ସଂକଳ୍ପ ପତ୍ର ଜାରି କଲା ବିଜେପି
ସରକାରକୁ ଆସିଲେ ଗରିବି ହଟିବ
ଚିଟଫଣ୍ଡ ଠକଙ୍କ ବିରୋଧରେ କାର୍ଯ୍ୟାନୁଷ୍ଠାନ
ସବୁ ଜିଲ୍ଲାରେ ମେଡିକାଲ କଲେଜ
ନବୀନଙ୍କୁ ସମାଲୋଚନା କଲେ ଶାହ
ଭୁବନେଶ୍ୱର:୨୦୧୯ ନିର୍ବାଚନକୁ ନିଜ ପକ୍ଷକୁ ନେବା ଲାଗି ଆଜି ଭାରତୀୟ ଜନତା ପାର୍ଟି ଇସ୍ତାହାର ପ୍ରକାଶ କରିଛି । ୯ଟି ବଛା ବଛା କ୍ଷେତ୍ର ଚିହ୍ନଟ କରି ସେ ସଂକ୍ରାନ୍ତରେ ସଂକଳ୍ପ ଜାରି କରିଛି । ଭୁବନେଶ୍ୱରର ଏକ ଘରୋଇ ହୋଟେଲରେ ଦଳର ରାଷ୍ଟ୍ରୀୟ ସଭାପତି ଅମିତ ଶାହ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ପ୍ରମୁଖଙ୍କ ଉପସ୍ଥିତିରେ ବିଜେପିର ନିର୍ବାଚନୀ ଇସ୍ତାହାର ବା ସଂକଳ୍ପ ପତ୍ର ଲୋକାର୍ପିତ ହୋଇଥିଲା । ଏହି ଅବସରରେ ଶ୍ରୀ ଶାହ ରାଜ୍ୟ ସରକାରଙ୍କୁ କଡ଼ା ସମାଲୋଚନା କରିଥିଲେ ।
୨୦୧୯ ନିର୍ବାଚନ ପାଇଁ ଜାରିି ଏହି ଇସ୍ତାହାରରେ ବିଜେପି ପ୍ରତିଶ୍ରୁତି ଦେଇଛି ଯେ ଚିଟ୍ଫଣ୍ଡ ଠକେଇ ଘଟଣାର ତଦନ୍ତ କରାଯିବ ଓ କ୍ଷତିଗ୍ରସ୍ତଙ୍କୁ ଅର୍ଥ ଫେରସ୍ତ ହେବ । ଚିଟ୍ଫଣ୍ଡ ଠକଙ୍କୁ କଠୋରରୁ କଠୋର ଦଣ୍ଡ ଦିଆଯିବ । ଦଳ ଯଦି କ୍ଷମତାକୁ ଆସେ, ତେବେ ଆୟୁଷ୍ମାନ ଯୋଜନା ଲାଗୁ କରିବ ଓ ପ୍ରଧାନମନ୍ତ୍ରୀ କିଷାନ ଯୋଜନା ବି । ୩ମାସ ମଧ୍ୟରେ ପେସା ଆଇନ ଲାଗୁ କରାଯିବା ସହିତ ରାଜ୍ୟରୁ ଗରିବି ସବୁଦିନ ପାଇଁ ହଟାଇ ଦିଆଯିବ । କେବଳ ସେତିକି ନୁହେଁ, ଦୁଷ୍କର୍ମ ମାମଲାରେ ଦୋଷୀଙ୍କୁ ମୃତ୍ୟୁ ଦଣ୍ଡରେ ଦଣ୍ଡିତ କରିବା ଲାଗି ଆବଶ୍ୟକ ବ୍ୟବସ୍ଥା କରାଯିବ ।
ବିଜେପିି ପ୍ରତିଶ୍ରୁତି ଦେଇଛି ଯେ ଦଳ ଯଦି ସରକାରକୁ ଆସେ, ତେବେ ୨ ବର୍ଷ ଭିତରେ ସମସ୍ତ ବେକାରିଙ୍କୁ ଚାକିରି ମିଳିବ । ୫ ବର୍ଷରେ ୨୦ଲକ୍ଷ ପିଲାଙ୍କୁ ଦକ୍ଷତା ବିକାଶ ତାଲିମ ପ୍ରଦାନ ଦିଗରେ ପଦକ୍ଷେପ ନିଆଯିବ । ରାଜ୍ୟର ସବୁ ଜିଲ୍ଲାରେ ପିପିପି ଭିତ୍ତିରେ ମେଡିକାଲ କଲେଜ ଖୋଲିଯିବ ଓ ୫ଟି ହାଇଟେକ୍ ମେଡିକାଲ ସେଣ୍ଟର ବି । ୨୦୨୨ ସୁଦ୍ଧା ସମସ୍ତଙ୍କୁ ଘର, ବିଜୁଳି, ପାଣି ପ୍ରଦାନ କରାଯିବ । ପୁରୀକୁ ଦେଶର ସାଂସ୍କୃତିକ ରାଜଧାନୀରେ ପରିଣତ କରାଯିବ ।
ରାଜ୍ୟରୁ ଭ୍ରଷ୍ଟାଚାର ଓ ଗୁଣ୍ଡାଗର୍ଦିର ଖତମ କରାଯିବ ବୋଲି ପ୍ରତିଶ୍ରୁତି ଦେଇ ବିଜେପି ଆହୁରି କହିଛି ଯେ ଓଡ଼ିଆ ଭାଷାରେ ହିଁ ଓଡ଼ିଶାରେ ଶାସନ ବ୍ୟବସ୍ଥା କରାଯିବ । ସେହିଭଳି ସବୁ ଗରିବଙ୍କୁ ଜମି ପଟ୍ଟା ପ୍ରଦାନ କରାଯିବ ।
ଏହି ଅବସରରେ ଶ୍ରୀ ଶାହ ରାଜ୍ୟ ସରକାରଙ୍କୁ ଅତ୍ୟନ୍ତ କଡା ଭାଷାରେ ସମାଲୋଚନା କରି କହିଥିଲେ ଯେ ବିଜେଡି ଶାସନ କଂଗ୍ରେସ ଠାରୁ ମଧ୍ୟ ନିକୃଷ୍ଟ, ଏକଥା କହିବାକୁ ମୋର ଦ୍ୱିଧା ନାହିଁ । ବାସ୍ତବ କଥା ହେଲା, ବିଜେଡି ସରକାରରେ ନବୀନ କେବଳ ଆଗରେ ଅଛନ୍ତି ଓ ପଛରେ ବାବୁମାନେ ରହି ଶାସନ କରୁଛନ୍ତି । ଦୂରଦୃଷ୍ଟିର ଅଭାବ, ଦୁର୍ନୀତି ଓ ଆଳସ୍ୟ କାରଣରୁ ଓଡ଼ିଶା ପତନାଭିମୁଖୀ ହେବା ଆରମ୍ଭ କରିଛି । ନିଜେ ନବୀନ ସହଯୋଗୀଙ୍କୁ ସମ୍ମାନ କରନ୍ତି ବରଂ ସାଥୀଙ୍କୁ ପଛରୁ ଛୁରୀ ଭୁଷନ୍ତି । ଯିଏ ବିକଳ୍ପ ଭାବେ ମୁଣ୍ଡ ଟେକନ୍ତି, ତାଙ୍କୁ ଦଳରୁ ବିଦା କରିଦିଅନ୍ତି ।
ବିଜେପିର ଏହି କାର୍ଯ୍ୟକ୍ରମରେ ରାଜ୍ୟ ପ୍ରଭାରୀ ଅରୁଣ ସିଂହ, ବରିଷ୍ଠ ନେତା ବିଜୟ ମହାପାତ୍ର, ବିଶ୍ୱଭୂଷଣ ହରିଚନ୍ଦନ ପ୍ରମୁଖ ଉପସ୍ଥିତ ଥିଲେ ।