ଭୁବନେଶ୍ବର: ମହିଳାଙ୍କ ପାଇଁ ଭୁବନେଶ୍ବର ସବୁଠୁ ସୁରକ୍ଷିତ ସହର। ନ୍ୟାସନାଲ୍ ଆନୁଆଲ୍ ରିପୋର୍ଟ ଆଣ୍ଡ ଇଣ୍ଡେକ୍ସ ୨୦୨୫ର ରିପୋର୍ଟ ଅନୁଯାୟୀ ଭୁବନେଶ୍ବର ମହିଳାଙ୍କ ପାଇଁ ସବୁଠୁ ସୁରକ୍ଷିତ ସହର ଅଟେ। ଦିଲ୍ଲୀ ଓ କଲକାତା ସମେତ ୭ଟି ସହର ମହିଳାଙ୍କ ପାଇଁ ସୁରକ୍ଷିତ ନ ଥିବା ମହିଳା ସୁରକ୍ଷା ସୂଚକାଙ୍କ, ନାରୀ- ୨୦୨୫ ରିପୋର୍ଟରୁ ଜଣାପଡିଛି। ରାଞ୍ଚି, ଶ୍ରୀନଗର, କୋଲକାତା, ଦିଲ୍ଲୀ, ଫରିଦାବାଦ, ପାଟନା ଏବଂ ଜୟପୁର ଭଳି ସହର ମହିଳାଙ୍କ ପାଇଁ ସବୁଠାରୁ କମ୍ ସୁରକ୍ଷିତ ସହର ମଧ୍ୟରେ ସ୍ଥାନିତ ହୋଇଥିବା ବେଳେ କୋହିମା, ବିଶାଖାପାଟନମ୍, ଭୁବନେଶ୍ୱର, ଆଇଜଲ୍, ଗ୍ୟାଙ୍ଗଟକ୍, ଇଟାନଗର ଏବଂ ମୁମ୍ବାଇକୁ ସୁରକ୍ଷିତ ବୋଲି ରିପୋର୍ଟରେ ଦର୍ଶାଯାଇଛି।
ସୁରକ୍ଷା ପାଇଁ ଭିତ୍ତିଭୂମିର ଅଭାବ, ଆଲୋକର ଅଭାବ, ସର୍ବସାଧାରଣ ପରିବହନ ବ୍ୟବସ୍ଥାରେ ତ୍ରୁଟିକୁ ଏହାର କାରଣ ବୋଲି ଦର୍ଶାଯାଇଛି। ନାରୀ ସୁରକ୍ଷା ଜାତୀୟ ବାର୍ଷିକ ରିପୋର୍ଟ ଓ ସୂଚକାଙ୍କ ୨୦୨୫ ଅନୁଯାୟୀ ଭାରତର ସହରଗୁଡିକରେ ମହିଳାମାନେ ୪୦ ପ୍ରତିଶତ ମହିଳା ନିଜକୁ ଅସୁରକ୍ଷିତ ମନେ କରୁଛନ୍ତି। ଅପରାଧ ପରିସଂଖ୍ୟାନକୁ ଏଥିରେ ଆଧାର କରାଯାଇନଥିବା ବେଳେ ୩୧ଟି ସହରର ୧୨ ହଜାର ୭୭୦ ମହିଳାଙ୍କୁ ନେଇ ରିପୋର୍ଟ ପ୍ରସ୍ତୁତ କରାଯାଇଛି। ରିପୋର୍ଟକୁ ଜାତୀୟ ମହିଳା କମିଶନ ଅଧ୍ୟକ୍ଷା ବିଜୟା କିଶୋର ରାହତକର ଉନ୍ମୋଚନ କରିଛନ୍ତି। ପି ଭାଲ୍ୟୁ ଆନାଲିଟିକ୍ସ ପକ୍ଷରୁ ରିପୋର୍ଟ ପ୍ରସ୍ତୁତ କରାଯାଇଥିବା ବେଳେ ଗ୍ରୁପ୍ ଅଫ୍ ଇଣ୍ଟେଲେକ୍ଚୁଆଲ୍ସ ଆଣ୍ଡ ଏକାଡେମିସିଆନ୍ ପକ୍ଷରୁ ଏହାକୁ ପ୍ରକାଶ କରାଯାଇଛି।
୨୦୨୪ ମସିହାରେ ୭% ମହିଳା କହିଛନ୍ତି ଯେ ସେମାନେ ନିର୍ଯାତନାର ସମ୍ମୁଖୀନ ହୋଇଥିଲେ ଓ ୧୮ରୁ ୨୪ ବର୍ଷ ବୟସର ମହିଳାମାନେ ସର୍ବାଧିକ ବିପଦରେ ଥିଲେ। ୨୦୨୨ର ସର୍ବଶେଷ ଜାତୀୟ ଅପରାଧ ରେକର୍ଡ଼ ବ୍ୟୁରୋ ତଥ୍ୟ ଅନୁଯାୟୀ ଏହା ମହିଳାମାନଙ୍କ ବିରୁଦ୍ଧରେ ଅପରାଧ ରିପୋର୍ଟ ହୋଇଥିବା ମାମଲାଗୁଡ଼ିକର ୧୦୦ ଗୁଣ। ମହିଳାମାନେ ସାମନା କରିଥିବା ଅସୁବିଧା ମଧ୍ୟରେ ରାସ୍ତାରେ ଚାହିଁ ରହିବା, ବିଲେଇ ଭଳି ଶବ୍ଦ କରିବା, ଅଶ୍ଳୀଳ ମନ୍ତବ୍ୟ ଦେବା ଏବଂ ସ୍ପର୍ଶ କରିବା ଅନ୍ତର୍ଭୁକ୍ତ।
ସର୍ଭେରେ ଅଂଶଗ୍ରହଣ କରିଥିବା ମହିଳାଙ୍କ ମଧ୍ୟରୁ ମାତ୍ର ୨୨ ପ୍ରତିଶତ ନିଜ ଅଭିଜ୍ଞତା ସମ୍ପର୍କରେ ଅଧିକାରୀଙ୍କୁ ଜଣାଉଥିବା କହିଥିଲେ। ସେହିପରି ୫୩ ପ୍ରତିଶତ ମହିଳା ସେମାନଙ୍କ କାର୍ଯ୍ୟସ୍ଥଳୀରେ ଯୌନ ନିର୍ଯାତନା ନିବାରଣ ଆଇନ ଲାଗୁ ହୋଇଥିବା ସମ୍ପର୍କରେ ଜାଣିନଥିବା କହିଛନ୍ତି।