କାହାକୁ ରାଜନୀତିର ତୀର ମାରିଲେ ନବୀନ

କ୍ରୀଡାର ବିକାଶ ପାଇଁ ଓଡ଼ିଶାର ପୁରସ୍କୃତ
ସୋର୍ଟସ ଷ୍ଟାର ପୁରସ୍କାର ଆଣିଲେ ନବୀନ
ଭୁବନେଶ୍ୱର: ରାଜନୀତିରେ କ୍ଷମତା ପାଇଁ ଝୁଙ୍କ୍‍ ବିଜୟୀ କରିବ । କିନ୍ତୁ ସେବା ପାଇଁ ଝୁଙ୍କ୍‍ ଦ୍ୱାରା ଲୋକଙ୍କ ହୃଦୟ ଜିତିହେବ ।
ଖେଳ ସହିତ ରାଜନୀତିକୁ ଫେଣ୍ଟାଫେଣ୍ଟି କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ମୁମ୍ୱାଇରେ ଯେଉଁ ତୀର ମାରିଛନ୍ତି, ତାହା ଜାତୀୟ ରାଜନୀତିରେ ଆଲୋଡନ ସୃଷ୍ଟି କଲାଭଳି । କାହାର ନାଁ ନେଇନାହାନ୍ତି । କିନ୍ତୁ କେଉଁଠିନା କେଉଁଠି ନବୀନଙ୍କ ମନ୍ତବ୍ୟ କେନ୍ଦ୍ରର ବିଜେପି ସରକାରଙ୍କ କ୍ଷମତା ଦଖଲ ନିଶା ଆଡକୁ ଆଙ୍ଗୁଠି ଦେଖାଉଛି । ସମାନ୍ତରାଳ ଭାବେ ଓଡ଼ିଶାରେ ଲୋକଙ୍କ ସେବା କରିବାକୁ ସେ ଯେଉଁ ସଂକଳ୍ପ ନେଇଛନ୍ତି, ତାହା ଦ୍ୱାରା ଲୋକଙ୍କ ହୃଦୟ ଜିତିଛନ୍ତି ଓ ବିଜେଡି ବାରମ୍ୱାର ଶାସନକୁ ଆସିବା ପଛର ଏହା ହିଁ ରାଜ ବୋଲି ନବୀନ ପରୋକ୍ଷରେ ବିଜେଡି-ବିଜେପିର ତୁଳନାତ୍ମକ ଚିତ୍ର ରଖି ସୂଚାଇଛନ୍ତି ।
ଏଥିସହିତ ପୁରୁଷ ହକି ବିଶ୍ୱକପ୍‍ ଆୟୋଜନ ପାଇଁ ଓଡ଼ିଶାକୁ ଆଜି ସ୍ୱୀକୃତି ମିଳିଛି । କ୍ରୀଡାର ବିକାଶ ପାଇଁ ସର୍ବୋତ୍ତମ ରାଜ୍ୟ ଭାବେ ଓଡ଼ିଶା ସମ୍ମାନିତ ହୋଇଛି । ସ୍ପୋର୍ଟସ ଷ୍ଟାର କ୍ରୀଡା ପ୍ରତିକା ପକ୍ଷରୁ ମୁମ୍ୱାଇରେ ଆୟୋଜିତ ଏକ ସ୍ୱତନ୍ତ୍ର ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟ ତରଫରୁ ଏହି ପୁରସ୍କାର ଗ୍ରହଣ କରିଥିଲେ । ବିଶ୍ୱ ଚାମ୍ପିଅନ୍‍ ବିଶ୍ୱନାଥ ଆନନ୍ଦ ମୁଖ୍ୟମନ୍ତ୍ରୀଙ୍କୁ ପୁରସ୍କାର ପ୍ରଦାନ କରିଥିଲେ ।
ରାଜନୀତିରେ କ୍ରୀଡାର ଭାଷା ସଂପର୍କରେ ଠାରି ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ, ଆଜି ହେଉଛି ଏକ ବ୍ୟତିକ୍ରମ, ଯେଉଁଠାରେ ସେ କ୍ରୀଡା ପାଇଁ ପୁରସ୍କାର ଗ୍ରହଣ କରୁଛନ୍ତି । ହେଲେ ରାଜନୀତି ଠାକୁ କ୍ରୀଡା ବେଶୀ ଅଲଗା ନୁହେଁ । ଦୌଡିବା, ଡେଇଁବା, ଧରିବା, ଫୋପାଡିବା, ଆଦି ସବୁକିଛି କରିବାକୁ ପଡିଥାଏ । ବେଳେବେଳେ ଆମେ ଜାଣିନଥାନ୍ତି ଯେ ଆମେ କେଉଁ ଦିଗରେ ଦୌଡୁଛନ୍ତି ।ବେଳେବେଳେ ଆପଣ ଫୋଫାଡିବେ ଓ ବେଳେ ଅନ୍ୟମାନେ ଆପଣଙ୍କୁ ଫୋଫାଡି ଦେବେ ।
ଉଭୟ ଖେଳ ଓ ରାଜନୀତିରେ ସଫଳ ହେବା ପାଇଁ ଝୁଙ୍କ୍‍ ଦରକାର । ଖେଳରେ ଜିତିବା ପାଇଁ ଝୁଙ୍କ୍‍ ବିଜୟ ମୁକୁଟ ଦେବ । ଖେଳ ପାଇଁ ଝୁଙ୍କ୍‍ ଆଇକନ କରି ପ୍ରତିଷ୍ଠିତ କରାଇବ । ରାଜନୀତିରେ ବି ସେୟା । କ୍ଷମତା ପାଇଁ ଝୁଙ୍କ୍‍ ବିଜୟୀ କରିବ । କିନ୍ତୁ ସେବା ପାଇଁ ଝୁଙ୍କ୍‍ ଦ୍ୱାରା ଲୋକଙ୍କ ହୃଦୟ ଜିତିପାରିବେ । ପ୍ରତିଯୋଗିତା ମନୋଭାବ ଉଭୟ କ୍ଷେତ୍ରରେ ମାନକ । ଏଭଳି ମନୋଭାବ ବ୍ୟତିରେକେ ଆମେ ସଫଳତା ଲାଭ କରିପାରିବା ନାହିଁ ।
ଓଡ଼ିଶାର କଚ୍ଚା ଘରକୁ ପକ୍କା ଘର କରିବା ଲାଗି ସରକାରଙ୍କ ସଂକଳ୍ପ କିଭଳି ସାଧିତ ହୋଇଛି, ତାର ଉଦାହରଣ ରଖି ମୁଖ୍ୟମନ୍ତ୍ରୀ କହିଥିଲେ, ୫ବର୍ଷରେ ୫ଲକ୍ଷ ଘର ନିର୍ମାଣ କରୁଥିଲୁ । କିନ୍ତୁ ସେହି ସମୟରେ ୨୦ଲକ୍ଷ ଘର ନିର୍ମାଣ ଆହ୍ୱାନ ଥିଲା । ଏଥିପାଇଁ ଜିଲ୍ଲାମାନଙ୍କ ଭିତରେ ପ୍ରତିଯୋଗିତା ମନୋଭାବ ସୃଷ୍ଟି କରାଯାଇଥିଲା । ଫଳସ୍ୱରୂପ, ନିର୍ଦିଷ୍ଟ ସମୟରେ ୨୦ଲକ୍ଷ ଲୋକଙ୍କୁ ଆଶ୍ରୟ ନିରାପତ୍ତା ଦିଆଯାଇପାରିଲା ।
କ୍ରୀଡାର ବିକାଶ ପାଇଁ ହିନ୍ଦୁ ଖବରକାଗଜ ପୁରସ୍କାର ପ୍ରଦାନ ଆରମ୍ଭ କରିଥିବାରୁ ନବୀନ ଧନ୍ୟବାଦ ଜଣାଇଥିଲେ ଓ କହିଥିଲେ, ଏହାଦ୍ୱାରା ଆଗାମୀ ଦିନରେ ପ୍ରତିଯୋଗିତା ଆହୁରି ତୀବ୍ର ହେବ । ଯିଏ ଜିତୁ ବା ହାରୁ, ଖେଳ ଓ ଖେଳର ବିକାଶ ହିଁ ବିଜୟୀ ହେବ । ହିନ୍ଦୁର ଏହି ପ୍ରେରଣାଦାୟୀ କାର୍ଯ୍ୟ ପାଇଁ ସେ ଧନ୍ୟବାଦ ଜଣାଇଥିଲେ ।
ମୁଖ୍ୟମନ୍ତ୍ରୀ କହିଥିଲେ, କ୍ରୀଡା ପାଇଁ ପୁଞ୍ଜି ବିନିଯୋଗ ହେଉଛି, ଯୁବଶକ୍ତିର ବିକାଶ ପାଇଁ ପ୍ରକୃତ ବିନିଯୋଗ । ଯୁବଶକ୍ତି ପାଇଁ ପୁଞ୍ଜି ବିନିଯୋଗ ହେଉଛି ଭବିଷ୍ୟତ ପାଇଁ ବିନିଯୋଗ । ଦେଶର କ୍ରୀଡାର ବିକାଶ ପାଇଁ ରାଜ୍ୟମାନଙ୍କ ଉଦ୍ୟମ ବା ସଂପୃକ୍ତି ସବୁଠାରୁ ଗୁରୁତ୍ୱପୂର୍ଣ୍ଣ ।
ଓଡ଼ିଶାର ହକି ସଂପର୍କରେ ଠାରି ମୁଖ୍ୟମନ୍ତ୍ରୀ କହିଥିଲେ, ପ୍ରତ୍ୟେକ ରାଜ୍ୟ ଏବଂ ରାଜ୍ୟର ବାସିନ୍ଦାମାନେ ଏକ ନିର୍ଦିଷ୍ଟ ଖେଳ ପ୍ରତି ବିଶେଷ ଆଗ୍ରହ ଦେଖାଇଥାନ୍ତି । ଓଡ଼ିଶା ସରକାର ପୁରୁଷ ଓ ମହିଳା ହକି ଦଳର ସରକାରୀ ପ୍ରାୟୋଜକ ଦାୟିତ୍ୱ ନେଇଛନ୍ତି । ଯଦି ରାଜ୍ୟମାନେ ଗୋଟିଏ ବା ଦୁଇଟି ଖେଳର ଉନ୍ନତି ପାଇଁ ଆଗ୍ରହ ପ୍ରକାଶ କରନ୍ତି, ତେବେ ଦେଶରେ କ୍ରୀଡା ପରିବେଶ ବିପୁଳ ଭାବରେ ଲାଭବାନ ହେବ ।
ଏହି ଅବସରରେ ମୁଖ୍ୟମନ୍ତ୍ରୀ କହିଥିିଲେ, ଅଲମ୍ପିକ୍‍ ପଦକ ମଞ୍ଚରେ ଭାରତୀୟ ଜାତୀୟ ସଂଗୀତ ବାଦନ ପାଇଁ ଆମକୁ ଆଉ ବେଶୀ ଦିନ ଅପେକ୍ଷା କରିବାକୁ ପଡିବ ନାହିଁ ।
ପ୍ରକାଶଥାଉକି, ଭାରତୀୟ କ୍ରିକେଟ୍‍ ଦଳର ପୂର୍ବତନ ଅଧିନାୟକ ସୁନୀଲ ଗାଭାସ୍କର, ହିନ୍ଦୁ ଗ୍ରୁପର ଅଧ୍ୟକ୍ଷ ଏନ୍‍ ରାମ, ପୂର୍ବତନ ହକି କ୍ୟାପଟେନ୍‍ ଏମ୍‍ ଏମ୍‍ ସୋମେୟା, ଅଲମ୍ପିଆନ୍‍ ଅଞ୍ଜଳି ଭଗତ ଓ ଅଞ୍ଜୁ ବବି ଜର୍ଜ ଜୁରି ଥିଲେ । ହିନ୍ଦୁ ଗ୍ରୁପ ପକ୍ଷରୁ ପ୍ରଥମ ଥର ପାଇଁ ଏକ ରାଜ୍ୟକୁ କ୍ରୀଡାର ସାମଗ୍ରିକ ବିକାଶ ପାଇଁ ପୁରସ୍କାର ପ୍ରଦାନ କରାଯାଇଛି ।