୩ ତାରିଖ ଅପରାହ୍ନରେ ପୁରୀରେ ସ୍ଥଳ ଭାଗ ଛୁଇଁବ
୨୦୦ କିଲୋମିଟରରୁ ଅଧିକ ବେଗରେ ପବନ
୪ଜିଲ୍ଲାରେ ଦେଢ ଫୁଟ ଉଚ୍ଚର ଜୁଆର
୬ଟି ଜିଲ୍ଲା ଅତିକ୍ରମ କରି କୋଲକାତା ଯିବ
ଭୁବନେଶ୍ୱର: ଅତିରୁ ଅତି ଭୀଷଣ ରୂପ ଧାରଣ କରି ଓଡ଼ିଶା ଉପକୂଳ ମୁହାଁ ହୋଇଛି ବାତ୍ୟା ଫନି । ଏପରି ଯେ ପୁରୀ ବାଲୁଖଣ୍ଡ ସ୍ଥଳଭାଗ ଛୁଇଁବା ବେଳକୁ ପବନ ବେଗ ୨୦୦ କିଲୋମିଟର ଟପିଯିବ । ସ୍ୱତନ୍ତ୍ର ରିଲିଫ୍ କମିସନର ଏ ନେଇ ସତର୍କ କରାଇବା ପରେ ଉପକୂଳବର୍ତୀ ଜିଲ୍ଲା ସମେତ ସମଗ୍ର ରାଜ୍ୟରେ ଆତଙ୍କର ବାତାବରଣ ସୃଷ୍ଟି ହୋଇଛି ।
ଆମେରିକାର ନାଭି ସୂଚନା ମୁତାବକ, ଫନି ପୁରୀରେ ମାଡ଼ ହେବା ପରେ ଜଗତସିଂହପୁର, କଟକର ନିଆଳି, ଯାଜପୁର, ଭଦ୍ରକ, ବାଲେଶ୍ୱର ଓ ମୟୂରଭଂଜ ଦେଇ ପଶ୍ଚିମବଙ୍ଗରେ ପହଞ୍ଚିବ ।
ଭାରତର ପାଣିପାଗ କେନ୍ଦ୍ର ସୂଚନା ଅନୁସାରେ, ୧୪ କିଲୋମିଟର ବେଗରେ ଆଗକୁ ବଢୁଥିବା ଫନି ଖୁବ୍ ଉତ୍ତର-ଉତ୍ତର ପୂର୍ବ ଦିଗକୁ ଗତି କରି ଓଡ଼ିଶା ଆଡକୁ ମୁହାଁଇବ । ବୁଧବାର ମଧ୍ୟାହ୍ନ ସୁଦ୍ଧା ଏହା ପୁରୀର ଦକ୍ଷିଣ-ଦକ୍ଷିଣ ପଶ୍ଚିମରେ ୬୬୦ କିଲୋମିଟର ଓ ଆନ୍ଧ୍ରର ଦକ୍ଷିଣ-ଦକ୍ଷିଣ ପୂର୍ବର ୪୦୦ କିଲୋମିଟର ଦୂରରେ କେନ୍ଦ୍ରୀଭୂତ ହୋଇଛି । ଖୁବ୍ ଶୀଘ୍ର ଏହା ଉତ୍ତର ଉତ୍ତର ପୂର୍ବ ଆଡକୁ ମୋଡ ନେଇ ଓଡ଼ିଶା ଉପକୂଳ ଆଡକୁ ମାଡିଆସିବ ।
ଏହାର ପ୍ରଭାବରେ ଗଞ୍ଜାମ, ପୁରୀ, ଜଗତସିଂପୁର ଓ ଖୋର୍ଧା ନିକଟବର୍ତୀ ସମୁଦ୍ରରେ ଦେଢ ମିଟରରୁ ଅଧିକ ଉଚ୍ଚର ଜୁଆର ମାଡି ଆସିବ । ଗୁରୁବାର ଠାରୁ ଦକ୍ଷିଣ ଓଡ଼ିଶାରୁ ବର୍ଷା ଆରମ୍ଭ ହେବ ଓ ଏହା କ୍ରମଶଃ ବଢିବ । ୨୦୦ ମିଲିମିଟରରୁ ଅଧିକ ପରିମାଣର ବର୍ଷା ହୋଇପାରେ । ଓଡ଼ିଶାର କେନ୍ଦ୍ରାପଡା, ଭଦ୍ରକ, ଯାଜପୁର, ବାଲେଶ୍ୱର ଜିଲ୍ଲା ଗଭୀର ଭାବେ ପ୍ରଭାବିତ ହୋଇପାରେ । ପୁରୀ ଓ ଗଞ୍ଜାମ ଜିଲ୍ଲାରେ ବନ୍ୟା ଆଶଙ୍କା ମଧ୍ୟ ରହିଛି । ମତ୍ସ୍ୟଜୀବୀଙ୍କୁ ସମୁଦ୍ର ଭିତରକୁ ନ ଯିବା ଲାଗି ନିର୍ଦେଶ ଦିଆଯାଇଛି ।