ନୂଆଦିଲ୍ଲୀ: ୬୨୯ ଜଣ ମହିଳାଙ୍କୁ ଚୋରା ଚାଲାଣ କରାଯାଇଛି । ପାକିସ୍ତାନର ଗରିବ ପରିବାରର ମହିଳା ମାନଙ୍କୁ ବିବାହ ଓ ଅର୍ଥ ଲୋଭ ଦେଖାଇ ଦଲାଲ ମାନେ ଚୀନକୁ ଚାଲାଣ କରିଛନ୍ତି ।
ଆସୋସିଏଟ ପ୍ରେସକୁ ମିଳିଥିବା ଖବର ଅନୁସାରେ, ପାକିସ୍ତାନରୁ ୬୨୯ଜଣ ମହିଳା ଚୀନ୍କୁ କନ୍ୟା ଭାବେ ବିକି୍ର ହୋଇଛନ୍ତି । ସେମାନଙ୍କ ମଧ୍ୟରେ କିଛି ନାବାଳିକା ମଧ୍ୟ ଅଛନ୍ତି । ୨୦୧୮ ଓ ୧୯ ଏପ୍ରିଲ ମଧ୍ୟରେ ଏହି ଯୁବତୀମାନଙ୍କୁ ଚାଲାଣ କରାଯାଇଥିଲା । ଚୀନ୍ ଓ ପାକିସ୍ତାନୀ ଦଲାଲଙ୍କ ଦ୍ୱାରା ମିଳିତ ଭାବେ ଏହି ଚାଲାଣ କାର୍ଯ୍ୟ କରାଯାଇଛ। ବିବାହ ପାଇଁ ଚୀନର ବରପକ୍ଷଙ୍କ ଠାରୁ ୨୫,୦୦୦ରୁ ୬୫,୦୦୦ ଡଲାର ନିଆଯାଉଥିବା ବେଳେ ସେମାନେ ପାକିସ୍ତାନୀ ମହିଳାଙ୍କ ପରିବାର ସଦସ୍ୟଙ୍କୁ ମାତ୍ର ୧୫୦୦ ଡଲାର ଦେଉଛନ୍ତି ।
ଜଣେ ଅଧିକାରୀଙ୍କ କହିବା ମୁତାବକ, ଏହି ମହିଳାମାନଙ୍କୁ ପରେ ବେଶ୍ୟାବୃତ୍ତିରେ ନିୟୋଜିତ କରାଯାଉଛି । କିନ୍ତୁ ଚୀନ ବିଦେଶ ମନ୍ତ୍ରାଳୟ ପକ୍ଷରୁ କୁହାଯାଇଛିଯେ ଏହି ମହିଳାମାନଙ୍କ ଚାଲାଣ କରାଯିବା ନେଇ ମନ୍ତ୍ରାଳୟ ଅବଗତ ନାହିଁ । ତଦନ୍ତରୁ ଜଣା ପଡିଛି ଯେ ପାକିସ୍ତାନରେ ସଂଖ୍ୟାଲଘୁଙ୍କୁ ଟାର୍ଗେଟ କରାଯାଉଛି ।
ଗତ ସେପ୍ଟମ୍ୱରରେ ପାକିସ୍ତାନର ତଦନ୍ତକାରୀ ସଂସ୍ଥା ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କୁ ନକଲି ଚୀନ ବିବାହ ମାମଲା ନେଇ ଏକ ରିପୋର୍ଟ ପ୍ରଦାନ କରିଥିଲେ । ଏହି ରିପୋର୍ଟର ଏକ ନକଲ ଏବେ ଆସୋସିଏଟ୍ ପ୍ରେସ୍କୁ ମିଳିଥିବା ଜାତୀୟ ଗଣମାଧ୍ୟମ ରିପୋର୍ଟରୁ ପ୍ରକାଶ।