ରାଜ୍ୟରେ ଗତ ୨୪ ଘଣ୍ଟାରେ ସାମାନ୍ୟ କମିଲା ସଂକ୍ରମଣ । ଗତକାଲି ୧୧ ହଜାର ଉପରେ କରୋନା ଆକ୍ରାନ୍ତ ସଂଖ୍ୟା ଥିବା ବେଳେ ଆଜି ତଳକୁ ଖସିଛି ।ଆଜି ୧୦ ହଜାର ୩୬୮ ସଂକ୍ରମିତ ଚିହ୍ନଟ ହୋଇଛନ୍ତି । ଏମାନଙ୍କ ମଧ୍ୟରୁ ସଙ୍ଗରୋଧ କେନ୍ଦ୍ରରୁ ୬ ହଜାର ୧୫ ଜଣ ଥିବା ବେଳେ ସ୍ଥାନୀୟ ଅଞ୍ଚଳରୁ ଅଛନ୍ତି ୪୩୫୩ ଜଣ । ତେବେ ମୋଟ ଆକ୍ରାନ୍ତଙ୍କ ମଧ୍ୟରୁ ହଜାରେ ୯୨ ଜଣ କେବଳ ୧୮ ବର୍ଷରୁ କମ ଶିଶୁ ଓ କିଶୋର ଅଛନ୍ତି । ଖୋର୍ଦ୍ଧା ଜିଲ୍ଳାରୁ ମଧ୍ୟ ସଂକ୍ରମିତଙ୍କ ସଂଖ୍ୟା କମିବାର ନାଁ ନେଉନି ।
ସବୁଦିନ ପରି ଆଜି ବି ଖୋର୍ଦ୍ଧାରୁ ସର୍ବାଧିକ ସଂକ୍ରମିତ ଚିହ୍ନଟ ହୋଇଛନ୍ତି । ଖୋର୍ଦ୍ଧାରୁ ଦିନରେ ୩ ହଜାର ୩୬ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ଦ୍ୱିତୀୟରେ ରହିଛି ସୁନ୍ଦରଗଡ । ସୁନ୍ଦରଗଡ଼ରୁ ୧୫୦୫ ଜଣ ଆକ୍ରାନ୍ତ ଅଛନ୍ତି । ସେହିପରି କଟକରୁ ୯୪୦ , ଯାଜପୁରରୁ ୨୯୦, ବଲାଙ୍ଗୀରରୁ ୨୫୩,ସମ୍ବଲପୁରରୁ ୨୪୭, ରାୟଗଡାରୁ ୨୦୮,କୋରାପୁଟରୁ ୨୦୨, ନୂଆପଡାରୁ ୧୯୬,କଳାହାଣ୍ଡିରୁ ୧୯୪,ସୁବର୍ଣ୍ଣପୁରରୁ ୧୮୦,ଜଗତସିଂହପୁରରୁ ୧୬୫,ମୟୂରଭଞ୍ଜରୁ ୧୬୫ ଓ ନବରଙ୍ଗପୁରରୁ ୧୬୨ ଜଣ ପଜିଟିଭ ଅଛନ୍ତି । ସବୁ ଜିଲ୍ଲାରେ ପ୍ରତିଦିନ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଛି ।
କଟକଣା ସତ୍ୱେ ବି ସଂକ୍ରମଣ ନିୟନ୍ତ୍ରଣକୁ ଆସୁନାହିଁ । ସେହିପରି ଦିନକରେ କରୋନାରେ ରାଜ୍ୟରେ ୭ ଜଣ ଆଖିବୁଜିଛନ୍ତି । ମୃତକଙ୍କ ମଧ୍ୟରେ ଖୋର୍ଦ୍ଧା ଜିଲ୍ଳାରୁ କେବଳ ୫ ଜଣ ଥିବା ବେଳେ ସମ୍ବଲପୁର ଓ ଗଞ୍ଜାମରୁ ଜଣେ ଲେଖାଁଏ ଅଛନ୍ତି । ରାଜ୍ୟରେ ମୋଟ କରୋନା ଆକ୍ରାନ୍ତଙ୍କ ସଂଖ୍ୟା ୧୧ ଲକ୍ଷ ୭୭ ହଜାର ୪୬୨ରେ ପହଞ୍ଚିଛି । ମୃତକ ସଂଖ୍ୟା ମଧ୍ୟ ୮ ହଜାର ୫୦୧କୁ ବୃଦ୍ଧି ପାଇଛି । ଏବେ ରାଜ୍ୟରେ ୮୮ ହଜାର ୩୪୬ ଜଣ ସକ୍ରିୟ ସଂକ୍ରମିତ ଅଛନ୍ତି ।