ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି କୃଷିଭିତ୍ତିକ ପର୍ବ ପୋଙ୍ଗଲ ପାଳିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ କେନ୍ଦ୍ର ମନ୍ତ୍ରୀ ଏଲ. ମୁରୁଗାନଙ୍କ ବାସଭବନକୁ ଯାଇ ସମସ୍ତ ରୀତିନୀତି ସହିତ ପୂଜା କରିଥିଲେ। ପ୍ରଧାନମନ୍ତ୍ରୀ ମୋଦି ଏହି ପର୍ବ ଅବସରରେ ତାମିଲ ରୀତି ଅନୁସାରେ ପୂଜା କରିଥିଲେ। ଏହା ପରେ, ସେ ଏକ ଗାଈ ଏବଂ ଏକ ବାଛୁରୀକୁ ଘାସ ଖୁଆଇଥିଲେ ଏବଂ ସେମାନଙ୍କୁ ଫୁଲ ମାଳା ଦେଇ ପୂଜା କରିଥିଲେ।
ଏହି ପର୍ବର ମହତ୍ତ୍ୱ ବ୍ୟାଖ୍ୟା କରି ପ୍ରଧାନମନ୍ତ୍ରୀ କହିଛନ୍ତି, ‘ଏହି ପର୍ବ (ପୋଙ୍ଗଲ) ପ୍ରକୃତି, ପରିବାର ଏବଂ ସମାଜ ମଧ୍ୟରେ ସନ୍ତୁଳନ ସ୍ଥାପନ କରିବାର ପଥ ଦେଖାଏ। ବର୍ତ୍ତମାନ, ଲୋହରି, ମକର ସଂକ୍ରାନ୍ତି, ମାଘ ବିହୁ ଏବଂ ଅନ୍ୟାନ୍ୟ ପର୍ବଗୁଡ଼ିକୁ ନେଇ ଦେଶର ବିଭିନ୍ନ ସ୍ଥାନରେ ଉତ୍ସାହର ପରିବେଶ ରହିଛି। ପୋଙ୍ଗଲ ଏବଂ ସମସ୍ତ ପର୍ବ ପାଇଁ ଭାରତ ଏବଂ ବିଶ୍ୱରେ ରହୁଥିବା ସମସ୍ତ ତାମିଲ ଭାଇଭଉଣୀମାନଙ୍କୁ ମୋର ହାର୍ଦ୍ଦିକ ଶୁଭେଚ୍ଛା।’
ଏହି ଅବସରରେ ପ୍ରଧାନମନ୍ତ୍ରୀ କହିଛନ୍ତି ପୋଙ୍ଗଲ ଏକ ବିଶ୍ୱସ୍ତରୀୟ ପର୍ବ ପାଲଟିଛି। ସାରା ବିଶ୍ୱରେ, ତାମିଲ ସମ୍ପ୍ରଦାୟ ଏବଂ ତାମିଲ ସଂସ୍କୃତିକୁ ପ୍ରଶଂସା କରୁଥିବା ଲୋକମାନେ ପୋଙ୍ଗଲକୁ ବହୁତ ଉତ୍ସାହର ସହିତ ପାଳନ କରନ୍ତି। ଏବଂ ମୁଁ ସେମାନଙ୍କ ମଧ୍ୟରୁ ଜଣେ ହୋଇଥିବାରୁ ଗର୍ବିତ। ତାମିଲ୍ ସଂସ୍କୃତି ପୁରାତନ ସଂସ୍କୃତି ଏବଂ ପୂରା ବିଶ୍ବକୁ ବାଟ ଦେଖାଇଛି।
ଆପଣମାନଙ୍କ ସହିତ ଏହି ପର୍ବ ପାଳନ କରିବା ମୋ ପାଇଁ ଏକ ସମ୍ମାନର ବିଷୟ। ତାମିଲ ସଂସ୍କୃତିରେ, ପୋଙ୍ଗଲ ଏକ ଅତ୍ୟନ୍ତ ଆନନ୍ଦଦାୟକ ଅବସର। ଏହା ଆମର କୃଷକମାନଙ୍କ କଠିନ ପରିଶ୍ରମକୁ ଦର୍ଶାଏ। ଏହା ଭୂମି ଏବଂ ସୂର୍ଯ୍ୟ ପ୍ରତି ଆମର କୃତଜ୍ଞତାକୁ ଦର୍ଶାଏ। ଏହା ସହିତ ଏହି ପର୍ବ ଆମକୁ ପ୍ରକୃତି, ପରିବାର ଏବଂ ସମାଜ ମଧ୍ୟରେ ଏକ ସୁଦୃଢ ସନ୍ତୁଳନ ବଜାୟ ରଖିବାର ଗୁରୁତ୍ୱ ଶିଖାଏ।