ନୂଆପଡ଼ା: ଜୁଆ ଆଡ୍ଡା ଉପରେ ପୋଲିସର ବଡ଼ ଧରଣର ଚଢ଼ଉ। ନୂଆପଡ଼ା ଜିଲ୍ଲା ଖରିଆର୍ ରୋଡ ଜୋଙ୍କ ଥାନା ଅଞ୍ଚଳରେ ଏକ ଜୁଆଆଡ୍ଡା ଉପରେ ଶନିବାର ବିଳମ୍ବିତ ରାତିରେ ଚଢ଼ାଉ ହୋଇଛି। ଏଥିରେ ୮୦ରୁ ଊର୍ଦ୍ଧ୍ୱ ଜୁଆଡ୍ଡୀଙ୍କୁ ଅଟକରଖି ଥିବାବେଳେ ଲକ୍ଷ ଲକ୍ଷ ଟଙ୍କା, ମୋବାଇଲ, ବାଇକ ଜବତ ହୋଇଛି।
ସୂଚନାନୁଯାୟୀ, ଶନିବାର ଖରିଆର ରୋଡ ସହରରେ ମହୋତ୍ସବ ଚାଲିଥିବାବେଳେ ଅନ୍ୟପଟେ ସହର ବାହାରେ ଠେଲକୋବେଡା ଠାରେ ବଡଧରଣର ଜୁଆଆଡ୍ଡା ଉପରେ ସତନ୍ତ୍ର ପୋଲିସ ଟିମ୍ ଚଢ଼ଉ କରିଛି। ଖରିଆର ରୋଡ ସହରରେ ହେଉଥିବା ମହୋତ୍ସବରେ ସମସ୍ତେ ବ୍ୟସ୍ତଥିବା ବେଳେ ଏହାର ସୁଯୋଗ ନେଇ ଜୁଆ ଖେଳ ଚାଲିଛି। ମହୋତ୍ସବରେ ଖୋଦ ଏସ୍ପି ଗୁଣ୍ଡାଲା ରେଡ୍ଡୀ ରାଘବେନ୍ଦ୍ର ଅତିଥି ଭାବରେ ମଞ୍ଚାସିନ ଥିବାବେଳେ ଅନ୍ୟପଟେ ଜଣେ ଡିଆଇଜିଙ୍କ ନେତୃତ୍ୱରେ ପ୍ରାୟ ୫୦ ଜଣ ଅଧିକାରୀ ଓ ପୋଲିସ କର୍ମଚାରୀ ପହଞ୍ଚି ଚଢ଼ାଉ କରିଥିଲେ। ଜୁଆଡ୍ଡୀମାନେ ସେଠାରୁ ଫେରାର ହେବାକୁ ଉଦ୍ୟମ କରିଥିବା ବେଳେ ପୋଲିସ କାବୁ କରିବାରେ ସଫଳ ହୋଇଛି। ଅନ୍ଧାର ସୁଯୋଗ ନେଇ କେତେ ଜୁଆଡ୍ଡୀ ଖସି ପଳାଇବାରେ ସକ୍ଷମ ହୋଇଛନ୍ତି।
ଏସ୍ପି ରାଘବେନ୍ଦ୍ରଙ୍କ କହିବା ଅନୁଯାୟୀ ୮୦ରୁ ଊର୍ଦ୍ଧ୍ୱ ଜଣଙ୍କୁ ପୋଲିସ କାବୁ କରିଛି। ୭୪ଟି ମୋବାଇଲ ଓ ଜୁଆ ଖେଳରେ ବ୍ୟବହୃତ ସାମଗ୍ରୀ, ୨୯ ଲକ୍ଷରୁ ଊର୍ଦ୍ଧ୍ୱ ଟଙ୍କା ଓ ଗାଡ଼ି ଜବତ କରାଯାଇଛି। କେତେ ଟଙ୍କାର କାରବାର ଚାଲିଥିଲା ସ୍ପଷ୍ଟ ହୋଇ ନାହିଁ। ଆଡ୍ଡା କିଏ ଚଳାଉ ଥିଲା। ତାହା ମଧ୍ୟ ଅସ୍ପଷ୍ଟ ରହିଛି। ଅଟକ ବ୍ୟକ୍ତି ମାନଙ୍କୁ ଜୋଙ୍କ ଥାନାରେ ରଖି ପଚରା ଉଚରା ଚାଲିଛି।