ହାଇଦ୍ରାବାଦ: ମନି ଲଣ୍ଡରିଂ ମାମଲାରେ ଏପ୍ରିଲ ୨୮ ତାରିଖରେ ହାଜର ହେବାକୁ ସୁପରଷ୍ଟାର ମହେଶ ବାବୁଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ସମନ ଜାରି କରିଛି। ହାଇଦ୍ରାବାଦରେ ଏକ ରିଅଲ୍ ଇଷ୍ଟେଟ୍ ଠକେଇ ମାମଲାରେ ଟଲିଉଡ୍ ସୁପରଷ୍ଟାର ମହେଶ ବାବୁଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ସମନ ଜାରି କରିଛି। ହାଇଦ୍ରାବାଦର ଦୁଇଟି ରିଅଲ୍ ଇଷ୍ଟେଟ୍ ଗୋଷ୍ଠୀ କ୍ରେତାଙ୍କୁ ଠକିବା ଏବଂ ମନି ଲଣ୍ଡରିଂ କାର୍ଯ୍ୟରେ ଲିପ୍ତ ଥିବା ତାଙ୍କ ବିରୋଧରେ ଅଭିଯୋଗ ହୋଇଛି।
ରିପୋର୍ଟ ଅନୁଯାୟୀ, ମହେଶ ସାଇ ସୂର୍ଯ୍ୟ ଡେଭଲପର୍ସ ଏବଂ ସୁରାଣା ଗ୍ରୁପ୍ ଦ୍ୱାରା ଆରମ୍ଭ କରାଯାଇଥିବା ରିଅଲ୍ ଇଷ୍ଟେଟ୍ ପ୍ରକଳ୍ପଗୁଡ଼ିକୁ ସମର୍ଥନ କରିଥିଲେ। ଏହି ଗ୍ରୁପଗୁଡିକରେ ଟଙ୍କା ନିବେଶ ପାଇଁ ଗ୍ରାହକଙ୍କୁ ପ୍ରଭାବିତ କରିଥିଲେ। କିନ୍ତୁ ଏହି ଗ୍ରୁପ୍ଗୁଡ଼ିକ ଗ୍ରାହକମାନଙ୍କୁ ଠକିଥିଲେ, ତେଣୁ ତାଙ୍କୁ ମନି ଲଣ୍ଡରିଂ ମାମଲାରେ ନୋଟିସ୍ ଜାରି କରାଯାଇଛି। ରିପୋର୍ଟ ଅନୁଯାୟୀ, ମହେଶ ଏହି ଅନୁମୋଦନ ପାଇଁ ୫.୯୦ କୋଟି ଟଙ୍କା ପାଇଥିଲେ – ଚେକ୍ ମାଧ୍ୟମରେ୩.୪୦ କୋଟି ଟଙ୍କା ଏବଂ ନଗଦ ୨.୫୦ କୋଟି ଟଙ୍କା। ବର୍ତ୍ତମାନ, ନଗଦ ଦେୟ ଯାଞ୍ଚ ଅଧୀନକୁ ଆସିଛି।
ତେଲେଙ୍ଗାନା ପୋଲିସ ଭାଗ୍ୟନଗର ପ୍ରପର୍ଟିଜ୍ ଲିମିଟେଡର ନରେନ୍ଦ୍ର ସୁରାନା ଏବଂ ସାଇ ସୂର୍ଯ୍ୟ ଡେଭଲପର୍ସର ସତୀଶ ଚନ୍ଦ୍ର ଗୁପ୍ତାଙ୍କ ବିରୋଧରେ ଏକାଧିକ ଏଫଆଇଆର ପଞ୍ଜିକୃତ କରିଛି। ଅଭିଯୋଗ ହୋଇଛି ଯେ ଏହି ଦୁଇଜଣ ଲେଆଉଟରେ ସମାନ ପ୍ଲଟକୁ ବହୁବାର ବିକ୍ରୟ କରି କ୍ରେତାମାନଙ୍କୁ ଠକିଥିଲେ ଏବଂ ପଞ୍ଜୀକରଣ ସମ୍ପର୍କରେ ମିଥ୍ୟା ପ୍ରତିଶ୍ରୁତି ମଧ୍ୟ ଦେଇଥିଲେ। ଇଡି ତଦନ୍ତ ଆରମ୍ଭ କରିବା ମାତ୍ରେ, ସେମାନେ ମହେଶ ବାବୁଙ୍କୁ କରାଯାଇଥିବା ଦେୟ ଉପରେ ଯାଞ୍ଚ କଲେ ଏବଂ ଅନୁମାନ କଲେ ଯେ ନଗଦ ଆକାରରେ ଦିଆଯାଇଥିବା ୨.୫୦ କୋଟି ଟଙ୍କା ଲଣ୍ଡରିଂ ନେଟୱାର୍କର ଅଂଶ ହେବ।
ଇଡି କହିଛି ଯେ ମହେଶ ସିଧାସଳଖ ଏହି ଠକେଇରେ ଜଡିତ ନଥାଇପାରନ୍ତି, କିନ୍ତୁ ସେ ପ୍ରକଳ୍ପଗୁଡ଼ିକୁ ଅନୁମୋଦନ କରିବା ଦ୍ୱାରା ଅନେକ କ୍ରେତା ସେମାନଙ୍କର କଠିନ ପରିଶ୍ରମର ଟଙ୍କା ଏଥିରେ ବିନିଯୋଗ କରିବାକୁ ଉତ୍ସାହିତ ହୋଇଥିଲେ। ମହେଶ ବାବୁଙ୍କ ଟିମ ପକ୍ଷରୁ ସମନ ସମ୍ପର୍କରେ ଏପର୍ଯ୍ୟନ୍ତ କୌଣସି ବିବୃତ୍ତି ଜାରି କରାଯାଇନାହିଁ।