ନୂଆଦିଲ୍ଲୀ: ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ ଦେବେନ୍ଦ୍ର କୁମାର ଉପାଧ୍ୟାୟଙ୍କୁ ସୁପ୍ରିମକୋର୍ଟରେ ବିଚାରପତି ଭାବେ ନିଯୁକ୍ତି ପାଇଁ ସୁପାରିସ କରିଛନ୍ତି ସର୍ବୋଚ୍ଚ ଅଦାଲତର କଲେଜିୟମ। ସୋମବାର ତାଙ୍କ ସମେତ ୩ ଜଣ ହାଇକୋର୍ଟ ବିଚାରପତିଙ୍କୁ ସୁପ୍ରିମକୋର୍ଟକୁ ପଦୋନ୍ନତି ଦେବାକୁ କଲେଜିୟମ ସୁପାରିସ କରିଛି। ଅନ୍ୟ ଦୁଇଜଣ ହେଲେ ଗୁଜରାଟ ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ ସୁନୀତା ଅଗ୍ରୱାଲ ଏବଂ ତେଲଙ୍ଗାନା ହାଇକୋର୍ଟର ଜଷ୍ଟିସ ଅପରେଶ କୁମାର ସିଂହ।
୧୯୬୫ ଜୁନ୍ ୧୬ରେ ଉତ୍ତରପ୍ରଦେଶର ଆମ୍ବେଦକର ନଗରରେ ଜନ୍ମିତ ଜଷ୍ଟିସ ଉପାଧ୍ୟାୟ ୧୯୯୧ରେ ଲକ୍ଷ୍ନୌ ବିଶ୍ୱବିଦ୍ୟାଳୟରୁ ଆଇନ ଡିଗ୍ରୀ ହାସଲ କରିଥିଲେ। ସେହି ବର୍ଷ ମେ’ ୧୧ରେ ଆଇନଜୀବୀ ଭାବେ ପଞ୍ଜୀକୃତ ହୋଇଥିଲେ। ୨୦୦୭ରେ ଉତ୍ତରପ୍ରଦେଶର ମୁଖ୍ୟ ଷ୍ଟାଣ୍ଡିଂ କାଉନସେଲ୍ ଭାବେ ନିଯୁକ୍ତ ହୋଇଥିବା ସେ ୨୦୧୧ ନଭେମ୍ବର ୨୧ରେ ଆହ୍ଲାବାଦ ହାଇକୋର୍ଟର ବିଚାରପତି ହୋଇଥିଲେ। ପରବର୍ତ୍ତୀ ସମୟରେ ସେ ବମ୍ବେ ହାଇକୋର୍ଟର ମୁଖ୍ୟ ବିଚାରପତି ହୋଇଥିଲେ। ୨୦୨୫ ଜାନୁଆରୀ ୨୧ରେ ସେ ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତି ଭାବେ ଶପଥ ନେଇଥିଲେ। ଏବେ କଲେଜିୟମର ସୁପାରିସ କେନ୍ଦ୍ର ସରକାରଙ୍କ ନିକଟକୁ ଯିବ। ଅନୁମୋଦନ ମିଳିଲେ ତିନିଜଣଙ୍କ ସୁପ୍ରିମକୋର୍ଟରେ ନିଯୁକ୍ତିର ପଥ ସ୍ପଷ୍ଟ ହେବ।