ବିବାଦ ଭିତରେ କୋଟିଆରେ ପଡୁଛି ପଞ୍ଚାୟତ ଭୋଟ । କୋଟିଆ ଗ୍ରାମପୁଞ୍ଜରେ ପଞ୍ଚାୟତ ନିର୍ବାଚନକୁ ଭଣ୍ଡୁର କରିବାର ଆନ୍ଧ୍ରର ଷଡଯନ୍ତ୍ର ଭିତରେ ସକାଳ ୭ରୁ ଆରମ୍ଭ ହୋଇଛି ମତଦାନ । ମତଦାନ ଆରମ୍ଭ ହୋଇଥିବାରୁ ଆଇନଶୃଙ୍ଖଳା ଦୃଷ୍ଟିରୁ ଆନ୍ଧ୍ର ସୀମାକୁ ସିଲ୍ କରିଛି ଓଡିଶା ପ୍ରଶାସନ । ମାଟି ଆଗ ପାର୍ଟି ପଛର ନାରା ଦେଉଥିବା ଜିଲ୍ଲାର ଆଗଧାଡ଼ିର ରାଜନେତା କୋଟିଆରେ ସର୍ବଦଳୀୟ ପ୍ରାର୍ଥୀ ମନୋନୀତ କରିଛନ୍ତି । ଯାହାଙ୍କୁ ଟକ୍କର ଦେଉଛନ୍ତି ଜଣେ ସ୍ୱାଧୀନ ପ୍ରାର୍ଥୀ । କଡ଼ା ସୁରକ୍ଷା ଭିତରେ ଭୋଟିଂ ଚାଲିଛି । ଆନ୍ଧ୍ରର ଷଡଯନ୍ତ୍ର ହେଉ କି କୌଣସି ଅପ୍ରୀତିକର ପରିସ୍ଥିତି ହେଉ ତାକୁ ରୋକିବା ପାଇଁ କୋଟିଆରେ କଡା ସୁରକ୍ଷା କରାଯାଇଛି । ୨ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯାଇଛି । କୋଟିଆରେ ଏଥର ୫ ହଜାରରୁ ଅଧିକ ଭୋଟର ସେମାନଙ୍କ ମତାଧିକାର ସାବ୍ୟସ୍ତ କରୁଛନ୍ତି । ଆଜି ଓଡିଶା ପକ୍ଷରୁ ମାଡ଼କାର, ଫଗୁଣସିନେରି, ଗଞ୍ଜେଇପଦର, ତାଡିବାଲସା, ଆଦି ୧୩ଟି ବୁଥରେ ପଞ୍ଚାୟତ ନିର୍ବାଚନ କରାଯାଉଛି ।
ଏବେ ସମସ୍ତଙ୍କ ନଜର କୋଟିଆ ଉପରେ ରହିଥିବା ବେଳେ ବିଶୃଙ୍ଖଳା ହେଲେ କଡ଼ା କାର୍ଯ୍ୟାନୁଷ୍ଠାନ ହେବ ବୋଲି ପୁଲିସ ଚେତାବନୀ ଦେଇଛି । ପଡୋଶୀ ଆନ୍ଧ୍ର ପକ୍ଷରୁ ଯେପରି ନିର୍ବାଚନରେ କୌଣସି ବାଧ୍ୟା ସୃଷ୍ଟି ନହୁଏ ସେଥିପାଇଁ ପୁଲିସ, ପ୍ରଶାସନ ସଜାଗ ରହିଛି । ଓଡିଶା-ଆନ୍ଧ୍ର ସୀମାରେ ସବୁବେଳେ ବିବାଦରେ ରହିଆସିଥିବା କୋଟିଆରେ ପଞ୍ଚାୟତ ଭୋଟ ହେବାରେ ବହୁ ଗୁରୁତ୍ୱ ରହିଛି । କାରଣ ଏହି ଅଞ୍ଚଳକୁ ଆନ୍ଧ୍ର ନିଜର ବୋଲି ଦାବି କରୁଛି । ଗତବର୍ଷ ଆନ୍ଧ୍ରରେ ଏଠାରେ ଏକତରଫା ନିର୍ବାଚନ କରିଥିଲା । ।