କୁବେର ଯନ୍ତ୍ରୀଙ୍କ ଟଙ୍କା ହିସାବ କରି କରି ହାଲିଆ ହୋଇଗଲେଣି ଭିଜିଲାନ୍ସ ଅଧିକାରୀ । ଯେତେ ଖୋଳିଲେ ସେତେ ବାହାରୁଛି ଟଙ୍କା ।ଆଜି ଭଞ୍ଜନଗର କ୍ଷୁଦ୍ର ଜଳସେଚନ ବିଭାଗର ସହକାରୀ ଯନ୍ତ୍ରୀ କାର୍ତ୍ତିକେଶ୍ବର ରାଉଳଙ୍କ ଦ୍ୱିତୀୟ ପତ୍ନୀଙ୍କ ଭଉଣୀ ଘରୁ ଜବତ ହୋଇଛି କୋଟିଏ ୪ ଲକ୍ଷ ଟଙ୍କା । ସାଲିଆ ସାହି ସ୍ଥିତ ଘରୁ ଏହି ଟଙ୍କା ଜବତ କରିଛି ଭିଜିଲାନ୍ସ । ଏହା ସହ ୩୫୪ ଗ୍ରାମର ସୁନା ଜବତ ହୋଇଛି । ଝୁମ୍ପୁଡି ଘରୁ ଏତେ ଟଙ୍କା ଜବତ ହେବା ଦେଖି ଭିଜିଲାନ୍ସ ଅଧିକାରୀ ଆଶ୍ଚର୍ଯ୍ୟ ହୋଇଯାଇଛନ୍ତି ।କାର୍ତ୍ତିକେଶ୍ବର ଙ୍କ ଦ୍ୱିତୀୟ ପତ୍ନୀ,ଶାଳି ଓ ପୁତୁରା ଅଟକ ଅଛନ୍ତି ।
ରିମାଣ୍ଡରେ ଥିବା କାର୍ତ୍ତିକେଶ୍ବରଙ୍କ ସହ ୩ ଜଣଙ୍କୁ ମୁହାଁମୁହିଁ ଜେରା କରାଯାଉଛି । ଜେରା ବେଳେ ସୁନା ଓ ଟଙ୍କା ଭଉଣୀ ଘରେ ଥିବା କହିଥିଲେ କାର୍ତ୍ତିକେଶ୍ବରଙ୍କ ଦ୍ୱିତୀୟ ପତ୍ନୀ କଳ୍ପନା ପ୍ରଧାନ । ଭିଜିଲାନ୍ସ କାର୍ତ୍ତିକେଶ୍ବରଙ୍କଠୁ ୪.୭୬ କୋଟି ଟଙ୍କାର ସମ୍ପତ୍ତି ଜବତ କଲାଣି । କେବଳ ୨ କୋଟିରୁ ଅଧିକ ନଗଦ ଟଙ୍କା ଜବତ ହୋଇଥିଲା । ଏହି ସମ୍ପତ୍ତି ତାଙ୍କ ଆୟଠାରୁ ୭ ଗୁଣ ଅଧିକ ।
ଗତକାଲି କାର୍ତ୍ତିକେଶ୍ବରଙ୍କୁ ଗିରଫ କରିଥିଲା ଭିଜିଲାନ୍ସ । ୩ ଦିନିଆ ରିମାଣ୍ଡରେ ନେଇ ପଚରାଉଚରା ବେଳେ ଆହୁରି କଳା ଟଙ୍କାର ଖୁଲାସା ହୋଇପାରେ । ୧୯୯୫ ମସିହାରେ କାର୍ତ୍ତିକେଶ୍ବର ରାଉଳ କ୍ଷୁଦ୍ର ଜଳସେଚନ ବିଭାଗରେ କନିଷ୍ଠ ଯନ୍ତ୍ରୀ ଭାବେ କାମ କରୁଥିଲେ । ଏହା ପରେ ୨୦୧୩ରେ ସହକାରୀ ଯନ୍ତ୍ରୀ ଭାବେ ପଦୋନ୍ନତି ପାଇଲେ । ।ତେବେ ଏତେ ଟଙ୍କା କାର୍ତ୍ତିକେଶ୍ବର କେଉଁଠୁ ଆଣିଲେ ତାକୁ ନେଇ ଏବେ ପ୍ରଶ୍ନ ଉଠୁଛି ।