ଘରୁ ମିଳିଲା ୮ ପୃଷ୍ଠାର ସୁଇସାଇଡ୍ ନୋଟ
ହରିୟାଣା: ହରିୟାଣା କ୍ୟାଡର ଆଇପିଏସ ଅଧିକାରୀ ପୁରନ କୁମାରଙ୍କ ଆତ୍ମହତ୍ୟା ମାମଲାରେ ଏକ ବଡ ଖୁଲାସା ହୋଇଛି। ପୂରନଙ୍କ ମୃତ୍ୟୁ ସାରା ପୋଲିସ ବିଭାଗ ଓ ପ୍ରଶାସନକୁ ଚିନ୍ତାରେ ପକାଇଛି। ପୋଲିସ ତାଙ୍କ ଘରୁ ୮ ପୃଷ୍ଠା ବିଶିଷ୍ଟ ସୁଇସାଇଡ୍ ନୋଟ ଜବତ କରିଛି। ସେଥିରେ ଡିଜିପି, ଏଡିଜିପି ଓ ଏସପି ରାଙ୍କର ୧୦ ଜଣ ବରିଷ୍ଠ ଅଧିକାରୀମାନେ ନିର୍ଯାତନା ଦେଇଥିବା ନେଇ ଅଭିଯୋଗ କରାଯାଇଛି। ଏଥିସହିତ ଘରୁ ଏକ ଇଚ୍ଛାପତ୍ର ମଧ୍ୟ ମିଳିଛି।
ସୁଇସାଇଡ୍ ନୋଟକୁ ପରୀକ୍ଷା ପାଇଁ ଫୋରେନସିକ୍ ଲ୍ୟାବକୁ ପଠାଯାଇଛି। ଲ୍ୟାବ ରିପୋର୍ଟ ଆସିବା ପରେ ହିଁ ଭବିଷ୍ୟତର କାର୍ଯ୍ୟପନ୍ଥା ସ୍ପଷ୍ଟ ହେବ। ବର୍ତ୍ତମାନ କୁହାଯାଇପାରେ ଯେ ଆଇପିଏସ୍ ଅଧିକାରୀ ପୁରନ କୁମାର ଆତ୍ମହତ୍ୟା ମାମଲା ଏବେ ନୂଆ ମୁହଁ ପ୍ରକାଶ ପାଇପାରେ। ସରକାର ଏହି ମାମଲା ଉପରେ କଡା ନଜର ରଖିଛନ୍ତି।
ପୂରନଙ୍କୁ ଲଗାତର ମାନସିକ ନିର୍ଯାତନାର ସାମ୍ନା କରିବାକୁ ପଡ଼ିଥିଲା ଓ ଅନେକ ବରିଷ୍ଠ ଅଧିକାରୀ ତାଙ୍କ କ୍ୟାରିୟର ବର୍ବାଦ କରିବାର ଷଡ଼ଯନ୍ତ୍ର ରଚିଥିବା ନେଇ ସୁଇସାଇଡ୍ ନୋଟରେ ଉଲ୍ଲେଖ କରାଯାଇଛି। ସୁଇସାଇଡ୍ ନୋଟରେ ଯେଉଁ ଅଧିକାରୀଙ୍କ ନାମ ରହିଛି, ସେମାନଙ୍କ ମଧ୍ୟରେ କିଛି ପୂର୍ବ ଡିଜିପି ବର୍ତ୍ତମାନର ଡିଜିପି ସ୍ତରର ଅଧିକାରୀ ରହିଛନ୍ତି। ତେବେ ପୋଲିସ ବର୍ତ୍ତମାନ ସୁଦ୍ଧା କାହାର ନାମ ସାର୍ବଜନିନ କରିନାହିଁ। କୁହାଯାଉଛି, ଏହି ପୂରା ବିବାଦ ରୋହତକ ଭ୍ରଷ୍ଟାଚାର କେସ ସହ ଜଡ଼ିତ ରହିଛି, ଯାହାର ଯାଞ୍ଚ ପୂରନ ନିଜେ ଆରମ୍ଭ କରିଥିଲେ।
୨୦୦୧ ବ୍ୟାଚର ଆଇପିଏସ ଅଧିକାରୀ ଓ୍ବାଇ ପୂରନଙ୍କୁ ନିକଟରେ ରୋହତକ ସୁନାରିୟା ପୋଲିସ ଟ୍ରେନିଂ କଲେଜକୁ ବଦଳି କରାଯାଇଥିଲା। ସେଠାରେ ପଦଭାର ଗ୍ରହଣ କରିବା ପୂର୍ବରୁ ସେ ୭ ଦିନ ଛୁଟି ନେଇଥିଲେ। ସେହି ସମୟରେ ସେ ଏହି ପଦକ୍ଷେପ ଗ୍ରହଣ କରିଥିଲେ। ପୂରା କ୍ୟାରିୟରରେ ପୂରନ ଜଣେ ନିର୍ଭିକ ଅଧିକାରୀ ଭାବେ ଜଣାଶୁଣା ଥିଲେ। ସେ ଅନେକ ଥର ବିଭାଗୀୟ ନୀତି ଓ ସରକାରଙ୍କ ବିରୋଧରେ ସ୍ବର ଉତ୍ତୋଳନ କରିଥିଲେ।