କେଦାରନାଥରେ ହେଲିକପ୍ଟର ଦୁର୍ଘଟଣା, ୭ ମୃତ

ଉତ୍ତରାଖଣ୍ଡ: ଉତ୍ତରାଖଣ୍ଡ ରୁଦ୍ରପ୍ରୟାଗର ଗୌରୀକୁଣ୍ଡ ଅଞ୍ଚଳରେ ଏକ ବଡ଼ ଦୁର୍ଘଟଣା ଘଟିଛି। ରବିବାର ସକାଳେ ହେଲିକପ୍ଟରଟି କେଦାରନାଥର ଗୌରୀକୁଣ୍ଡ ଜଙ୍ଗଲରେ ଦୁର୍ଘଟଣାର ଶିକାର ହୋଇଛି। ଏଥିରେ ୫ ଯାତ୍ରୀ ଓ ୨ ପାଇଲଟଙ୍କୁ ମିଶାଇ ମୋଟ ୭ ଜଣ ଥିଲେ। ସମସ୍ତ ଯାତ୍ରୀଙ୍କ ମୃତ୍ୟୁ ଘଟିଥିବା ଆଶଙ୍କା କରାଯାଉଛି।
ହେଲିକପ୍ଟରଟି ଆର୍ଯ୍ୟନ କମ୍ପାନୀର ବୋଲି ଜଣାପଡ଼ିଛି। ଏହା ଡେରାଡୁନରୁ କେଦାରନାଥ ଅଭିମୁଖେ ଯାତ୍ରା କରୁଥିଲା। ଏହି ଦୁର୍ଘଟଣା ଗୌରୀକୁଣ୍ଡ ଅଞ୍ଚଳରେ ଘଟିଛି। ଘଟଣାଟି ସକାଳ ପ୍ରାୟ ୫ଟା ୩୦ରେ ଘଟିଥିବା କୁହାଯାଉଛି। ହେଲିକପ୍ଟର ଦୁର୍ଘଟଣାର କାରଣ ଖରାପ ପାଗ ବୋଲି କୁହାଯାଉଛି।
ହେଲିକପ୍ଟର ନୋଡାଲ ଅଧିକାରୀ ରାହୁଲ ଚୌବେ ଏବଂ ଜିଲା ବିପର୍ଯ୍ୟୟ ପରିଚାଳନା ଅଧିକାରୀ ନନ୍ଦନ ସିଂହ ରାଜୱାର ହେଲିକପ୍ଟର ଦୁର୍ଘଟଣା ନିଶ୍ଚିତ କରିଛନ୍ତି। ଗୌରୀକୁଣ୍ଡ ଉପରେ ଘାସ କାଟୁଥିବା ନେପାଳୀ ବଂଶୋଦ୍ଭବ ମହିଳାମାନେ ହେଲିକପ୍ଟର ଦୁର୍ଘଟଣା ସମ୍ପର୍କରେ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ଏହି ମର୍ମନ୍ତୁଦ ଦୁର୍ଘଟଣାରେ ସାତ ଜଣଙ୍କର ମୃତ୍ୟୁ ହୋଇଛି। ଜଣେ ଦମ୍ପତି ଏବଂ ସେମାନଙ୍କର ୨୩ ମାସର ଶିଶୁ ମଧ୍ୟ ଏଥିରେ ଅନ୍ତର୍ଭୁକ୍ତ, ଜୟସୱାଲ ପରିବାର ମହାରାଷ୍ଟ୍ରର ବୋଲି ଜଣାପଡିଛି। ଦୁଇ ଜଣ ସ୍ଥାନୀୟ ଲୋକ, ବିନୋଦ ନେଗି ଏବଂ ବିକ୍ରମ ସିଂହ ରାୱତ।
ମୃତକଙ୍କ ମଧ୍ୟରେ ରାଜକୁମାର ଜୟସୱାଲ, ଶ୍ରଦ୍ଧା ଜୟସୱାଲ, କାଶୀ ଜୟସୱାଲ, ଟୁଷ୍ଟି ସିଂହ, ବିନୋଦ, ବିକ୍ରମ ସିଂହ ଏବଂ କ୍ୟାପ୍ଟେନ ରାଜୀବ ଅଛନ୍ତି। ମୃତଦେହଗୁଡ଼ିକ ଗୁରୁତର ଭାବରେ ପୋଡ଼ି ଯାଇଥିବା ଜଣାପଡ଼ିଛି। କୁହାଯାଉଛି ଯେ ହେଲିକପ୍ଟରଟି ଗୌରୀ ମାଇ ଖାର୍କ ଉପରେ ଜଙ୍ଗଲରେ ପଡ଼ିଛି। ଖବର ମିଳିବା ପରେ ସ୍ଥାନୀୟ ପୁଲିସ ଏବଂ ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ପାଇଁ ଉଦ୍ୟମ ଆରମ୍ଭ ହୋଇଛି।