବ୍ଦତୀୟ ଧର୍ମଗୁରୁ ତିବ୍ଦତରେ ଚାଇନା ଶାସନ ଆରମ୍ଭ ହେବା ପରେ ୧୯୫୯ ମସିହାରୁ ଭାରତରେ ରହୁଛନ୍ତି। ତାଙ୍କର ବିଶ୍ୱବ୍ୟାପୀ ପ୍ରଭାବ ଏବଂ ତିବ୍ଦତକୁ ଘେରି ରହିଥିବା ସମ୍ବେଦନଶୀଳ ଭୂରାଜନୈତିକ ଉତ୍ତେଜନାକୁ ଦୃଷ୍ଟିରେ ରଖି, ଭାରତ ସରକାର ତାଙ୍କୁ ଉଚ୍ଚସ୍ତରୀୟ ସୁରକ୍ଷା କଭରେଜ୍ ପ୍ରଦାନ କରୁଛନ୍ତି।
ଇଣ୍ଟେଲିଜେନ୍ସ ବ୍ୟୁରୋ ଦ୍ୱାରା ଦିଆଯାଇଥିବା ରିପୋର୍ଟ ଆଧାରରେ ବର୍ଷ ବର୍ଷ ଧରି ଚାଇନା ସମର୍ଥିତ ବ୍ୟକ୍ତିମାନଙ୍କ ସମେତ ବିଭିନ୍ନ ସଂସ୍ଥାଠାରୁ ଦଲାଇଲାମାଙ୍କ ଜୀବନ ପ୍ରତି ସମ୍ଭାବ୍ୟ ବିପଦ ରହିଛି , ଯାହା ତାଙ୍କ ସୁରକ୍ଷାକୁ ଭାରତୀୟ କର୍ତ୍ତୃପକ୍ଷଙ୍କ ପାଇଁ ସର୍ବୋଚ୍ଚ ପ୍ରାଥମିକତା ଦେଇଛି ଓ ସେଥିପାଇଁ ଦଲାଇଲାମାଙ୍କ ସୁରକ୍ଷାକୁ ବୃଦ୍ଧି କରାଯାଇଛି।