ବଲିଉଡ ଷ୍ଟାର ଶାହାରୁଖ ଖାନଙ୍କ ପୁଅ ଆର୍ୟନ ଖାନଙ୍କ ଜାମିନ ଆବେଦନ ଶୁଣାଣି ଘୁଞ୍ଚିବାରେ ଲାଗିଛି । ଗତ ଦୁଇ ଦିନ ହେବ ଲଗାତର ଶୁଣାଣି ପରେ ବି ଜାମିନ ମିଳିପାରୁନି ଆର୍ୟନଙ୍କୁ । ଆଜି ଅପରାହ୍ନରେ ଆର୍ୟନଙ୍କ ଜାମିନ ଆବେଦନ ପରେ ଶୁଣାଣୀ ହେବ । ତେବେ ଆଜି ଆଉ ଆସନ୍ତାକାଲି ମାମଲାର ନିଷ୍ପତ୍ତି ଆସିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ । କାରଣ ଏହା ପରେ କୋର୍ଟରେ ଦୀପାବଳି ଛୁଟି ଆରମ୍ଭ ହୋଇଯିବ ।
ବମ୍ବେ ହାଇକୋର୍ଟଙ୍କୁ ଆଜି ଓ ଆସନ୍ତାକାଲି ଆର୍ୟନଙ୍କ ଜାମିନ ଆବେଦନ ଉପରେ ଶୁଣାଣି କରିବାକୁ ହେବ । କାରଣ ଏହି ଦୁଇ ଦିନରେ ଜାମିନ ଯଦି ନମିଳେ ଆର୍ୟନଙ୍କୁ ୧୫ ନଭେମ୍ବର ଯାଏଁ ଜେଲରେ ରହିବାକୁ ପଡିବ । ବମ୍ବେ ହାଇକୋର୍ଟର ଦୀପାବଳି ଛୁଟି ନଭେମ୍ବର ୧ରୁ ଆରମ୍ଭ ହେବ । ୧୩, ୧୪ ନଭେମ୍ବରରେ ଶନିବାର, ରବିବାର କାରଣରୁ କୋର୍ଟ ବନ୍ଦ ରହିବ । ଦୀପାବଳି ଛୁଟି ପୂର୍ବରୁ ବମ୍ବେ ହାଇକୋର୍ଟକୁ କାମ କରିବାର ଶେଷ ଦିନ ହେଉଛି ଅକ୍ଟୋବର ୨୯ ତାରିଖ । ଏହା ପରେ ନଭେମ୍ବର ୧୫ରେ ବମ୍ବେ ହାଇକୋର୍ଟ ଖୋଲିବ । ବୁଧବାର କୋର୍ଟରେ ଶୁଣାଣି ବେଳେ ଓକିଲ ଅମିତ ଦେଶାଇ ଓ ମୁକୁଲ ରୋହତଗୀ ଜଜ୍ଙ୍କ ସାମନାରେ ନିଜର ପକ୍ଷ ଉପସ୍ଥାପନ କରିଥିଲେ ।
ଆର୍ୟନ ଖାନଙ୍କ ଓକିଲ କୋର୍ଟରେ ଶୁଣାଣି ବେଳେ ଯୁକ୍ତି ରଖିଥିଲେ ଯେ:
- ଆର୍ୟନ ଖାନଙ୍କ ଗିରଫ ଅସାମ୍ବିଧାନିକ
- ଆର୍ଟିକିଲ ୨୨, ସିଆରପିସି ୫୦ ଅପେକ୍ଷା ଅଧିକ ଗୁରୁତ୍ୱପୂର୍ଣ୍ଣ
- ଆର୍ଟିକିଲ ୨୨ (ଦୋଷ ନଜଣାଇ କାହାକୁ ଗିରଫ କରାଯାଇପାରିବ ନାହିଁ
- ଆର୍ଟକିଲ ୨୨( ନିଜ ଅନୁସାରେ ଓକିଲଙ୍କ ପରାମର୍ଶ ନେଇପାରିବେ)
- ଆର୍ୟନଙ୍କ ଅପରାଧ ପ୍ରମାଣିତ ହୋଇନାହିଁ,ଆର୍ୟନ ଗ୍ରାହକ ନଥିଲେ
- କ୍ରୁଜ ପାର୍ଟିରେ ସେ ଅତିଥି ଥିଲେ, ଆର୍ୟନ ଡ୍ରଗ୍ସ କିଣିନଥିଲେ
- ଆର୍ୟନଙ୍କ ଫୋନ ଜବତ କରିଛି ଏନସିବି,ରିମାଣ୍ଡ ମେମୋରେ ଫୋନ ଜବତ ହେବାର ଉଲ୍ଲେଖ ନାହିଁ
- କଣ ପ୍ରମାଣ ପାଇଛନ୍ତି ତାହା ଜଣାନାହିଁ, ଭୁଲ ତଥ୍ୟ ଦେଇ ବାଟବଣା କରୁଛନ୍ତି ଅଧିକାରୀ
- ଗିରଫ ସହ ହ୍ୱାଟସ ଆପ ଚାଟ୍ର କୌଣସି ସଂପର୍କ ନାହିଁ
ଆଜି ଆର୍ୟନଙ୍କ ସମତେ ଅରବାଜ ମର୍ଚାଣ୍ଟ ଓ ମୁନମୁନ ଧାମେଚାଙ୍କ ଜାମିନ ଆବେଦନ ଉପରେ ମଧ୍ୟ ଶୁଣାଣି ହେବ । ତେବେ ଜାମିନ ଆବେଦନର ଶୁଣାଣି ନେଇ ତାରିଖ ପରେ ତାରିଖ ଘୁଞ୍ଚିଚାଲିଥିବାରୁ ଆର୍ୟନ ଜେଲରେ ଗଭୀର ଅବସାଦରେ ଅଛନ୍ତି । ଅକ୍ଟୋବର ୨ରୁ ମନ୍ନତ ଯାଇନଥିବା ବେଳେ କେବେ ଘରକୁ ଫେରିବେ ଦିନ ଗଣୁଛନ୍ତି ।
ଆର୍ୟନ ଖାନ ଗତ ୨୨ ଦିନରୁ ଆର୍ଥର ରୋଡ ଜେଲରେ ଅଛନ୍ତି । ସ୍ୱତନ୍ତ୍ର କୋର୍ଟ ଦୁଇ ଥର ଜାମିନ ଆବେଦନକୁ ଖାରଜ କରିଦେଇଛନ୍ତି । ଆର୍ୟନ ଖାନଙ୍କ ଓକିଲ ଓ ପରିବାର ଲୋକଙ୍କୁ ବମ୍ବେ ହାଇକୋର୍ଟରୁ ବହୁତ ଆଶା ରହିଛି । ଡ୍ରଗ୍ସ ମାମଲାରେ କୋର୍ଟ ଦୁଇ ଜଣଙ୍କୁ ମଙ୍ଗଳବାର ଜାମିନ ଦେଇସାରିଛନ୍ତି । ଅକ୍ଟୋବର ୨ରେ ଆର୍ୟନ ଖାନଙ୍କୁ ଏନସିବି ଗିରଫ କରିଥିଲା ।