ନ୍ୟୁଜ୍ ବ୍ୟୁରୋ: ଜାତୀୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପରିଷଦ (ଏନସିଇଆରଟି) ର ଅଷ୍ଟମ ଶ୍ରେଣୀ ସାମାଜିକ ବିଜ୍ଞାନ ପାଠ୍ୟପୁସ୍ତକକୁ ନେଇ ଭାରତ ସର୍ବୋଚ୍ଚ ନ୍ୟାୟାଳୟ ଅସନ୍ତୋଷ ପ୍ରକାଶ କରିଛନ୍ତି। ପାଠ୍ୟପୁସ୍ତକରେ ନ୍ୟାୟପାଳିକା ସମ୍ପର୍କିତ କିଛି ବିଷୟବସ୍ତୁ ଉପରେ ଆପତ୍ତି ଉଠିବା ପରେ, ସେହି ଅଂଶକୁ ସଂଶୋଧନ କରିବା ନେଇ ଚର୍ଚ୍ଚା ଚାଲିଛି।ପାଠ୍ୟପୁସ୍ତକର ବିଷୟବସ୍ତୁ ଛାତ୍ରଛାତ୍ରୀଙ୍କ ପାଇଁ ପ୍ରେରଣାଦାୟକ ଓ ସକାରାତ୍ମକ ହେବା ଆବଶ୍ୟକ। ବିଶେଷକରି ବିଚାର ବିଭାଗରେ ଭ୍ରଷ୍ଟାଚାର ସମ୍ବନ୍ଧୀୟ ଉଲ୍ଲେଖ ଥିବାରୁ ଆପତ୍ତି ଜଣାଯାଇଛି।
ବିଚାରପତି ସୂର୍ଯ୍ୟକାନ୍ତ ଏହି ବିଷୟରେ ଉଦ୍ବେଗ ପ୍ରକାଶ କରି କହିଛନ୍ତି ଯେ, କୋର୍ଟ କୌଣସି ସଂସ୍ଥାକୁ କଳଙ୍କିତ କରିବାକୁ ଅନୁମତି ଦେବେ ନାହିଁ। ସେ କହିଛନ୍ତି, “ମୁଁ ଏହି ବିଷୟକୁ ସ୍ୱତଃ ପ୍ରେରିତ ଭାବେ ଗ୍ରହଣ କରିବି। କାହାକୁ ମଧ୍ୟ ପ୍ରତିଷ୍ଠାନକୁ ବଦନାମ କରିବାକୁ ଅନୁମତି ଦିଆଯିବ ନାହିଁ। ଆଇନ ତାହାର କାର୍ଯ୍ୟ କରିବ।” ବିଚାରପତି ବାଗଚି କହିଛନ୍ତି ଯେ, ପୁସ୍ତକର କିଛି ଅଂଶ ସମ୍ବିଧାନର ମୌଳିକ ଗଠନ ବିରୋଧୀ ମନେ ହେଉଛି।
ଏନସିଇଆରଟିର ସାମାଜିକ ବିଜ୍ଞାନ ପୁସ୍ତକର “ନ୍ୟାୟିକ ଦୁର୍ନୀତି” ଅଧ୍ୟାୟରେ ଦୁର୍ନୀତି, ମାମଲାର ଅତ୍ୟଧିକ ଭାର ଓ ପର୍ଯ୍ୟାପ୍ତ ବିଚାରପତିଙ୍କ ଅଭାବକୁ ନ୍ୟାୟପାଳିକା ସମ୍ମୁଖୀନ ଚ୍ୟାଲେଞ୍ଜ ଭାବେ ଉଲ୍ଲେଖ କରାଯାଇଛି। ସେହିପରି, ନୂତନ ପୁସ୍ତକରେ ବିଚାରପତିମାନେ ଏକ ଆଚରଣ ସଂହିତା ଦ୍ୱାରା ଆବଦ୍ଧ ରହନ୍ତି ବୋଲି ମଧ୍ୟ ଉଲ୍ଲେଖ ରହିଛି, ଯାହା କୋର୍ଟ ଭିତରେ ଓ ବାହାରେ ସେମାନଙ୍କ ଆଚରଣକୁ ନିୟନ୍ତ୍ରଣ କରେ। ଏହି ମାମଲାକୁ ନେଇ ଆଗାମୀ ଦିନରେ କୋର୍ଟ କେଉଁ ପଦକ୍ଷେପ ନେବେ, ସେଥିପାଇଁ ସମସ୍ତଙ୍କ ନଜର ରହିଛି।