ଭୁବନେଶ୍ବର: ଓଡ଼ିଶାବାସୀଙ୍କ ପାଇଁ ଖୁସିର ଖବର। ରାଜ୍ୟର ନୂଆପଡା ଓ କଳାହାଣ୍ଡି ଜିଲ୍ଲାରେ କ୍ରମେ ହୀରା ଓ ମାଣିକ ଖଣିର ସନ୍ଧାନ ମିଳିଛି। ବିଧାନସଭାରେ ଖଣି ମନ୍ତ୍ରୀ ବିଭୂତି ଭୂଷଣ ଜେନା ଏହି ସୂଚନା ଦେଇଥିଲେ। ନୂଆପଡାର କାଲମିଦାଦର ଅଞ୍ଚଳରେ ହୀରା ପଥର ଥିବା ଚିହ୍ନଟ ହୋଇଥିବାବେଳେ କଳାହାଣ୍ଡିର ଜୁନାଗଡ଼ ଅଞ୍ଚଳରେ ମାଣିକ ଥିବା ସନ୍ଧାନ ମିଳିଛି। ବର୍ତ୍ତମାନ ଏହି ଖଣିଗୁଡିକର ବୈଷୟିକ ଓ ଅର୍ଥନୈତିକ ମୂଲ୍ୟାୟନ କାର୍ଯ୍ୟ ଚାଲିଛି।
ଏହା ସହିତ ଦେବଗଡ଼, ମୟୂରଭଞ୍ଜ ଓ କେନ୍ଦୁଝର ଜିଲ୍ଲାର ବିଭିନ୍ନ ଅଞ୍ଚଳରେ ସୁନା, ତମ୍ବା, ଗ୍ରାଫାଇଟ ଓ ନିକେଲ ଭଳି ଖଣିଜ ସମ୍ପଦ ଥିବାର ସୂଚନା ମିଳିଛି। ଏହି ସମସ୍ତ ଅଞ୍ଚଳରେ ଡିଜିପିଏସ ସର୍ଭେ ଓ ଭୂତାତ୍ତ୍ୱିକ ଅଧ୍ୟୟନ ଜାରି ରହିଛି। ରାଜ୍ୟରେ ଖଣିଜ ସମ୍ପଦ ଶୀଘ୍ର ଶେଷ ହେବ ବୋଲି ଯେଉଁ ଅଭିଯୋଗ ହେଉଛି, ତାହାକୁ ମନ୍ତ୍ରୀ ଖଣ୍ଡନ କରିଛନ୍ତି। ବର୍ତ୍ତମାନ ରାଜ୍ୟରେ ପ୍ରଚୁର ପରିମାଣରେ ଲୁହା ପଥର ଓ କ୍ରୋମାଇଟ ମଜୁତ ରହିଥିବା ସେ କହିଛନ୍ତି।