ଦେଶରେ ଇନ୍ଧନ ଯୋଗାଣ ସ୍ଥିରତା ପାଇଁ କେନ୍ଦ୍ରର ସମୀକ୍ଷା, ଗୁଜବକୁ ଖଣ୍ଡନ

ନ୍ୟୁଜ୍ ବ୍ୟୁରୋ: ଦେଶବ୍ୟାପୀ ପେଟ୍ରୋଲିୟମ ଉତ୍ପାଦ ଓ ପ୍ରାକୃତିକ ଗ୍ୟାସର ନିରବିଚ୍ଛିନ୍ନ ଯୋଗାଣ ସୁନିଶ୍ଚିତ କରିବା ପାଇଁ କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ପକ୍ଷରୁ ଆଜି ଏକ ସମୀକ୍ଷା ବୈଠକ ଆୟୋଜିତ ହୋଇଛି। ବୈଠକରେ ପେଟ୍ରୋଲ, ଡିଜେଲ ଓ ସିଏନଜି ଯୋଗାଣକୁ ସାଧାରଣ ରଖିବା ସହ କୌଣସି ବିଘ୍ନ ନ ଘଟିବାକୁ ନିର୍ଦ୍ଦେଶ ଦିଆଯାଇଛି। ସରକାରଙ୍କ ପକ୍ଷରୁ ଇନ୍ଧନ ଅଭାବ କିମ୍ବା ଦର ବୃଦ୍ଧି ସମ୍ପର୍କିତ ଗୁଜବକୁ ସଂପୂର୍ଣ୍ଣ ଭାବେ ଖଣ୍ଡନ କରାଯାଇଛି। ତୈଳ ବିଶୋଧନାଗାରଗୁଡ଼ିକ ପୂର୍ଣ୍ଣ କ୍ଷମତାରେ କାର୍ଯ୍ୟରତ ଥିବାରୁ ଲୋକମାନଙ୍କୁ ଆତଙ୍କିତ ହୋଇ ଜାଳେଣି ସଂଗ୍ରହ ନ କରିବାକୁ ଅନୁରୋଧ କରାଯାଇଛି। ସେହିପରି, କଳାବଜାରୀ ଓ ମହଜୁଦ ରୋକିବା ପାଇଁ ‘ଅତ୍ୟାବଶ୍ୟକ ସାମଗ୍ରୀ ଆଇନ’ ଅନୁସାରେ କଡ଼ା ପଦକ୍ଷେପ ନେବାକୁ ରାଜ୍ୟଗୁଡ଼ିକୁ ପରାମର୍ଶ ଦିଆଯାଇଛି। ବର୍ତ୍ତମାନ ସ୍ଥିତିର ନିରନ୍ତର ନଜରଦାରୀ ପାଇଁ ରାଜ୍ୟ ଓ ଜିଲ୍ଲା ସ୍ତରରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ସକ୍ରିୟ ରଖିବାକୁ ମଧ୍ୟ ନିଷ୍ପତ୍ତି ନିଆଯାଇଛି।