- ଦାମ, ଖାରବେଳ, ପଞ୍ଚାନନ, ବ୍ରଜ ଗୋଟିଏ ରାସ୍ତାରେ
- ନବୀନଙ୍କୁ କମ୍ପୁଥିଲେ, ଆପେ ବଞ୍ଚିବା ପାଇଁ ରାହା ଖୋଜିଲେ
- ନୀତି ଆଦର୍ଶ ଚୁଲିକୁ ଗଲା, ନୂଆ ନୀଡରେ ବି କୋଣଠେସା ହେବେ
ଭୁବନେଶ୍ୱର:ୟେସା କରିଦେବୁ, ତେସା କରିଦେବୁ । ଆମର ଏମିତି ସଂଗଠନ ଅଛି । ସରକାରକୁ ଉପାଡି ଫିଙ୍ଗିଦେବୁ । କିଏ ନବୀନଙ୍କ ବିକଳ୍ପ ବୋଲି କହୁଥିଲେ ତ ଆଉ କିଏ ତାଙ୍କ ସମକକ୍ଷ ନେତା ବୋଲି ବି ଦାବି କରୁଥିଲେ । ଗତ କିଛି ମାସ ଧରି ରାଜ୍ୟ ରାଜନୀତିର ତୁଙ୍ଗ ନେତାମାନେ ଏମିତି ଗର୍ଜନ ତର୍ଜନ ରାଜ୍ୟ ରାଜନୀତିକୁ ଦୋହଲାଇ ଦେଇଥିଲା । ଏହି ନେତାମାନେ ସଙ୍କେତ ଦେଉଥିଲେ, ଯେମିତି ଏମାନେ ହିଁ କେବଳ ରାଜ୍ୟ ରାଜନୀତିର କର୍ଣ୍ଣଧାର ।
ହେଲେ ନିର୍ବାଚନ ଯେତିକି ପାଖେଇ ଆସୁଛି, ଏସବୁ ନେତାମାନଙ୍କର ଦକ୍ଷତା ସାମ୍ନାକୁ ଆସିବାରେ ଲାଗିଲାଣି । କିଏ ଦଳବଳ ସହିତ କଂଗ୍ରେସ ଶିବିରରେ ଆଶ୍ରୟ ନେଇଛନ୍ତି ତ ଆଉ କିଏ ବିଜେପିରେ । ଆଞ୍ଚଳିକ ଦଳ ଗଠନ କରି ବା ଜାତୀୟ ଦଳର ଓଡ଼ିଶା ଶାଖା ଖୋଲି ନବୀନଙ୍କ ନେତୃତ୍ୱକୁ ଚ୍ୟାଲେଞ୍ଜ କରିବାର ସାମର୍ଥ୍ୟ ଏମାନଙ୍କ ମଧ୍ୟରୁ କେହି ବି ଦେଖାଇ ପାରିନାହାନ୍ତି । କେବଳ ସେତିକି ନୁହେଁ, ଏମାନେ ଏକାଠି ହୋଇ ବିଜେଡିକୁ କ୍ଷମତାରୁ ବିତାଡିତ କରିବା ଲାଗି ଯେଉଁ ସ୍ୱପ୍ନ ଦେଖୁଛନ୍ତି, ତାହା ଯଦି ସମ୍ଭବ ନ ହେଲା, ତେବେ ୨୦୧୯ ସାଧାରଣ ନିର୍ବାଚନ ପରେ ଏସବୁ ନେତାଙ୍କ ମୁହଁଫୁଟାଣିକୁ ଲୋକେ ପ୍ରତ୍ୟାଖ୍ୟାନ କରିବାର ଭୟ ମଧ୍ୟ ରହିଛି ।
ବିଜେଡି ଦଳରୁ ବହିଷ୍କାର କରିବା ପରେ ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଚନ୍ଦ୍ର ଘଡାଇ ଅତ୍ୟନ୍ତ ନିରବରେ ବସିଥିଲେ । କେଉଁଠି ବି ନବୀନଙ୍କ ବିରୋଧରେ ବା ବିଜେଡି ବିରୋଧରେ ସେ ଖୋଲାଖୋଲି ସ୍ୱର ଉତ୍ତୋଳନ କରିନାହାନ୍ତି । ବିଳମ୍ୱରେ ହେଲେ ବି ନବୀନ ତାଙ୍କୁ ପୁଣି ଥରେ ଦଳକୁ ଫେରାଇ ଆଣିଛନ୍ତି ।
ଅପରପକ୍ଷରେ ରାଜ୍ୟ ରାଜନୀତିର ମୁଣ୍ଡିଆଳ ବୋଲି ଦାବି କରୁଥିବା ତିିନିଜଣ ବରିଷ୍ଠ ନେତା ଡାକ୍ତର ଦାମୋଦର ରାଉତ, ଐର ଖାରବେଳ ସ୍ୱାଇଁ ସବୁ ନୀତି ଆଦର୍ଶକୁ ଜଳାଞ୍ଜଳି ଦେଇ ବିଜେପିର ଆଶ୍ରୟ ନେଇଛନ୍ତି । ଏକଦା ବିଜେପି ବିରୋଧରେ ତମ୍ୱିତୋଫାନ କରୁଥିବ ତଥା ବିଜେପି ବିରୋଧୀ ବିଜୁ ବାବୁଙ୍କ ପଟ୍ଟ ଶିଷ୍ୟ ବୋଲି ଦାବି କରୁଥିବା ଦାମ ଏବେ ଗେରୁଆ ରଙ୍ଗରେ ରଙ୍ଗିନ ହୋଇ ଆଉ ଯେତେ ପାଟି କରୁଛନ୍ତି, ତାହାର ପ୍ରଭାବ ଦେଖିବାକୁ ମିଳୁନାହିଁ । ବରଂ ନବୀନ ଦାମଙ୍କ ପତ୍ନୀଙ୍କ ବିୟୋଗରେ ଯାଇ ତାଙ୍କ ଘରେ ଶେଷ ଶ୍ରଦ୍ଧା ସୁମନ ଦେବା ଘଟଣା ଚର୍ଚ୍ଚାକୁ ଆସିଛି ।
ଖାରବେଳ ନିଜ ଆସନରେ ଲଢିବା ଲାଗି ବି ସୁଯୋଗ ନାହିଁ । ବିଜେପି ସୋମବାର ତାଙ୍କୁ ଦଳକୁ ଆଣିବା ପରେ କନ୍ଧମାଳରେ ଲଢାଇବ । ଏଥିରେ ବିଜେପିର ବିଶେଷ କିଛି ଶକ୍ତି ବୃଦ୍ଧି ହେବାର ନାହିଁ, ବରଂ ଖାରବେଳ କୁଳରେ ଲାଗିଯିବେ । ସେହିଭଳି ପଞ୍ଚାନନ କାନୁନଗୋ କୌଣସି ବାଟ ନପାଇ କଂଗ୍ରେସରେ ମିଶିଛନ୍ତି । ବ୍ରଜ କିଶୋର ତ୍ରିପାଠୀଙ୍କ ପାଇଁ ପୁରୀ ଆସନରେ ତଥାପି ମୂଲଚାଲ କରୁଛି ବିଜେପି । ପୂର୍ବତନ ମୁଖ୍ୟମନ୍ତ୍ରୀ ଗିରିଧର ଗମାଙ୍ଗ ବିଜେପିକୁ ଯାଇ ଜୀବନର ଶେଷ ଅବସ୍ଥାରେ ଅସ୍ତିତ୍ୱ ହରାଇଛନ୍ତି ।
ପୂର୍ବତନ ବିଜୟ ମହାପାତ୍ରଙ୍କ ସ୍ଥିତି ବି ସମାନ । ନବୀନଙ୍କ ବିରୋଧରେ ହୁଂ କାର ଦେଉଥିବା ବିଜୟ ବିଜେପିରେ ଯୋଗଦେବା ସମ୍ଭାବନାକୁ ଏଡାଇ ଦିଆଯାଇନପାରେ । ଏହା ଯଦି ବାସ୍ତବ ରୂପ ନିଏ, ତେବେ ସେଠାରେ ରହି ସେ ନବୀନଙ୍କର କେତେ କ୍ଷତି କରିପାରିବେ ତାହା ଅଲଗା କଥା, କିନ୍ତୁ ମୂଲ୍ୟବୋଧଭିତ୍ତିକ ରାଜନୀତିରେ ଏମାନଙ୍କ ମଧ୍ୟରୁ କେହି ବି ଆଜି ଦିନରେ ନବୀନଙ୍କ ସମକକ୍ଷ ହେବା ସ୍ଥିତିରେ ନାହାନ୍ତି ।
କୌତୂହଳର କଥା ହେଲା,ଏସବୁ ନେତାମାନେ ଖର୍ଚ୍ଚ ବହୁଳ ନିର୍ବାଚନକୁ ଡରି ବିଜେପିକୁ ବା କଂଗ୍ରେସକୁ ଯାଉଛନ୍ତି ବୋଲି ପ୍ରକାରାନ୍ତରେ ସୂଚନା ଦେଉଛନ୍ତି । ବାସ୍ତବ କଥା ହେଲା, ସାଧାରଣ ଲୋକଙ୍କ ସମସ୍ୟା ଠାରୁ ଏମାନେ ଧୀରେ ଧୀରେ ଦୂରେଇ ଗଲେଣି । ଗଣମାଧ୍ୟମକୁ ଆୟୁଧ କରି ନିଜର ପତିଆରା ବଞ୍ଚାଇପାରିଛନ୍ତି ସିନା ନୂଆ ପିଢୀରେ ଗ୍ରହଣୀୟତା ରଖିପାରୁନାହାନ୍ତି । ଲୋକଙ୍କ ଭିତରେ ଏମାନଙ୍କ ଭଲପାଇବା ଆଉ ସେମିତି ନାହିଁ । ଏଣୁ ଯେ କୌଣସି ବ୍ୟାନରରେ ଏସବୁ ନେତାମାନେ ତିଷ୍ଠି ରହିବାକୁ ଉଚିତ ମଣୁଛନ୍ତି ବୋଲି ରାଜନୈତିକ ପଣ୍ଡିତମାନେ ସିଧା ସିଧା ମତ ରଖିଲେଣି ।
ଉଲ୍ଲେଖଯୋଗ୍ୟ, ବ୍ୟକ୍ତିଗତ ସ୍ୱାର୍ଥ ଛାଡି ଏକାଠି ହୋଇପାରୁନଥିବା ଏହି ନେତାମାନେ ଆଗାମୀ ଦିନରେ ରାଜ୍ୟ ସ୍ୱାର୍ଥ ରକ୍ଷାରେ କିଭଳି ଲାଗିବେ ତାହା ପ୍ରଶ୍ନବାଚୀ ସୃଷ୍ଟି କରିବା ସ୍ୱାଭାବିକ କଥା ।