ନ୍ୟୁଜ୍ ବ୍ୟୁରୋ: ଟାଟା ଗ୍ରୁପ୍ର ଚେୟାରମ୍ୟାନ ଭାବେ ଏନ୍. ଚନ୍ଦ୍ରଶେଖରନଙ୍କୁ ପୁଣି ଥରେ ନିଯୁକ୍ତି ମିଳିଛି। ଗୁରୁବାର ଟାଟା ସନ୍ସର ବୋର୍ଡ ତାଙ୍କୁ ତୃତୀୟ ଥର ପାଇଁ ଅଧ୍ୟକ୍ଷ ଭାବେ ପୁନଃନିଯୁକ୍ତ କରିଛି। ଏହା ସହିତ ଟାଟା ଗ୍ରୁପ୍ର ପରବର୍ତ୍ତୀ ଚେୟାରମ୍ୟାନଙ୍କୁ ନେଇ ଚାଲିଥିବା କଳ୍ପନାଜଳ୍ପନାର ଅନ୍ତ ଘଟିଛି।
୨୦୧୭ ମସିହାରୁ ଚନ୍ଦ୍ରଶେଖରନ ଟାଟା ଗ୍ରୁପ୍ର ଚେୟାରମ୍ୟାନ ଭାବେ ଦାୟିତ୍ୱରେ ଅଛନ୍ତି। ୨୦୧୬ରେ ତତ୍କାଳୀନ ଚେୟାରମ୍ୟାନ ସାଇରସ ମିସ୍ତ୍ରୀଙ୍କୁ ପଦରୁ ହଟାଯିବା ପରେ ଚନ୍ଦ୍ରଶେଖରନଙ୍କୁ ଏହି ଦାୟିତ୍ୱ ମିଳିଥିଲା। ଟାଟା ପରିବାର ବାହାରୁ ଆସି ଏହି ଗୁରୁତ୍ୱପୂର୍ଣ୍ଣ ପଦରେ ନିଯୁକ୍ତ ହୋଇଥିବା ସେ ପ୍ରଥମ ବ୍ୟକ୍ତି।
୬୩ ବର୍ଷୀୟ ଚନ୍ଦ୍ରଶେଖରନ ୧୯୮୭ରେ ଟିସିଏସ୍ରେ ଯୋଗଦେଇଥିଲେ। ୨୦୦୯ରେ ସେ ଟିସିଏସ୍ର ସିଇଓ ହୋଇଥିଲେ।
ତେବେ ତୃତୀୟ ଥର ଚେୟାରମ୍ୟାନ ପଦରେ ତାଙ୍କୁ ରଖିବା ନେଇ ଟାଟା ଗ୍ରୁପ୍ ମଧ୍ୟରେ ମତଭେଦ ଥିବା ନେଇ ଚର୍ଚ୍ଚା ହୋଇଥିଲା। ଏୟାର ଇଣ୍ଡିଆ, ଜାଗୁଆର ଲ୍ୟାଣ୍ଡ ରୋଭର ଆଦି ବ୍ୟବସାୟର ପ୍ରଦର୍ଶନକୁ ନେଇ ମଧ୍ୟ ପ୍ରଶ୍ନ ଉଠିଥିଲା। ତୃତୀୟ ଥର ଦାୟିତ୍ୱ ନେବା ନେଇ ଚନ୍ଦ୍ରଶେଖରନ ନିଜେ ମଧ୍ୟ ଅନିଚ୍ଛା ପ୍ରକାଶ କରିଥିବା ଚର୍ଚ୍ଚା ହୋଇଥିଲା। ଫଳରେ ଟାଟା ଗ୍ରୁପ୍ର ପରବର୍ତ୍ତୀ ମୁଖ୍ୟ କିଏ ହେବେ, ସେନେଇ ଅନେକ ଆଲୋଚନା ହେଉଥିଲା। ବୋର୍ଡର ନିଷ୍ପତ୍ତି ପରେ ଏବେ ସେସବୁ ଚର୍ଚ୍ଚାରେ ବିରାମ ଲାଗିଛି।