ୟୁକ୍ରେନ ଉପରେ ଋଷର ଆକ୍ରମଣ ତୀବ୍ର ହେବାରେ ଲାଗିଛି । ଆଜିକୁ ନବମ ଦିନ ହେବ ଦୁଇ ଦେଶ ମଧ୍ୟରେ ଯୁଦ୍ଧ ଚାଲିଛି । ୟୁରୋପର ସବୁଠୁ ବଡ଼ ନ୍ୟୁକ୍ଲିୟର ପାୱାର ପ୍ଲାଣ୍ଟରେ ଋଷ ଆକ୍ରମଣ କରିଛି । ଝେପୋରଜିଆ ଓ ଏନୋହର୍ଦ୍ଦର ନ୍ୟୁକ୍ଲିୟର ପାୱାର ପ୍ଲାଣ୍ଟ ରେ ଋଷର ଆକ୍ରମଣ ପରେ ପ୍ଲାଣ୍ଟ ରେ ନିଆଁ ଲାଗିଯାଇଥିବା ୟୁକ୍ରେନ ଦାବି କରିଛି । ନ୍ୟୁକ୍ଲିୟର ପାୱାର ପ୍ଲାଣ୍ଟ ରେ ନିଆଁ ଲାଗିବା ପରେ ଏନେଇ ୟୁକ୍ରେନ ରାଷ୍ଟ୍ରପତି ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ସହ ଫୋନରେ କଥା ହୋଇଥିଲେ । ଋଷ ପ୍ରତିରକ୍ଷା ମନ୍ତ୍ରାଳୟ ସୋମବାର ଏନୋହର୍ଦ୍ଦର ସହର କବଜା କରିବାକୁ ଦାବି କରିଥିଲା । ପ୍ଲାଣ୍ଟ ର ପ୍ରବକ୍ତା ଆଣ୍ଡ୍ରି ତୁଜ କହିଛନ୍ତି ଯେ, ଏବେ ରିଆକ୍ଟରର ନବୀକରଣ କାମ ଚାଲିଥିଲା । ଏମିତିରେ ଏବେ ଏହା କାମ କରୁ ନଥିଲା । କିନ୍ତୁ ପ୍ଲାଣ୍ଟ ଭିତରେ ପରମାଣୁ ଇନ୍ଧନ ଅଛି ।
ସେପଟେ ୟୁକ୍ରେନ ବିଦେଶ ମନ୍ତ୍ରୀ ଡିମିଟ୍ରୋ କୁଲେବା ପ୍ଲାଣ୍ଟ ରେ ନିଆଁ ଲାଗିବା ପରେ ଋଷ ସେନାଙ୍କୁ ଜେପୋରଜିଆ ଅଞ୍ଚଳରେ ଥିବା ୟୁରୋପର ସବୁଠୁ ବଡ଼ ପରମାଣୁ ଶକ୍ତି କେନ୍ଦ୍ର ଉପରେ ଆକ୍ରମଣ ବନ୍ଦ କରିବାକୁ ଅପିଲ କରିଛନ୍ତି । କୁଲେବା ଟୁଇଟ କରି କହିଛନ୍ତି, ଋଷ ସେନା ଲଗାତର ଏହି ପ୍ଲାଣ୍ଟ ଉପରେ ଗୁଳିମାଡ଼ କରୁଛନ୍ତି । ଏଠାରେ ପୂର୍ବରୁ ହିଁ ନିଆଁ ଲାଗି ସାରିଛି । ଏମିତିରେ ଯଦି ଏହା ବିସ୍ଫୋରଣ ହୁଏ ତେବେ ଏହା ଚର୍ନୋବିଲଠାରୁ ୧୦ ଗୁଣା ବଡ଼ ହେବ । ତେଣୁ ଋଷ ସେନାଙ୍କୁ ତୁରନ୍ତ ଆକ୍ରମଣ ବନ୍ଦ କରିଦେବା ଉଚିତ । ସେହିପରି ୟୁକ୍ରେନର ଚେରନିହିଭ ସହରରେ ଋଷ ସେନାର ଆକ୍ରମଣ ପରେ ୩୩ ଜଣଙ୍କ ମୃତ୍ୟୁ ହୋଇଛି । ୧୮ ଜଣ ଆହତ ହୋଇଛନ୍ତି । ୟୁକ୍ରେନରେ ଯୁଦ୍ଧ ବନ୍ଦ କରିବା ନେଇ ରାଷ୍ଟ୍ରପତି ଜେଲେନେସ୍କି ବଡ଼ ବୟାନ ଦେଇଛନ୍ତି । ସେ କହିଛନ୍ତି ଯୁଦ୍ଧ ବନ୍ଦ କରିବାକୁ ହେଲେ ପୁଟିନ ସହ ସିଧାସଳଖ କଥାବାର୍ତ୍ତା ପାଇଁ ଆହ୍ୱାନ ଦେଇଛନ୍ତି । ସେ କହିଛନ୍ତି, ଆମେ ଋଷ ଉପରେ ଆକ୍ରମଣ କରିନାହୁଁ କି କରିବାର ଯୋଜନା ବି କରିନୁ । ଆଉ ଏହି ଯୁଦ୍ଧ ବନ୍ଦ କରିବାର ଏକମାତ୍ର ଉପାୟ ପୁଟିନଙ୍କ ସହ ସିଧା କଥାବାର୍ତ୍ତା।