ନ୍ୟୁଜ୍ ବ୍ୟୁରୋ: ଦେଶର ବ୍ୟାଙ୍କିଂ ବ୍ୟବସ୍ଥାକୁ ଅଧିକ ସୁଦୃଢ଼ ଓ ବିଶ୍ୱସ୍ତରୀୟ କରିବା ଲକ୍ଷ୍ୟରେ ସରକାର ଶୀଘ୍ର ଏକ ଉଚ୍ଚସ୍ତରୀୟ କମିଟି ଗଠନ କରିବେ। ଏହି କମିଟି ବ୍ୟାଙ୍କିଂ କ୍ଷେତ୍ରର ସମୀକ୍ଷା କରିବା ସହ ବୃହତ୍ ଓ ପ୍ରତିଯୋଗିତାମୂଳକ ବ୍ୟାଙ୍କ ଗଠନ ପାଇଁ ସରକାରଙ୍କୁ ଆବଶ୍ୟକ ସୁପାରିସ ପ୍ରଦାନ କରିବ। ଅର୍ଥମନ୍ତ୍ରୀ ନିର୍ମଳା ସୀତାରମଣ ଏହି ସୂଚନା ଦେଇଛନ୍ତି। ଅର୍ଥମନ୍ତ୍ରୀ କହିଛନ୍ତି ଯେ, ପ୍ରସ୍ତାବିତ କମିଟି ବିଶେଷଭାବେ ‘ବିକଶିତ ଭାରତ’ ଲକ୍ଷ୍ୟ ପାଇଁ ଆବଶ୍ୟକ ଅର୍ଥ ଯୋଗାଡ଼ ଉପରେ ଗୁରୁତ୍ୱ ଦେବ। ଏହି ଲକ୍ଷ୍ୟ ପୂରଣରେ ବ୍ୟାଙ୍କଗୁଡ଼ିକର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ।
କମିଟି ଗଠନ ପରେ ପୁନର୍ବାର ବ୍ୟାଙ୍କ ମିଶ୍ରଣ ହେବ କି ନାହିଁ—ଏନେଇ ପ୍ରଶ୍ନର ଉତ୍ତରରେ ସୀତାରମଣ କହିଥିଲେ ଯେ କମିଟିକୁ କେବଳ ବ୍ୟାଙ୍କ ମିଶ୍ରଣରେ ସୀମିତ ରଖିବା ଉଚିତ ନୁହେଁ। ବିକଶିତ ଭାରତ ପାଇଁ ବ୍ୟାଙ୍କଗୁଡ଼ିକୁ ଆକାରରେ ବଡ଼ ଏବଂ କ୍ଷମତାଶାଳୀ ହେବା ଆବଶ୍ୟକ।
ସେ କହିଛନ୍ତି ଯେ ବିକଶିତ ଭାରତ ଲକ୍ଷ୍ୟ ହାସଲ କରିବା ପାଇଁ ଅର୍ଥ, ବ୍ୟାଙ୍କ ଋଣ ଏବଂ ସାଧାରଣ ଲୋକଙ୍କ ନିକଟରେ ବ୍ୟାଙ୍କିଂ ସେବାର ପହଞ୍ଚ ଅତ୍ୟନ୍ତ ଜରୁରୀ। ନିକଟରେ ଉପସ୍ଥାପିତ କେନ୍ଦ୍ର ବଜେଟ୍ରେ ଅର୍ଥମନ୍ତ୍ରୀ ବ୍ୟାଙ୍କିଂ କ୍ଷେତ୍ର ପାଇଁ ଏକ ଉଚ୍ଚସ୍ତରୀୟ କମିଟି ଗଠନ କରିବାର ପ୍ରସ୍ତାବ ଘୋଷଣା କରିଥିଲେ। ଏହି କମିଟି ବ୍ୟାଙ୍କିଂ କ୍ଷେତ୍ରର ସମୀକ୍ଷା କରିବା ସହ ଭାରତର ପରବର୍ତ୍ତୀ ପର୍ଯ୍ୟାୟ ଅଭିବୃଦ୍ଧିର ଆବଶ୍ୟକତା ସହ ନିଜକୁ ଖାପ ଖୁଆଇବ। ସେଥିସହିତ ଆର୍ଥିକ ସ୍ଥିରତା, ଅନ୍ତର୍ଭୁକ୍ତୀକରଣ ଓ ଖାଉଟି ସୁରକ୍ଷା ଉପରେ ମଧ୍ୟ ଗୁରୁତ୍ୱ ଦିଆଯିବ।