ଭୁବନେଶ୍ୱର: ବିଜେଡିର ପାଟକୁରା ବିଧାୟକ ପ୍ରାର୍ଥୀ ବେଦ ପ୍ରକାଶ ଅଗ୍ରଵାଲଙ୍କ ପରଲୋକ ପରେ ସେଠାରେ ନିର୍ବାଚନ ଅନିଶ୍ଚିତତା ଭିତରକୁ ଚାଲିଯାଇଛି । ଯେ କୌଣସି ମୁହୂର୍ତରେ ନିର୍ବାଚନ କମିସନ ଏଠାରେ ମତଦାନ କାର୍ଯ୍ୟକ୍ରମକୁ ସ୍ଥଗିତ ରଖିପାରନ୍ତି । ଏଥିସହିତ ବରିଷ୍ଠ ବିଜେପି ନେତା ବିଜୟ ମହାପାତ୍ରଙ୍କ ଭାଗ୍ୟ ପୁଣି ଛନ୍ଦି ହୋଇଯାଇଛି । ଗତ ୧୯ ବର୍ଷ ଧରି ବିଧାନସଭା ଠାରୁ ଦୂରେଇ ରହିଥିବା ବିଜୟ ଏଥର ବିଧାନସଭାକୁ ନିର୍ବାଚିତ ହେବେ ବୋଲି ଆଶା ସୃଷ୍ଟି ହୋଇଥିଲା । ହେଲେ ଏହା ପାଣି ଫୋଟକା ଭଳି ମିଳାଇ ଯାଇଛି । ବିଜୟଙ୍କ ସମର୍ଥକମାନେ ନିରାଶ ହୋଇପଡିଛନ୍ତି ।
ରାଜ୍ୟ ରାଜନୀତିରେ ଏଥର ବିଜୟଙ୍କୁ ନେଇ ପୁଣି ହଟଚମଟ ସୃଷ୍ଟି ହୋଇଥିଲା । ବିଜୟ ବିଧାନସଭାକୁ ଫେରିବାକୁ ବୁଦ୍ଧିଜୀବୀ ମହଲ ଆଶା ବ୍ୟକ୍ତ କରିଥିଲେ । ଏଣୁ ପାଟକୁରା ଆସନରେ ବିଧାନସଭା ପ୍ରଚାର ବି ଘମାଘୋଟ ଜାରି ରହିଥିଲା । ବେଦୁ ବାବୁଙ୍କ ପାଇଁ ତାଙ୍କ ପତ୍ନୀ ଓ ପୁଅ ନିର୍ବାଚନର ମଙ୍ଗ ଧରିଥିବା ବେଳେ ବିଜୟଙ୍କ ପାଇଁ ବିଜେପି ନେତାମାନେ ପ୍ରଚାର ଚଳାଇଥିଲେ । ପୂର୍ବତନ କେନ୍ଦ୍ରମନ୍ତ୍ରୀ ଦିଲ୍ଲିପ ରାୟ ନିଜେ ଯାଇ ପାଟକୁରାରେ ପ୍ରଚାର କରିଥିଲେ । ଆସନ୍ତା ୨୩ ତାରିଖ ଦିନ ପ୍ରଧାନମନ୍ତ୍ରୀଙ୍କର କେନ୍ଦ୍ରାପଡା କାର୍ଯ୍ୟକ୍ରମ ରହିଛି । ଏବେ କିନ୍ତୁ ଉଭୟ ବିଜେପି ଶିବିରରେ ନିରାଶା ଖେଳିଯାଇଛି । ବିଜୟଙ୍କ ସମର୍ଥକମାନେ ତଟସ୍ଥ ହୋଇଯାଇଛନ୍ତି ।