ଟିକେଟ୍‍ ଚର୍ଚ୍ଚାରେ ତିନି ମହିଳା

ଭୁବନେଶ୍ୱର: ରାଣୀ ସୁଜ୍ଞାନ କୁମାରୀ ଦେଓ ପାଞ୍ଚଦଶନ୍ଧିରୁ ଅଧିକ ଦିନ ପାଇଁ ଲୋକ ପ୍ରତିନିଧି ରହିଆସିଥିଲେ । ରାଣୀ ଏଥର ପ୍ରାର୍ଥୀ ହେବା ସମ୍ଭାବନୀ କ୍ଷୀଣ । ଚିକିଟିକୁ ପ୍ରତିନିଧିତ୍ୱ କରି ଆସୁଛନ୍ତି ରାଣୀ ଉଷା ଦେବୀ । ତାଙ୍କୁ ବିଜେଡି ଟିକେଟ୍‍ ଦେବା ସମ୍ଭାବନା ଅଧିକ । ସାନଖେମୁଣ୍ଡି ଆସନରୁ ରାଣୀ ନନ୍ଦିନୀ ଦେବୀ ଏବେ ବିଧାୟିକା । ତାଙ୍କୁ ଟିକେଟ୍‍ ଦିଆଯିବ କି ନାହିଁ ବିଜେଡି ଦ୍ୱନ୍ଦ୍ୱରେ ଅଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସଂସଦ ଓ ବିଧାନସଭାରେ ୩୩ ପ୍ରତିଶତ ସଂରକ୍ଷଣ ନେଇ ଆହ୍ୱାନ ଦେବା ପରେ ତାଙ୍କ ଜିଲ୍ଲା ଗଞ୍ଜାମ ସୂଚାଉଛି ଯେ ଏହାର ଢେର୍‍ ପ୍ରଭାବ ପଡିଛି । ଓଡ଼ିଶାର ଅନ୍ୟ ସବୁ ଅଞ୍ଚଳ ଭଳି ଗଞ୍ଜାମ ଜିଲ୍ଲା ରାଜନୀତିରେ ଏବେ ଆଉ ତିନି ମହିଳା ନେତୃତ୍ୱସାମ୍ନାକୁ ଆସିଗଲେଣି । ଏହି ତିନି ଜଣ ବିଜେଡି ପାଇଁ ଟିକେଟ୍‍ ଆଶାୟୀ ଓ ଆସନ୍ତା ନିର୍ବାଚନରେ ଦଳ ତାଙ୍କୁ ପ୍ରାର୍ଥୀ କରିବା ସମ୍ଭାବନାକୁ ଏଡାଇ ଦେଇ ହେବ ନାହିଁ ।
ବିଶ୍ୱସ୍ତ ସୂତ୍ରରୁ ମିଳୁଥିବା ଖବର ଅନୁସାରେ, ନିତ୍ୟାନନ୍ଦ ପ୍ରଧାନଙ୍କ ଝିଅ ଲତିକା ପ୍ରଧାନ ଏବେ ନିର୍ବାଚନ ମଇଦାନରେ ଉଭା ହୋଇଛନ୍ତି । ସାନଖେମୁଣ୍ଡିରେ ସଂଗଠନକୁ ଏଭଳି ଢଙ୍ଗରେ ଆଗକୁ ନେଉଛନ୍ତି, ଯେମିତିକି ସେ ନନ୍ଦିନୀଙ୍କୁ ଏଥର ତଡିଦେବେ । ଏହାକୁ ନେଇ ଚର୍ଚ୍ଚା ସରିନି, ହଠାତ୍‍ ଦକ୍ଷିଣ ଓଡ଼ିଶାରେ ଦୁଇଟି ନୂଆ ମୁହଁ ରାଜ୍ୟ ରାଜନୀତିକୁ ଆସିବା ଲାଗି ଆଗ୍ରହ ଦେଖାଇଲେଣି ।
ଜଣେ ହେଉଛନ୍ତି ପାରଳା ରାଜକୁମାରୀ କଲ୍ୟାଣୀ ଦେବୀ । ପୂର୍ବତନ ସାଂସଦ ଗୋପୀନାଥ ଗଜପତିଙ୍କ ଝିଅ କଲ୍ୟାଣୀ ଆସନ୍ତା ୨୬ତାରିଖ ଦିନ ବିଜେଡିରେ ଯୋଗଦେବାର କାର୍ଯ୍ୟକ୍ରମ ରହିଛି । ନିକଟରେ ତାଙ୍କ ରାଜବାଟୀ ପ୍ରବେଶ ସୂଚାଇ ଦେଇଥିଲା ଯେ ସେ ରାଜନୀତି ପ୍ରତି ଅାଗ୍ରହ ରଖି ଘରକୁ ଫେରିଛନ୍ତି । ପୂର୍ବତନ ଜିଲ୍ଲା ବିଜେଡି ସଭାପତି ବସନ୍ତ ଦାଶ ଏ ନେଇ ଶନିବାର ଗଣମାଧ୍ୟମକୁ ସୂଚନା ଦେବା ପରେ ଗଞ୍ଜାମ ଜିଲ୍ଲା ରାଜନୀତି ରୋଚକ ମୋଡ ନେଇଛି ।
ଏପଟେ ଗୋପାଳପୁର ବିଧାୟକ ଡାକ୍ତର ପ୍ରଦୀପ ପାଣିଗ୍ରାହୀ ଏଥର ଟିକେଟ୍‍ ନ ପାଇବା ସମ୍ଭାବନା ଅଧିକ । ଦୁଇଥରିଆ ଏହି ବିଧାୟକଙ୍କ ଲୋକପ୍ରିୟତା ଯଥେଷ୍ଟ କମିଛି । ପ୍ରଦୀପଙ୍କ ଭବିଷ୍ୟତ ନେଇ ଗଣମାଧ୍ୟମରେ ଚର୍ଚ୍ଚା ଆଲୋଚନା ଜୋର ଧରିଥିବା ବେଳେ ହଠାତ୍‍ ୨୨ ତାରିଖ ଦିନ ଗୋପାଳପୁର ନିର୍ବାଚନମଣ୍ଡଳୀରେ ଏକ ନୂଆକଥା ଦେଖିବାକୁ ମିଳିଛି । ଗଞ୍ଜାମ ରଙ୍ଗେଇଲୁଣ୍ଡାରେ ୬ କୋଟି ୧୩ଲକ୍ଷ ଟଙ୍କାର ଏକ ପ୍ରକଳ୍ପ ଶୁଭ ଦେବା କାର୍ଯ୍ୟକ୍ରମରେ ବିଧାୟକଙ୍କ ସହିତ ହଠାତ୍‍ ତାଙ୍କ ପତ୍ନୀ ସୁଜାତା ପାଣିଗ୍ରାହୀ ଆବିର୍ଭାବ ହୋଇଥିଲେ । ସୁଜାତାଙ୍କ ଉପସ୍ଥିତି ବିଧାୟକ ଟିକେଟ୍‍ ନ ପାଇବା ଆଶଙ୍କାକୁ ବଢାଇ ଦେଇଛି । ସମ୍ଭବତଃ ଶ୍ରୀ ପାଣିଗ୍ରାହୀ ନିଜ ସ୍ଥାନରେ ପତ୍ନୀଙ୍କ ଟିକେଟ୍‍ ପାଇଁ ସବୁଜ ସଙ୍କେତ ପାଇଥାଇପାରନ୍ତି ବୋଲି ଚର୍ଚ୍ଚା ଆରମ୍ଭ ହୋଇଗଲାଣି ।