ବେଙ୍ଗାଲୁରୁ: କର୍ଣ୍ଣାଟକର ବେଙ୍ଗାଲୁରୁ ସହର ଉପକଣ୍ଠରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ମଙ୍ଗଳବାର ରାମୋହଲ୍ଲି ହ୍ରଦରେ ଭାସୁଥିବା ଏକ ସୁଟକେସ୍ ଭିତରୁ ଜଣେ ମହିଳାଙ୍କ ମୃତଦେହ ଉଦ୍ଧାର ହୋଇଛି ବୋଲି ପୁଲିସ ସୂଚନା ଦେଇଛି। ଏହି ହ୍ରଦ କୁମ୍ବଳଗୋଡୁ ଥାନା ଅଞ୍ଚଳ ଅନ୍ତର୍ଗତ ଦକ୍ଷିଣ-ପଶ୍ଚିମ ବେଙ୍ଗାଲୁରୁ ଡିଭିଜନରେ ଅବସ୍ଥିତ। ସ୍ଥାନୀୟ ଲୋକମାନେ ହ୍ରଦରେ ସୁଟକେସ୍ଟି ଭାସୁଥିବା ଦେଖି ପୁଲିସକୁ ଖବର ଦେଇଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ସୁଟକେସ୍ଟି ଉଦ୍ଧାର କରିବା ପରେ ସେଥିରୁ ମହିଳାଙ୍କ ମୃତଦେହ ମିଳିଥିଲା।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ମୃତଦେହଟିକୁ ପ୍ରାୟ ଦୁଇରୁ ତିନି ଦିନ ପୂର୍ବରୁ ହ୍ରଦରେ ଫିଙ୍ଗି ଦିଆଯାଇଥାଇପାରେ। ତେବେ ମୃତ ମହିଳାଙ୍କ ପରିଚୟ ଓ ମୃତ୍ୟୁର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ବରିଷ୍ଠ ପୁଲିସ ଅଧିକାରୀମାନେ ଘଟଣାସ୍ଥଳ ପରିଦର୍ଶନ କରିଥିବା ବେଳେ ମାମଲାକୁ ସନ୍ଦେହଜନକ ମୃତ୍ୟୁ ଭାବେ ଗ୍ରହଣ କରି ତଦନ୍ତ ଆରମ୍ଭ କରାଯାଇଛି। ଦକ୍ଷିଣ-ପଶ୍ଚିମ ଡିଭିଜନର ଡେପୁଟି କମିଶନର ଅଫ୍ ପୁଲିସ ଅନୀତା ହଡ଼ଡନ୍ନାଭର କହିଛନ୍ତି ଯେ, ବର୍ତ୍ତମାନ ସୁଦ୍ଧା ଅଧିକ ସୂଚନା ମିଳିନାହିଁ। ପ୍ରାଥମିକ ତଥ୍ୟ ସଂଗ୍ରହ ପରେ ମାଧ୍ୟମକୁ ବିସ୍ତୃତ ସୂଚନା ଦିଆଯିବ।