ବଲିଉଡ ଷ୍ଟାର ଶାହାରୁଖ ଖାନଙ୍କ ପୁଅ ଆର୍ୟନ ଖାନ୍ ଆଜି ଜେଲରୁ ମୁକୁଳିବେ । ସକାଳ ୫ଟା ୩୦ରେ ଆର୍ଥର ରୋଡ ଜେଲରେ ବେଲ୍ ବକ୍ସ ଖୋଲାଯାଇଛି । ଶୁକ୍ରବାର ଆର୍ୟନ ଜେଲରୁ ମୁକୁଳିବାର ଥିଲା କିନ୍ତୁ ବେଲ ଅର୍ଡର ଅଧିକାରୀଙ୍କ ପାଖରେ ଠିକ ସମୟରେ ପହଞ୍ଚିପାରିନଥିଲା । ଯେଉଁଥିପାଇଁ ତାଙ୍କୁ ଗତକାଲି ଜେଲରେ ରାତି କାଟିବାକୁ ପଡିଥିଲା । ଆଜି ଆର୍ୟନ ଜେଲରୁ ମୁକୁଳି ମନ୍ନତ ଫେରିବେ ।
ଆର୍ୟନ ଖାନଙ୍କ ଜାମିନ ପ୍ରକ୍ରିୟା ଶୁକ୍ରବାର ଶେଷ ନହେବା କାରଣରୁ ଜାମିନ ମଞ୍ଜୁର ପରେ ବି ଗତକାଲି ଜେଲରେ ରାତି କାଟିବାକୁ ପଡିଛି । ଆଜି ସକାଳ ୯ଟାରୁ ୧୨ ଟା ମଧ୍ୟରେ ସେ ଜେଲରୁ ମୁକୁଳି ମନ୍ନତ ଫେରିବା ନେଇ କୁହାଯାଉଛି । କିନ୍ତୁ ଏଇଟା ସେତେବେଳେ ସମ୍ଭବ ଯେତେବେଳେ ରିଲିଜ ଅର୍ଡର ଠିକ ସମୟରେ ମିଳିଯିବ । ଏହା ସହ ଆର୍ଥର ରୋଡ ଜେଲ ବକ୍ସରେ କେତେ ରିଲିଜ ଅର୍ଡର ବିଚାରଧୀନ ଅଛି ତାହା ଉପରେ ମଧ୍ୟ ଏହା ନିର୍ଭର କରେ ।
ଯଦି ପୂର୍ବ ଅପେକ୍ଷା ଅଧିକ ରିଲିଜ ଅର୍ଡର ଅଛି, ତେବେ ସମୟ ଲାଗିପାରେ । ତେବେ ଯଦି କମ ରିଲିଜ ଅର୍ଡର ଅଛି ତାହେଲେ ଜଲଦି ଆର୍ୟନ ଖାନ ଜେଲରୁ ମୁକୁଳିପାରିବେ । ସେପଟେ ଜେଲରୁ ପୁଅ ଫେରିବା ନେଇ ଶାହାରୁଖଙ୍କ ଘରେ ଏକ ଉତ୍ସବର ମାହୋଲ ରହିଛି ।
ଆର୍ୟନଙ୍କୁ ସ୍ୱାଗତ କରିବା ପାଇଁ ମନ୍ନତରେ ଜୋରଦାର ପ୍ରସ୍ତୁତି ଚାଲିଛି । ଗୁରୁବାର ଜାମିନ ମିଳିବା ପରେ ତାପରଠୁ ଘର ପୁରା ଆଲୋକିତ ହୋଇଯାଇଛି । ଆର୍ୟନଙ୍କ ସମେତ ଅରବାଜ ମର୍ଚାଣ୍ଟ ଓ ମୁନୁମୁନ ଧାମେଚା ୩ ଜଣଙ୍କୁ ବମ୍ବେ ହାଇକୋର୍ଟ ଗୁରୁବାର ଜାମିନ ପ୍ରଦାନ କରିଛନ୍ତି। ଶୁକ୍ରବାର ଅପରାହ୍ନରେ କୋର୍ଟର ବେଲ ଅର୍ଡର ମଧ୍ୟ ଜାରି କରାଯାଇଛି । କିନ୍ତୁ ଜାମିନ କପି ଅପରାହ୍ନ ସାଢେ ୫ଟା ସୁଦ୍ଧା ଆର୍ଥର ରୋଡ ଜେଲରେ ପହଞ୍ଚିବାର ଥିଲାବେଳେ ଠିକ ସମୟରେ ପହଞ୍ଚିପାରିନଥିଲା । ତେବେ ବେଲ ଅର୍ଡରରେ ଆର୍ୟନଙ୍କ ପାଇଁ କିଛିଟା ସର୍ତ୍ତ ରହିଛି ।
ଜେଲରୁ ମୁକୁଳିବା ପରେ ଆର୍ୟନ ଖାନ୍ ପ୍ରତି ଶୁକ୍ରବାର ଏନସିବି ଅଫିସରେ ହାଜିରା ଦେବେ । ମୁମ୍ବାଇ ବାହାରକୁ ଯାଇପାରିବେ ନାହିଁ । ବାହାରକୁ ଗଲେ ତଦନ୍ତକାରୀ ଅଧିକାରୀଙ୍କ ଅନୁମତି ନେବେ । ଅକ୍ଟୋବର ୨ରେ କ୍ରୁଜ ଡ୍ରଗ୍ସ ମାମଲାରେ ଆର୍ୟନ ଖାନଙ୍କୁ ଗିରଫ କରାଯାଇଥିଲା । ଗିରଫ ପରେ ତାଙ୍କୁ ଜେଲକୁ ପଠାଇଦିଆଯାଇଥିଲା । ଦୁଇ ଥର ସେଶନ୍ସ କୋର୍ଟରେ ଆର୍ୟନଙ୍କ ଜାମିନ ଆବେଦନ ଖାରଜ ହେବା ପରେ ଗୁରୁବାର ବମ୍ବେ ହାଇକୋର୍ଟ ଜାମିନ ମଞ୍ଜୁର କରିଥିଲେ ।