ଭୁବନେଶ୍ୱର: ବିଜେପୁର ଉପନିର୍ବାଚନ ପାଇଁ ବିଜେଡି ପ୍ରାର୍ଥୀ ଆପାତତଃ ଚୂଡାନ୍ତ ହୋଇଛି । ଆସନ୍ତା ୨୬ ତାରିଖ ପୂର୍ବାହ୍ନରେ ସମ୍ଭବତଃ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନାମ ଘୋଷଣା କରିପାରନ୍ତି ବୋଲି ଦଳର ଶୀର୍ଷ ନେତୃତ୍ୱ ସୂଚନା ଦେଇଛନ୍ତି । ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, ପୂର୍ବତନ ବିଧାୟିକା ରୀତା ସାହୁଙ୍କୁ ବିଜେଡି ଏହି ଆସନରୁ ପ୍ରାର୍ଥୀ କରିବା ସମ୍ଭାବନା ଅଧିକ । ଏ ନେଇ ହାଇକମାଣ୍ଡ ମନସ୍ଥିର କରିଛନ୍ତି ।
ସେପଟେ ବିଜେପିରେ ବି ପ୍ରାର୍ଥୀ ଚୟନ ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ଯଦିଓ ଅଶୋକ ପାଣିଗ୍ରାହୀ, ପୂର୍ବତନ ପଦ୍ମପୁର ବିଧାୟକ ପ୍ରଦୀପ ପୁରୋହିତ ପ୍ରାର୍ଥୀ ଦୌଡରେ ଅଛନ୍ତି, ତଥାପି ଏଠାରେ ଦଳ ସନତ ଗଡତିଆଙ୍କୁ ଆଉ ଥରେ ପ୍ରାର୍ଥୀ କରିବ । ଏ ନେଇ ଶୀର୍ଷ ନେତୃତ୍ୱ ମନସ୍ଥିର କରିଛନ୍ତି । କାରଣ ମୁଖ୍ୟମନ୍ତ୍ରୀଙ୍କ ସହିତ ବି ଗତ ସାଧାରଣ ନିର୍ବାଚନରେ ସେ ୫୦ ହଜାରରୁ ଅଧିକ ଭୋଟ ପାଇଛନ୍ତି । ଏହାକୁ ଦଳ ଗମ୍ଭୀରତାର ସହିତ ବିଚାର କରୁଛି । ବରଗଡ ସାଂସଦ ସୁରେଶ ପୂଜାରୀଙ୍କୁ ସାମ୍ନାର ରଖି ଦଳ ଏହି ଆସନରେ ବିଜେଡିକୁ ମୁକାବିଲା କରିବ ।
କଂଗ୍ରେସ ୫ଟି ନାମ ଉପରେ ବିଚାର ଆଲୋଚନା ଚଳାଇଛି । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଗଠିତ କମିଟି ୯ ଜଣିଆ କମିଟି ଦଳ ଗଠନ କରିଛି । ଏହି କମିଟି ବିଜେପୁରରୁ ଲଢିବା ପାଇଁ ଆବେଦନ କରିଥିବା ସବୁ ନେତାଙ୍କ ସଂପର୍କରେ ଅନୁଧ୍ୟାନ କରୁଛି । ଦିନେ ଦୁଇଦିନ ମଧ୍ୟରେ ଦଳ ନାମ ତାଲିକାରେ ଚୂଡାନ୍ତ ମୋହର ଦେବ । କିନ୍ତୁ ୨୦୧୮ ଉପନିର୍ବାଚନ ଓ ଗତ ସାଧାରଣ ନିର୍ବାଚନରେ କଂଗ୍ରେସ ଶୋଚନୀୟ ପ୍ରଦର୍ଶନ କରିଥିବା ପରିପ୍ରେକ୍ଷୀରେ ଏହି ଉପନିର୍ବାଚନ ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି । ଦଳ ଯଦି ଏଥର ଭଲ ପ୍ରଦର୍ଶନ ନ କରେ, ତେବେ ଆସନ୍ତା ଦିନରେ କଂଗ୍ରେସ ବିରୋଧରେ ଯେଉଁ ଜନମତ ସୃଷ୍ଟି ହେବ, ତାହା ଘାତକ ହୋଇପାରେ । ବିଶେଷକରି ଆସନ୍ତା ପୌର ନିର୍ବାଚନରେ କଂଗ୍ରେସରୁ ଲଝିବା ପାଇଁ ଆଉ କେହି ଆଗ୍ରହ କରିନପାରନ୍ତି ।
ଉଲ୍ଲେଖଯୋଗ୍ୟ, ଗତ ଦୁଇଟି ନିର୍ବାଚନରେ ଏହି ଆସନରେ ବିଜେପି ବିପୁଳ ଭୋଟରେ ଜିତିଛି । ବିଜେପି ଦୁଇ ନମ୍ୱର ସ୍ଥାନରେ ଥିଲା ଓ କଂଗ୍ରେସକୁ ତିନି ନମ୍ୱର ସ୍ଥାନରେ ସନ୍ତୁଷ୍ଟ ହେବାକୁ ପଡିଥିଲା ।