ଭୁବଦନଶ୍ବର: କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଙ୍ଗଳବାର ଏକଦିନୀୟ ଓଡ଼ିଶା ଗସ୍ତରେ ଭୁବନେଶ୍ୱର ପହଞ୍ଚି ବିଭିନ୍ନ ଅଧିକାରିକ କାର୍ଯ୍ୟକ୍ରମରେ ଯୋଗଦେଇଥିଲେ। ବିମାନବନ୍ଦରରେ ପହଞ୍ଚିବା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଅନ୍ୟାନ୍ୟ ନେତାମାନେ ତାଙ୍କୁ ସ୍ୱାଗତ କରିଥିଲେ। ସ୍ୱାଗତ ସମୟରେ ଭବ୍ୟ ବ୍ୟବସ୍ଥା ସହ କଠୋର ସୁରକ୍ଷା ବ୍ୟବସ୍ଥା ମଧ୍ୟ ଦେଖିବାକୁ ମିଳିଥିଲା। ପରେ ସେ ରାଜ୍ୟ ଅତିଥି ଗୃହକୁ ପ୍ରସ୍ଥାନ କରିଥିଲେ।
ଭୁବନେଶ୍ୱର ପହଞ୍ଚିବା ପରେ ରାଜନାଥ ସିଂହ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ। ଏହି ବୈଠକରେ ରାଜ୍ୟର ରକ୍ଷା ସମ୍ପର୍କିତ ପ୍ରାଣାଳୀ ବିକାଶ, ବିପଦ ପ୍ରବନ୍ଧନ ବ୍ୟବସ୍ଥା ଓ କେନ୍ଦ୍ର-ରାଜ୍ୟ ମଧ୍ୟରେ ସମନ୍ୱୟ ବଳବତ୍ତା କରିବା ନେଇ ଆଲୋଚନା ହୋଇଥିଲା। ବୈଠକରେ ବିଜେପିର ଅନ୍ୟାନ୍ୟ ବରିଷ୍ଠ ନେତାମାନେ ମଧ୍ୟ ଉପସ୍ଥିତ ଥିଲେ।
ସନ୍ଧ୍ୟାବେଳେ ସେ ଓୟୁଏଟି କୃଷି ଶିକ୍ଷା ଅଡିଟୋରିୟମରେ ଆୟୋଜିତ ପୂର୍ବତନ କେନ୍ଦ୍ରମନ୍ତ୍ରୀ ଡ଼ା. ଦେବେନ୍ଦ୍ର ପ୍ରଧାନଙ୍କ ପ୍ରଥମ ପୁଣ୍ୟତିଥି ଅବସରରେ ସ୍ମୃତି ସଭାରେ ଯୋଗଦେଇ ତାଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ। ତାଙ୍କ ଉଦ୍ବୋଧନରେ ରାଜନାଥ ସିଂହ କହିଥିଲେ ଯେ, ଦେବେନ୍ଦ୍ର ପ୍ରଧାନ ଓଡ଼ିଶାରେ ବିଜେପିକୁ ଶକ୍ତିଶାଳୀ ଦଳରେ ପରିଣତ କରିବାରେ ମୂଲ୍ୟବାନ ଅବଦାନ ରଖିଥିଲେ। ସେ ତାଙ୍କୁ ‘ଓଡ଼ିଶା ବିଜେପିର ଭୀଷ୍ମ ପିତାମହ’ ବୋଲି ବର୍ଣ୍ଣନା କରି ତାଙ୍କର ନେତୃତ୍ୱ ଓ ସରଳ ଜୀବନଶୈଳୀକୁ ସ୍ମରଣ କରିଥିଲେ।
ସେ ଆହୁରି କହିଥିଲେ ଯେ, ଦେବେନ୍ଦ୍ର ପ୍ରଧାନଙ୍କ ରାଜନୀତିକ ଜୀବନ ଏବଂ ଜନସେବା ମନୋଭାବ ଅନେକଙ୍କ ପାଇଁ ପ୍ରେରଣା ରହିଛି। ତାଙ୍କ ଅନୁପସ୍ଥିତି ରାଜନୀତିକ ମଞ୍ଚ ପାଇଁ ଏକ ବଡ଼ କ୍ଷତି ବୋଲି ସେ ଉଲ୍ଲେଖ କରିଥିଲେ।