ତାଲିବାନ ବିରୋଧରେ ଏକାଠି ହେଲେ ଆଫଗାନ ସେନା। ହେଲିକପ୍ଟରରେ ପହଞ୍ଚିଲା ଅସ୍ତ୍ରଶସ୍ତ୍ର। ତାଲିବାନ ବିରୋଧରେ ଜୋରଦାର ହେବ ଲଢେଇ।ଆଫଗାନିସ୍ତାନ ପଞ୍ଜଶୀର ପ୍ରଦେଶ ଦଖଲ ଲାଗି ଜୋରଦାର ପ୍ରୟାସ କରୁଛି ତାଲିବାନ। ହେଲେ ରିପୋର୍ଟ ଲେଖାହେବା ପର୍ଯ୍ୟନ୍ତ ପଞ୍ଜଶୀରକୁ କବଜାକୁ ନେବାରେ ସଫଳ ହୋଇପାରିନାହିଁ।
ଅହମ୍ମଦ ମାସୁଦଙ୍କ ନେତୃତ୍ୱାଧୀନ ନର୍ଦ୍ଦନ ଆଲାଏନ୍ସ ତାଲିବାନକୁ କଡା ଜବାବ ଦେଉଛନ୍ତି। ନର୍ଦ୍ଦନ ଆଲାଏନ୍ସ ଆକ୍ରମଣରେ ୩ ଶହରୁ ଅଧିକ ତାଲିବାନୀଙ୍କ ମୃତ୍ୟୁ ହୋଇଥିବା କୁହାଯାଉଛି। ଆଫଗାନିସ୍ତାନର ପୂର୍ବତନ ରାଷ୍ଟ୍ରପତି ଅମ୍ରୁଲା ସାଲେ୍ହ ମଧ୍ୟ ନିଜ ଲୋକଙ୍କ ସହ ସେଠାରେ ପହଞ୍ଚି ସାରିଛନ୍ତି।
ତାଲିବାନ ବିରୋଧରେ ଲଢେଇ ପାଇଁ ଏବେ ନର୍ଦ୍ଦନ ଆଲାଏନ୍ସ ଆହୁରି ଶକ୍ତିଶାଳୀ ହୋଇଯାଇଛି। ଆଫଗାନ ସେନାର ପୂର୍ବ କମାଣ୍ଡର ଏବେ ପଞ୍ଜଶୀରରେ ଉପସ୍ଥିତ ଅଛନ୍ତି। ସେ ନର୍ଦ୍ଦନ ଆଲାଏନ୍ସ ସହ ତାଲିବାନ ବିରୋଧରେ ଲଢେଇ ପାଇଁ ହାତ ମିଳାଇଛନ୍ତି।
ରିପୋର୍ଟ ଅନୁସାରେ , ତାଲିବାନ ବିରୋଧରେ ଲଢେଇ ପାଇଁ ପୂର୍ବ ଉପରାଷ୍ଟ୍ରପତି ଅହମଦ ଜିୟା ମାସୁଦ ଏବଂ ନର୍ଦ୍ଦନ ଆଲାଏନ୍ସର ପୂର୍ବତନ କମାଣ୍ଡର ଅମାନୁଲ୍ଲହା ଗୁଲଜାର ପଞ୍ଜଶୀରରେ ପହଞ୍ଚିଛନ୍ତି। ତାଜିକିସ୍ତାନରୁ ହେଲିକପ୍ଟର ମାଧ୍ୟମରେ ଉଭୟ ପହଞ୍ଚି ସାରିଛନ୍ତି। ତାଜିକିସ୍ତାନରୁ ହେଲିକପ୍ଟର ମାଧ୍ୟମରେ ଅସ୍ତ୍ରଶସ୍ତ୍ର ପହଞ୍ଚିସାରିଛି। ତାଙ୍କ ସହ ତାଙ୍କ ସମର୍ଥକ ବି ପହଞ୍ଛିଛନ୍ତି।
ସମସ୍ତେ ଏବେ ଅହମଦ ମାସୁଦର ନର୍ଦ୍ଦନ ଆଲାଏନ୍ସକୁ ସହାୟତା କରିବେ। ତାଲିବାନ ଆଫଗାନସ୍ତାନର ସମସ୍ତ ପ୍ରାନ୍ତକୁ କବଜା କରିଥିବା ବେଳେ ପଞ୍ଜଶୀରକୁ କିନ୍ତୁ କବଜା କରିବାରେ ସକ୍ଷମ ହୋଇନାହିଁ । ପଞ୍ଜଶୀର, ଅନ୍ଦ୍ରାବ, ବାଗଲାନ ସମେତ କିଛି ଅଂଚଳରେ ନର୍ଦ୍ଦନ ଆଲାଏନ୍ସ ତାଲିବାନକୁ କଡା ଜବାବ ଦେଉଛନ୍ତି । ୩୦୦ରୁ ଅଧିକ ତାଲିବାନ ଆକ୍ରମଣରେ ନିପାତ ହୋଇଥିବା ସୂଚନା ମିଳିଥିବା ବେଳେ ତାଲିବାନକୁ ଏକ ବଡ଼ ଝଟକା ଲାଗିଛି ।