ମଧ୍ୟପ୍ରଦେଶ: ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ମୋହନ ଯାଦବଙ୍କୁ ହତ୍ୟା ଧମକ ଦେବା ଘଟଣାର ତଦନ୍ତରେ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି। ନିଜ ବାପାଙ୍କୁ ପୋଲିସ ଦ୍ୱାରା ଗିରଫ କରାଇବା ପାଇଁ ଅଭିଯୁକ୍ତ ଏଭଳି ଧମକ ଦେଇଥିବା ପୋଲିସ ତଦନ୍ତରୁ ଜଣାପଡ଼ିଛି। ଘଟଣାରେ ବୁରହାନପୁରରୁ ଜଣେ ବ୍ୟକ୍ତିଙ୍କୁ ଗିରଫ କରାଯାଇଛି।
ବୁଧବାର ସକାଳ ପ୍ରାୟ ୧୧ଟା ୩୦ରେ ‘ଡାଏଲ୍-୧୧୨’ର ଅଧିକୃତ ହ୍ୱାଟ୍ସଆପ୍ ନମ୍ବରକୁ ଏକ ଧମକପୂର୍ଣ୍ଣ ବାର୍ତ୍ତା ଆସିଥିଲା। ଏଥିରେ ମୁଖ୍ୟମନ୍ତ୍ରୀ ମୋହନ ଯାଦବଙ୍କୁ ହତ୍ୟା କରିବା ନେଇ ଧମକ ଦିଆଯାଇଥିଲା। ଅଭିଯୁକ୍ତ ବାର୍ତ୍ତାକୁ ଡିଲିଟ୍ କରିବା ପୂର୍ବରୁ ଦୁଇଥର ସଂଶୋଧନ କରିଥିଲେ ମଧ୍ୟ ଡାଏଲ୍-୧୧୨ କର୍ମଚାରୀମାନେ ଏହାର ସ୍କ୍ରିନ୍ସଟ୍ ନେଇଥିଲେ। ଘଟଣା ପରେ ଭୋପାଳ ପୋଲିସ କମିଶନରଙ୍କ ନିର୍ଦ୍ଦେଶରେ କ୍ରାଇମ୍ ବ୍ରାଞ୍ଚ ଓ ସାଇବର ଟିମ୍ ତଦନ୍ତ ଆରମ୍ଭ କରିଥିଲା।
ବୈଷୟିକ ତଦନ୍ତରୁ ଧମକ ପଠାଯାଇଥିବା ସ୍ଥାନର ସୁରାକ ମିଳିବା ପରେ ପୋଲିସ ବୁରହାନପୁରରେ ପହଞ୍ଚି ଅଭିଯୁକ୍ତକୁ ଧରିଥିଲା। ପଚରାଉଚରା ବେଳେ ଜଣାପଡ଼ିଥିଲା ଯେ ଅଭିଯୁକ୍ତଙ୍କର ନିଜ ବାପାଙ୍କ ସହ ବିବାଦ ଥିଲା। ତାଙ୍କୁ ଫସାଇ ପୋଲିସ ହାତରେ ଗିରଫ କରାଇବା ପାଇଁ ସେ ଏହି ଯୋଜନା କରିଥିଲେ। ଏଥିପାଇଁ ସେ ମୁମ୍ବାଇର ଜଣେ କ୍ୟାଟରିଂ ବ୍ୟବସାୟୀଙ୍କ ମୋବାଇଲ ଚୋରି କରିଥିଲେ ଏବଂ ଚୋରି ଫୋନରେ ସିମ୍ ପକାଇ ଧମକପୂର୍ଣ୍ଣ ବାର୍ତ୍ତା ପଠାଇଥିଲେ।
ତଦନ୍ତରୁ ଅଭିଯୁକ୍ତଙ୍କ ପୂର୍ବ ରେକର୍ଡ ମଧ୍ୟ ସାମ୍ନାକୁ ଆସିଛି। ସେ ପୂର୍ବରୁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀଙ୍କୁ ମଧ୍ୟ ଧମକ ଦେଇଥିବା ପୋଲିସ କହିଛି। ବର୍ତ୍ତମାନ ତାଙ୍କର ପୂର୍ବ ଅପରାଧିକ କାର୍ଯ୍ୟକଳାପ ସମ୍ପର୍କରେ ପୋଲିସ ତଦନ୍ତ ଜାରି ରଖିଛି।