ଭୁବନେଶ୍ୱର: ବିଜେଡି-ବିଜେପି ମଧ୍ୟରେ ଆସନ୍ତା ୪ବର୍ଷ ପର୍ଯ୍ୟନ୍ତ ବିବାଦର ପ୍ରଶ୍ନ ଉଠୁନାହିଁ । ଶେଷ ୬ମାସ ସେମାନଙ୍କ ମଧ୍ୟରେ ବାଦିପାଲା ହେବ । ଗତକାଲି ଭୁବନେଶ୍ୱରରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏ ନେଇ ସଙ୍କେତ ଦେବା ପରେ ରାଜ୍ୟ ରାଜନୀତିରେ ଭିନ୍ନ ଚର୍ଚ୍ଚା ସୃଷ୍ଟି ହୋଇଛି । ଏ ୪ ବର୍ଷ କିଏ ବିରୋଧୀ ଦଳ ଭୂମିକା ନିର୍ବାହ କରିବ?ଗଣମାଧ୍ୟମ ବିରୋଧୀ ଭାବେ ଉଭା ହେବ କି? କଂଗ୍ରେସ ଓଡ଼ିଶାରେ ପୁନରୁଦ୍ଧାର ପାଇଁ ଏହା ଏକ ଅପୂର୍ବ ସୁଯୋଗ ନୁହେଁ?ଏମିତି କିଛି ପ୍ରଶ୍ନ ଉପରେ ରାଜନୈତିକ ମହଲ ଆଲୋଚନା ଆରମ୍ଭ କରିଛନ୍ତି ।
ଗତ ସାଧାରଣ ନିର୍ବାଚନ ପୂର୍ବରୁ ଉଭୟ ଦଳ ମଧ୍ୟରେ ଏମିତି କନ୍ଦଳ ଦେଖାଯାଇଥିଲା ଯେ ମନେ ହେଉଥିଲା ଯେମିତି ଆକାଶ ପାତାଳ ଏକ କରିଦେବେ । ହଠାତ୍ ଉଭୟ ନିଜ ନିଜର ଆଭିମୁଖ୍ୟ ବଦଳାଇଛନ୍ତି ଓ ବିକାଶ ପାଇଁ ଏକାଠି ହୋଇଥିବା କଥା ପରୋକ୍ଷରେ ସ୍ପଷ୍ଟ କରିସାରିଲେଣି ।
ଯେହେତୁ ବିଜେଡି ରାଜ୍ୟରେ ଓ ବିଜେପି କେନ୍ଦ୍ରରେ ଶାସନାଧୀନ ରହିଛି, ଏଣୁ ସ୍ୱାଭାବିକ ଭାବେ ଉଭୟଙ୍କ କାର୍ଯ୍ୟକଳାପ, ନୀତି ଆଦିକୁ ନେଇ ସାଧାରଣରେ ଅଭିଯୋଗ ରହିବ, ବିତର୍କ ଏବଂ ବିବାଦ ବି । ହେଲେ ସାଧାରଣ ଲୋକଙ୍କ ଏ ପ୍ରତିକ୍ରିୟା ବିଧାନସଭା ହେଉ କି ବିଧାନସଭା ବାହାରେ କିଭଳି ପ୍ରତିପଳିତ ହେବ, ଏହା ଏବେ ବଡ ପ୍ରଶ୍ନ ଭାବେ ଉଭା ହେଲାଣି ।
କୌତୂହଳର କଥା ହେଉଛି, ଏଭଳି ସୁଯୋଗ ରାଜନୀତିରେ କ୍ୱଚିତ୍ ମିଳେ । ମାତ୍ର ରାଜ୍ୟ କଂଗ୍ରେସ ଲୋକଙ୍କୁ ବିଶ୍ୱାସକୁ ନେଇ ସାମ୍ନାକୁ ଆସିବାର ସମ୍ଭାବନା କମ୍ । ଏହି ଦଳ ବିବାଦ ଭିତରେ ଏଭଳି ଢଙ୍ଗରେ ଛନ୍ଦି ହୋଇଛି ଯେ ସେଥିରୁ ମୁକୁଳିପାରୁନି । ଦଳ ଏ ଯାଏ ନିଷ୍ପତ୍ତି ନେଇପାରିଲାନି, ନୂଆ ପିଢୀକୁ ଛାଡିବ ନା ପୂରୁଣା ଲଢିବେ? ଆଗକୁ କାହାକୁ ନେଇ କଂଗ୍ରେସ ଚାଲିବ । କିଏ କେଉଁଠି ନେତୃତ୍ୱ ନେବେ, ସେଭଳି ଦୁଇଟି ଲେଖାଏଁ ନେତା ସ୍ଥିର କରିବାରେ ବି ଉଭୟ ଜିତେନ୍ଦ୍ର ସିଂହ ଓ ନିରଞ୍ଜନ ପଟ୍ଟନାୟକ ଖୋଜି କାଢିପାରିଲେନି । ଏଭଳି ସ୍ଥିତି ସୂଚାଇ ଦେଉଛି ଯେ ରାଜ୍ୟ କଂଗ୍ରେସ ଏବେ ଲୋକଙ୍କ ସ୍ୱରକୁ ତୀବ୍ର କରିବାର କ୍ଷମତା ରଖୁନାହିଁ । କିଛି ନିର୍ବାଚନମଣ୍ଡଳୀରେ ଏକଥା ହୋଇପାରେ, କିନ୍ତୁ ୧୪୭ ନିର୍ବାଚନମଣ୍ଡଳୀରେ ଆଦୌ ସମ୍ଭବ ନୁହେଁ ।