ନେପାଳ: ନେପାଳରେ ଚାଲିଥିବା ହିଂସାତ୍ମକ ପ୍ରତିବାଦ ମଧ୍ୟରେ କାଠମାଣ୍ଡୁରେ ଅନେକ ପର୍ଯ୍ୟଟକ ଫସି ରହିଛନ୍ତି। ସେଥିରେ ଅଛନ୍ତି ଶତାଧିକ ଓଡିଆ। ଏଥିରେ ଯାଜପୁରର ୨୩ ଜଣ ପର୍ଯ୍ୟଟକ ଥିବା ଜଣାପଡିଛି।
ଏମାନେ ସମସ୍ତେ ଚଳିତ ମାସ ୪ ତାରିଖରେ ନେପାଳ ଯାଇଥିଲେ। ଆସନ୍ତା ୧୨ ତାରିଖ ଅର୍ଥାତ ଆଉ ଦିନକ ପରେ ଓଡ଼ିଶା ଫେରିବାର କାର୍ଯ୍ୟକ୍ରମ ସ୍ଥିର ହୋଇଥିଲା। ନେପାଳର ଶେଖର ଟୁର ଆଣ୍ଡ ସର୍ଭିସର ଓଡିଶା ମ୍ଯାନେଜର ମଧୁସୂଦନ ମିଶ୍ରଙ୍କ ଦ୍ବାରା ଏମାନେ ନେପାଳ ଭ୍ରମଣରେ ଯାଇଛନ୍ତି। ତେବେ ହଠାତ ନେପାଳ ଅଶାନ୍ତ ହୋଇଯିବାରୁ ଏମାନେ ସେଠାରେ ଫସିଯାଇଛନ୍ତି। ଓଡି଼ଶା ଫେରିବା ନେଇ ସମସ୍ତେ ଭୟ ଓ ଆଶଂକା ଭିତରେ ହୋଟେଲରେ ଦିନ ବିତାଉଛନ୍ତି।