- ବିଜେପି ଅନ୍ତଃକନ୍ଦଳ ଦାଣ୍ଡରେ ପଡ଼ି ହାଟରେ ଗଡ଼ିଲାଣି
- ତିନିଭାଗରେ ବିଭକ୍ତ ହେଲାଣି ରାଜ୍ୟ ବିଜେପି ସଂଗଠନ
- ୟେଦୁରପ୍ପାଙ୍କ ଚୌକି ଦୋହଲୁଛି, କ୍ୟାମ୍ପ କରିଛନ୍ତି ଅରୁଣ
- ରାଷ୍ଟ୍ରପତି ଶାସନ ଦାବିରେ ରାଜ୍ୟପାଳଙ୍କୁ ଭେଟିଲେ ବିରୋଧୀ
ନୂଆଦିଲ୍ଲୀ: କର୍ଣ୍ଣାଟକରେ ମୌସୁମୀ ଜନିତ ପାଣିପାଗକୁ ବଳାଇଗଲାଣି ରାଜନୀତି ଝଡ଼। ମୁଖ୍ୟମନ୍ତ୍ରୀ ବି ଏସ୍ ୟେଦୁରପ୍ପା ସରକାରରେ କୌଣସି ପରିସ୍ଥିତିରେ ବି ସ୍ଥିରତା ଆସୁନାହିଁ। କ୍ଷମତାକୁ ନେଇ ସ୍ଥାନୀୟ ବିଜେପି ଏବେ ତିନି ଭାଗରେ ବିଭକ୍ତ ହୋଇଯାଇଛି। ସ୍ଥିତି ଏତେ ଗମ୍ଭୀର ଯେ କୋଭିଡ୍-୧୯ ପରବର୍ତ୍ତୀ ପରିସ୍ଥିତିରେ ସମସ୍ତ ବିକାଶମୂଳକ କାର୍ଯ୍ୟ ପୂରା ଠପ୍ ହୋଇଯାଇଛି। ପରିସ୍ଥିତିକୁ ଆୟତ୍ତ କରିବା ଲାଗି କର୍ଣ୍ଣାଟକ ଦାୟିତ୍ବରେ ଥିବା ବିଜେପି ନେତା ଅରୁଣ ସିଂହ ସେଠାରେ କ୍ୟାମ୍ପ କରିଛନ୍ତି। ତଥାପି ଏହାର ସାମାନ୍ୟତମ ପ୍ରଭାବ ପଡ଼ୁନାହିଁ। ୭୮ ବର୍ଷୀୟ ମୁଖ୍ୟମନ୍ତ୍ରୀ ଓ ତାଙ୍କ ପୁଅ ବିଜୟେନ୍ଦ୍ରଙ୍କୁ ନେଇ ବିଜେପି ନେତାମାନେ ଆକ୍ରମଣାତ୍ମକ ଆଭିମୁଖ୍ୟ ଜାରି ରଖିଛନ୍ତି। ଅଭିଯୋଗ ଏବଂ ପ୍ରତି ଅଭିଯୋଗ ଭିତରେ ପାର୍ଟି ଶୃଙ୍ଖଳା ଏବେ ପବନରେ ବୁଲୁଛି।
ବରିଷ୍ଠ ବିଧାୟକ ବିଆର ପାଟିଲ ୟାଟନଲଙ୍କ ନେତୃତ୍ୱରେ ଏକ ବିଦ୍ରୋହୀ ଦଳ ସ୍ପଷ୍ଟ କରିଛନ୍ତି ଯେ ସେମାନେ ୟେଡିୟୁରପ୍ପା ପଦତ୍ୟାଗ ଛଡ଼ା ଆଉ କିଛି ଚାହୁଁନାହାନ୍ତି। ଏହି ଆକ୍ରମଣକୁ ତ୍ୱରାନ୍ୱିତ କରି ଅନ୍ୟ ଜଣେ ବିଧାୟକ ଅରବିନ୍ଦ ବେଲାଡ ନିଜ ସରକାରଙ୍କ ବିରୋଧରେ ଟେଲିଫୋନ୍ ଟ୍ୟାପିଂ ଅଭିଯୋଗ ଆଣିଛନ୍ତି। ଅନ୍ୟପକ୍ଷରେ ୟେଦୁରପ୍ପାଙ୍କର ଜଣେ ସମର୍ଥକ ତଥା ରାଜ୍ୟ ସରକାରଙ୍କ ମନ୍ତ୍ରୀ କହିଛନ୍ତି ଯେ ବିଜେପି ଭିତରର କିଛି ଲୋକ ମୁଖ୍ୟମନ୍ତ୍ରୀ ପରିବର୍ତ୍ତନ ପାଇଁ ଚାହୁଁଛନ୍ତି। ପରିସ୍ଥିତିରୁ ମୁକୁଳିବା ଲାଗି ୟେଦୁରପ୍ପା ଗୋଷ୍ଠୀ ପ୍ରତିପକ୍ଷଙ୍କ ବିରୋଧରେ କିଭଳି ବିଜୟ ଲାଭ କରିବେ ଓ ଏହି ବିପତ୍ତି ସମୟକୁ ଟାଳିଦେବେ, ସେ ନେଇ ଯୋଜନା ଚଳାଇଛନ୍ତି।
ଇତିମଧ୍ୟରେ ବିଜେପିର ବରିଷ୍ଠ ନେତା ତଥା ବିଧାନ ପରିଷଦ ସଦସ୍ୟ ଏଚ୍ ବିଶ୍ବନାଥ ମୁଖ୍ୟମନ୍ତ୍ରୀଙ୍କ ପୁଅ ବି ଏଚ୍ ବିଜେୟନଙ୍କ ବିରୋଧରେ ଏକ ବଡ଼ ଦୁର୍ନୀତି ଅଭିଯୋଗ ଆଣିଛନ୍ତି। ଏକ ବିଲିୟନ୍ ଡଲାର ଦୁର୍ନୀତିରେ ସେ ସଂପୃକ୍ତ ଥିବା କହି ବିଶ୍ବନାଥ ଗଣମାଧ୍ୟମ ସମ୍ମୁଖରେ ଦାବି ରଖିଛନ୍ତି ଯେ ମୁଖ୍ୟମନ୍ତ୍ରୀଙ୍କର ଆଉ ସରକାର ଉପରେ ନିୟନ୍ତ୍ରଣ ନାହିଁ। ତାଙ୍କ ପୁଅ ବେଆଇନ ଭାବେ ଅମଲାତନ୍ତ୍ରକୁ ନିର୍ଦ୍ଦେଶ ଦେଉଛନ୍ତି। ସେ ଆହୁରି କହିଛନ୍ତି ଯେ ଆମେ ଚାହୁଁ ଯେ ୟେଦୁରପ୍ପା ଦୟାକରି ଇସ୍ତଫା ଦିଅନ୍ତୁ। ସେ ବହୁତ ବୃଦ୍ଧ ଏବଂ ଅସୁସ୍ଥ ଅଛନ୍ତି। ଦୁଇ ବର୍ଷ ପୂର୍ବେ ତାଙ୍କୁ ମୁଖ୍ୟମନ୍ତ୍ରୀ କରିବା ପାଇଁ ଆମେ କଂଗ୍ରେସ ଏବଂ ଜେଡିଏସ ଛାଡିଥିଲୁ। ସେ ଆମମାନଙ୍କ ମଧ୍ୟରୁ କେତେକଙ୍କୁ ବିଶ୍ୱାସଘାତକତା କରିଛନ୍ତି। ମୁଖ୍ୟମନ୍ତ୍ରୀ ରହିବାକୁ ତାଙ୍କର କୌଣସି ନୈତିକ ଅଧିକାର ନାହିଁ ବୋଲି ବିଶ୍ୱନାଥ କହିଛନ୍ତି।
ଏହାର ପ୍ରତିଜବାବ ଦେଇ ୟେଦୁରପ୍ପାଙ୍କ ସମର୍ଥକମାନେ ବିଶ୍ୱନାଥଙ୍କୁ ଦଳରୁ ବହିଷ୍କାର ଦାବିରେ ଏକ ପ୍ରତିବାଦ ଆରମ୍ଭ କରିଛନ୍ତି। ଏପରିକି କେତେକ ଅଭିଯୋଗ କରିଛନ୍ତି ଯେ ୟେଦୁରପ୍ପାଙ୍କ ବିରୋଧରେ ନୂଆଦିଲ୍ଲୀରୁ ଷଡ଼୍ଯନ୍ତ୍ର ଚାଲିଛି ଓ ବିଶ୍ବନାଥଙ୍କ କାନ୍ଧରେ ସେମାନେ ବନ୍ଧୁକ ରଖି ଗୁଳି ଚାଳନ କରୁଛନ୍ତି।
ଏମାନଙ୍କ ବ୍ୟତୀତ ଦଳରେ ଏକ ତୃତୀୟ ଗୋଷ୍ଠୀ ମୁଣ୍ଡ ଟେକିଛନ୍ତି। ସେମାନେ ନିଜକୁ ନିରପେକ୍ଷ ବୋଲି ଦାବି କରୁଛନ୍ତି। ଏଥିରେ ମୁଖ୍ୟତଃ ମୂଳ ବିଜେପି ନେତା ଏବଂ କିଛି ଆରଏସଏସ ସହ ଘନିଷ୍ଠ ବିଧାୟକ ଅଛନ୍ତି। ସେମାନେ ଖୋଲାଖୋଲି ଭାବେ ସ୍ୱୀକାର କରୁଛନ୍ତି ଯେ ୟେଦୁରପ୍ପାଙ୍କ ଚୌକି ଦୋହଲିଲାଣି। ଦଳର ହାଇକମାଣ୍ଡ ଶୀଘ୍ର ତାଙ୍କ ଭବିଷ୍ୟତ ବିଷୟରେ ନିଷ୍ପତ୍ତି ନେବେ ବୋଲି ଆଶା କରାଯାଉଛି। ସେମାନେ ସ୍ପଷ୍ଟ କରିଛନ୍ତି ଯେ ହାଇକମାଣ୍ଡ ଯେଉଁ ନିଷ୍ପତ୍ତି ନେବେ, ତାହାକୁ ମାନିନେବେ ଓ କୌଣସି ମତଭେଦ କାର୍ଯ୍ୟରେ ଲିପ୍ତ ରହିବେ ନାହିଁ।
ଇତିମଧ୍ୟରେ ପ୍ରଭାରୀ ଅରୁଣ ସିଂ ସମସ୍ତ ତିନିଟି ଦଳରୁ ୫୦ରୁ ଅଧିକ ବିଧାୟକଙ୍କୁ ଭେଟି ସାରିଛନ୍ତି। ଗଣମାଧ୍ୟମକୁ କହିଛନ୍ତି ଯେ ବର୍ତ୍ତମାନ ନେତୃତ୍ବ ପରିବର୍ତ୍ତନ ହେବାର ପ୍ରଶ୍ନ ଉଠୁନାହିଁ। ବିଜେପି ନେତୃତ୍ବାଧୀନ ସରକାର ଭଲ ପ୍ରଦର୍ଶନ କରୁଛନ୍ତି ବୋଲି ଶ୍ରୀ ସିଂହ ଗଣମାଧ୍ୟମକୁ କହିଛନ୍ତି।
ସେପଟେ କର୍ଣ୍ଣାଟକରେ କୋଭିଡ ସମ୍ବନ୍ଧୀୟ କାର୍ଯ୍ୟ ଏହା ଦ୍ୱାରା ପ୍ରଭାବିତ ହୋଇଛି ବୋଲି ଦର୍ଶାଇ ବିରୋଧୀ କଂଗ୍ରେସ ଏବଂ ଜେଡିଏସ ବିଜେପି ନାଟକବାଜି ଉପରେ ବର୍ଷିଛନ୍ତି। ବିରୋଧୀ ଦଳର ନେତା ତଥା ପୂର୍ବତନ ସିଏମ୍ ସିଦ୍ଧରମାୟା ରାଜ୍ୟପାଳଙ୍କୁ ସରକାରଙ୍କୁ ବରଖାସ୍ତ କରିବାକୁ ଏବଂ ରାଜ୍ୟରେ ରାଷ୍ଟ୍ରପତିଙ୍କ ନିୟମ ଲାଗୁ କରିବାକୁ ଦାବି କରିଛନ୍ତି। ଜେଡିଏସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଏଚ୍ଡି କୁମାରସ୍ୱାମୀ କହିଛନ୍ତି ଯେ ଚାଲିଥିବା ଆନ୍ତଃ ରାଜ୍ୟ ଯୁଦ୍ଧ ଜାତୀୟ ସ୍ତରରେ ବିଜେପିର ଦୁର୍ବଳତାକୁ ପ୍ରକାଶ କରିଛି।