ନୂଆଦିଲ୍ଲୀ: ଦେଶର ଜନତାଙ୍କୁ ଦୀପାବଳି ଉପହାର ଦେଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ପ୍ରଧାନମନ୍ତ୍ରୀ ମୋଦୀ ମଙ୍ଗଳବାର ଯୁବକଙ୍କୁ ନିଯୁକ୍ତି ପତ୍ର ପ୍ରଦାନ କରିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ଭିଡିଓ କନଫରେନ୍ସିଂ ମାଧ୍ୟମରେ ୫୧,୦୦୦ରୁ ଅଧିକ ମନୋନୀତ ପ୍ରାର୍ଥୀଙ୍କୁ ନିଯୁକ୍ତି ପତ୍ର ବାଣ୍ଟିଛନ୍ତି। ନୂତନ ଭାବେ ନିଯୁକ୍ତ ପ୍ରାର୍ଥୀମାନେ ବର୍ତ୍ତମାନ ସରକାରଙ୍କ ବିଭିନ୍ନ ମନ୍ତ୍ରଣାଳୟ ଏବଂ ବିଭାଗରେ କାର୍ଯ୍ୟ କରିବେ। ୪୦ରୁ ଅଧିକ ସ୍ଥାନରୁ ଏହି ନିଯୁକ୍ତି ମେଳାରେ ଦେଶର ହଜାର ହଜାର ଯୁବକଙ୍କୁ ଅନ୍ତର୍ଭୁକ୍ତ କରାଯାଇଛି, ଯେଉଁମାନଙ୍କୁ ସରକାରୀ ଚାକିରିରେ ନିଯୁକ୍ତି ପତ୍ର ଦିଆଯାଇଛି।
ସୂଚନାଯୋଗ୍ୟ, ଆଜିକାଲି କେବଳ ଦେଶରେ ନୁହେଁ, ରାଜ୍ୟଗୁଡ଼ିକରେ ମଧ୍ୟ ରୋଜଗାର ମେଳା ମାଧ୍ୟମରେ ଲୋକଙ୍କୁ ରୋଜଗାର ଯୋଗାଇ ଦିଆଯାଉଛି। ରୋଜଗାର ମେଳାରେ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତା ପ୍ରତିଫଳିତ ହୋଇଛି। ରାଷ୍ଟ୍ର ନିର୍ମାଣରେ ଯୋଗଦାନ ପାଇଁ ସେମାନଙ୍କୁ ଅର୍ଥପୂର୍ଣ୍ଣ ସୁଯୋଗ ପ୍ରଦାନ କରି ଏହା ଯୁବକମାନଙ୍କୁ ସଶକ୍ତ କରିବ। ନିଯୁକ୍ତି ମେଳାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି ଯେ ଆଜି ଧନତେରସ ପର୍ବ ଏବଂ ଏଥର ଦୀପାବଳିର ପର୍ବ ଅତ୍ୟନ୍ତ ସ୍ବତନ୍ତ୍ର କାରଣ ୫୦୦ ବର୍ଷ ପରେ ଭଗବାନ ଶ୍ରୀ ରାମ ଅଯୋଧ୍ୟାରେ ତାଙ୍କ ମହାନ ମନ୍ଦିରରେ ବସିଛନ୍ତି। ନିଜ ମନ୍ଦିରରେ ବସିବା ପରେ ତାଙ୍କର ପ୍ରଥମ ଦୀପାବଳି ପର୍ବର ଏହି ଉତ୍ସବ ସ୍ବତନ୍ତ୍ର।
ଏହି ନିଯୁକ୍ତି ମେଳା କାର୍ଯ୍ୟକ୍ରମ ୨୨ ଅକ୍ଟୋବର ୨୦୨୨ରୁ ଚାଲିଆସୁଛି ଏବଂ ଏହି ଅବସରରେ କେନ୍ଦ୍ର ମନ୍ତ୍ରୀ ଜିତେନ୍ଦ୍ର ପ୍ରସାଦ କହିଛନ୍ତି ଯେ ନିଯୁକ୍ତି ମେଳା ମାଧ୍ୟମରେ ପ୍ରଧାନମନ୍ତ୍ରୀ ମୋଦୀ ଏକ ବଟନ ଦବାଇ ୫୧ହଜାରରୁ ଅଧିକ ଲୋକଙ୍କୁ ସରକାରୀ ଚାକିରିରେ ଯୋଗଦେବାରେ ଯାତ୍ରା ପୂରା କରିଛନ୍ତି।। ଏକାସାଙ୍ଗରେ ଏତେ ସଂଖ୍ୟକ ଲୋକଙ୍କୁ ରୋଜଗାର ଯୋଗାଇବାର ଏହି ଶୁଭ କାର୍ଯ୍ୟକ୍ରମ ଆଜି ଧନତେରସ ଦିନରେ ଶେଷ ହୋଇଛି।