ନୂଆ ଦିଲ୍ଲୀ: ସୋମବାର ଲାଲକିଲ୍ଲା ଓ ଦିଲ୍ଲୀ ସଚିବାଳୟକୁ ବୋମା ଧମକ ମିଳିବା ପରେ ରାଜଧାନୀରେ ଆତଙ୍କ ସୃଷ୍ଟି ହୋଇଛି। ଧମକପୂର୍ଣ୍ଣ ଇମେଲ୍ ଟି ଏକ ଖଲିସ୍ତାନୀ ଗୋଷ୍ଠୀର ନାମରେ ପଠାଯାଇଥିବା ସୂଚନା ମିଳିଛି। ଘଟଣା ପରେ ଦିଲ୍ଲୀ ପୁଲିସ୍ ତୁରନ୍ତ ତଦନ୍ତ ଆରମ୍ଭ କରିଛି। ଲାଲକିଲ୍ଲା ପରିସର ଭିତରେ ଓ ବାହାରେ ତଲାସି ଅଭିଯାନ ଚାଲିଛି। ଉଚ୍ଚ ପୁଲିସ୍ ଅଧିକାରୀ, ବୋମା ନିଷ୍କ୍ରିୟକାରୀ ଦଳ, କୁକୁର ଦଳ ଓ ଅଗ୍ନିଶମ ବିଭାଗର କର୍ମଚାରୀମାନେ ସ୍ଥଳରେ ଉପସ୍ଥିତ ଅଛନ୍ତି। ସୁରକ୍ଷା ଦୃଷ୍ଟିରୁ ଲାଲକିଲ୍ଲା ପରିସରକୁ ଖାଲି କରାଯାଇ ସୁରକ୍ଷା ବ୍ୟବସ୍ଥା କଡାକଡି କରାଯାଇଛି। ଆଇଟିଓ ନିକଟରେ ଥିବା ଦିଲ୍ଲୀ ସଚିବାଳୟରେ କାର୍ଯ୍ୟରତ ସମସ୍ତ କର୍ମଚାରୀଙ୍କୁ ମଧ୍ୟ ସ୍ଥାନ ଛାଡିବାକୁ ନିର୍ଦ୍ଦେଶ ଦିଆଯାଇଥିଲା। ସେଠାରେ ମଧ୍ୟ ପୁଲିସ୍ ଦଳ ତଦନ୍ତ ଜାରି ରଖିଛନ୍ତି। ଧମକପୂର୍ଣ୍ଣ ଇମେଲ୍ ଟି କେଉଁଠାରୁ ପଠାଯାଇଛି, ସେଥିପାଇଁ ପୁଲିସ୍ ସାଇବର ଶାଖାକୁ ନିୟୋଜନ କରିଛି। ଏହା ପୂର୍ବରୁ ଆଜି ସକାଳେ ଦୁଇଟି ସେନା ବିଦ୍ୟାଳୟକୁ ମଧ୍ୟ ବୋମା ଧମକ ମିଳିଥିବା ଖବର ମିଳିଛି। ଘଟଣାକୁ ଗୁରୁତ୍ୱ ଦେଇ ସମଗ୍ର ଅଞ୍ଚଳରେ ସତର୍କତା ବଢ଼ାଯାଇଛି।
ପ୍ରମୁଖ ଖବର
ଆଇଏଏସ ସ୍ତରରେ ଅଦଳବଦଳ: ୧୩ ଜଣ ଆଇଏଏସଙ୍କୁ ନୂଆ ଦାୟିତ୍ୱ ଦେଇଛନ୍ତି ସରକାର
ସି-ସୋର ଚିଟଫଣ୍ଡ ମାମଲାରେ ପୂର୍ବତନ ସାଂସଦ ରବୀନ୍ଦ୍ର ଜେନାଙ୍କୁ ହାଇକୋର୍ଟରୁ ଆଶ୍ୱସ୍ତି
ଦେଶରେ ଇନ୍ଧନ ଅଭାବ ନାହିଁ, ଆଶ୍ୱାସନା ଦେଲେ ପେଟ୍ରୋଲିୟମ ମନ୍ତ୍ରୀ
ଭୁବନେଶ୍ବର କୋର୍ଟକୁ ପୁଣି ବୋମା ଧମକ
ଖରାଦିନେ ହେବନି ବିଦ୍ୟୁତ୍ କାଟ୍: ସୁରେଶ ପୂଜାରୀ
ହର୍ମୁଜ୍ ପ୍ରଣାଳୀ ପାର କରି ମୁମ୍ବାଇ ପହଞ୍ଚିଲା ଭାରତୀୟ ତୈଳ ଟ୍ୟାଙ୍କର