କଟକ: ଆଉ କିଛି ଦିନ ପରେ ଆରମ୍ଭ ହେବ ଐତିହାସିକ କଟକ ବାଲିଯାତ୍ରା। ବାଲିଯାତ୍ରା ଆରମ୍ଭ ପୂର୍ବରୁ ହିଁ ମୁଣ୍ଡ ଟେକିଛି ବିବାଦ। ବିଭିନ୍ନ ଦାବି ରଖି ପ୍ରଶାସନଙ୍କୁ ଚେତାବନୀ ଦେଲାଣି ବାଲିଯାତ୍ରା ମିଳିତ ମଞ୍ଚ। ଜମି ନିଲାମ ପ୍ରକ୍ରିୟା ବନ୍ଦ କରିବା ଓ ଜମି ବର୍ଗଫୁଟ ପିଛା ଟଙ୍କା କୋହଳ କରିବା ପାଇଁ ଜିଲା ପ୍ରଶାସନ ନିକଟରେ ଦାବି କରିଛି ବାଲିଯାତ୍ରା ମିଳିତ ମଞ୍ଚ।
ଏନେଇ ସାମ୍ବାଦିକ ସମ୍ମିଳନୀ କରି ଚେତାଇ ଦେଇଛି ବାଲିଯାତ୍ରା ମିଳିତ ମଞ୍ଚ। ଏଥିସହିତ ବାଲିଯାତ୍ରା ଓଡ଼ିଆ ଅସ୍ମିତା ପ୍ରତୀକ ବୋଲି କହିଛି ମଞ୍ଚ। ଏଥିରେ କଟକ ବ୍ୟବସାୟୀମାନଙ୍କୁ ପ୍ରାଧାନ୍ୟ ଦିଆଯାଉ। କଟକର ଟେଣ୍ଟ ହାଉସ, ଦୋଳି ବ୍ୟବସାୟୀ, ଅନ୍ୟାନ୍ୟ କ୍ଷୁଦ୍ର ବ୍ୟବସାୟୀ ପ୍ରତିବର୍ଷ ବାଲିଯାତ୍ରା କୋଟି କୋଟି ଟଙ୍କାର ବ୍ୟବସାୟ କରିଥାନ୍ତି ଓ ଲାଭାନ୍ବିତ ହୋଇଥା’ନ୍ତି।
କିନ୍ତୁ ବିଗତ କିଛି ବର୍ଷ ହେବ କଟକରେ ଲାଗି ରହିଥିବା କିଛି ଅସହିଷ୍ଣୁ ନିୟମ ବ୍ୟବସାୟୀମାନଙ୍କୁ କୁଠାରଘାତ କରିଛି। ଯାହାକୁ ଚଳିତ ବର୍ଷ ପରିବର୍ତ୍ତନ କରିବା ପାଇଁ ଦାବି କରିଛି ମଞ୍ଚ। ଏଥିସହିତ ଯଦି ଏହି ଦିଗରେ ପ୍ରଶାସନ କୌଣସି ପଦକ୍ଷେପ ନଗ୍ରହଣ କରେ ତାହାହେଲେ ମଞ୍ଚ ଯେଉଁ ନିଷ୍ପତ୍ତି ନେବ ସେଥିପାଇଁ ପ୍ରଶାସନ ଦାୟୀ ରହିବ ବୋଲି ମଞ୍ଚ ଚେତାବନୀ ଦେଇଛି।