ଭୁବନେଶ୍ବର: ପିଏସ ବିରଞ୍ଚି ସାହୁଙ୍କ ରିମାଣ୍ଡ ଅବଧି ସରିବା ପରେ ଆଜି ତାଙ୍କୁ ଜେଲ ପଠାଇଦିଆଯାଇଛି । ଝାରପଡା ଜେଲ ଯାଇଛନ୍ତି କୁବେର ପିଏସ ବିରଞ୍ଚି ସାହୁ । ରିମାଣ୍ଡ ଅବଧି ସରିବା ପରେ ତାଙ୍କୁ ସ୍ୱତନ୍ତ୍ର ଭିଜିଲାନ୍ସ କୋର୍ଟରେ ହାଜର କରାଯାଇଥିଲା । ଏହା ପରେ ତାଙ୍କୁ ଜେଲକୁ ପଠାଇଦିଆଯାଇଛି । ତେବେ ରିମାଣ୍ଡ ବେଳେ ବହୁ ତଥ୍ୟ ଭିଜିଲାନ୍ସ ହାତରେ ଲାଗିଥିବା ଜଣାପଡିଛି ।
ଆୟ ବର୍ହିଭୂତି ସମ୍ପତି ଠୁଳ ଅଭିଯୋଗରେ ବିରଞ୍ଚି ସାହୁଙ୍କୁ ଗିରଫ ପରେ ଏବେ ସ୍କାନରରେ ଅନେକ ଲୋକ ଅଛନ୍ତି । କେଉଁମାନଙ୍କ ହାତ ଏହା ପଛରେ ଅଛି ତାହାର ତଦନ୍ତ ଚାଲିଛି । କେତେବେଳ କେଉଁ ମୂହୃର୍ତରେ କାହାକୁ ଡାକି ପଚରାଉଚରା କରାଯାଇପାରେ ବୋଲି କହିଛନ୍ତି ଭିଜିଲାନ୍ସ ଏସପି ଆର ପ୍ରକାଶ।
ତଦନ୍ତ ବେଳେ ବିରଞ୍ଚିଙ୍କ ଘରୁ ୧୧୪ ଜଣ ପରୀକ୍ଷାର୍ଥୀଙ୍କର ଆଡମିଟ କାର୍ଡ ଜବତ କରିଥିଲା ଭିଜିଲାନ୍ସ । ସେଥିମଧ୍ୟରୁ ୧୦୭ ଜଣ କେଉଁଠି ଚାକିରି ପାଇନଥିବା ତଦନ୍ତରୁ ଜଣାପଡିଛି । ହେଲେ ବାକି ୭ ଜଣଙ୍କ ସଂପର୍କରେ ଅଧିକ ତଦନ୍ତ ଚାଲିଛି । ସେହି ୭ ଜଣ କେଉଁଠି ଚାକିରି ପାଇଛନ୍ତି କି ନାହିଁ ତାହାର ତଦନ୍ତ ଚାଲିଥିବା ଭିଜିଲାନ୍ସ ଏସପି କହିଛନ୍ତି । ଭିଜିଲାନ୍ସ ଏସପି କହିଛନ୍ତି, ମୁଖ୍ୟତଃ ୩ଟି ତଥ୍ୟ ହାସଲା ପାଇଁ ବିରଞ୍ଚିଙ୍କୁ ରିମାଣ୍ଡରେ ଅଣାଯାଇଥିଲା। ପୁଞ୍ଜି ନିବେଶ, ଅନୈତିକ ଉପାର୍ଜନ ଓ ଆୟବ୍ୟୟର ଆକଳନ ନେଇ ତଥ୍ୟ ହାସଲ ପାଇଁ ବିରଞ୍ଚିଙ୍କୁ ରିମାଣ୍ଡରେ ନିଆଯାଇଥିଲା । ବିରଞ୍ଚିଙ୍କ ଅନେକ ଗୁଡିଏ ଅଣ୍ଡର ଭ୍ୟାଲ୍ୟୁ ସମ୍ପତି ରହିଛି, ଯାହାର ମୂଲ୍ୟ ଆଗକୁ ବଢିପାରେ ।
ସେହିପରି ଇନସୁରାନ୍ସ ପଲିସି କରୁଥିଲେ ବିରଞ୍ଚି । ସ୍ତ୍ରୀଙ୍କ ଆଢୁଆଳରେ ମୋଟ ୯୦୦ ଇନସୁରାନ୍ସ କରାଇଥିଲେ ବିରଞ୍ଚି । କେବେ ଓ କାହିଁକି ସେମାନେ ପଲିସି କଲେ ସେ ନେଇ ଖୋଳତାଡ ଚାଲିଛି । ସେମାନେ ଚାକିରି କରିଛନ୍ତି କି ନାହିଁ ସେ ବାବଦରେ ତଦନ୍ତ ଚାଲିଛି । ମନି ଲଣ୍ଡରିଂ ଇଡି ତଦନ୍ତ କରୁଛି , ସେ ଦିଗରେ ବି ଭିଜିଲାନ୍ସ ନଜର ରଖିଥିବା କହିଛନ୍ତି ଭିଜିଲାନ୍ସ ଏସପି ଆର.ପ୍ରକାଶ ।
ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଷ୍ଟାଫ ସିଲେକ୍ସନ କମିଶନ ସଦସ୍ୟଙ୍କ ପିଏସ ବିରଞ୍ଚି ସାହୁଙ୍କ ଘରେ ଭିଜିଲାନ୍ସ ରେଡ କରିବା ସହ ପୁଳା ପୁଳା ଟଙ୍କା ଓ ଦେଢ କେଜି ସୁନା ଅଳଙ୍କାର ଜବତ କରିଥିଲା । ଏହାସହ ବିରଞ୍ଚିଙ୍କ ଘରୁ ୧୨ ଲକ୍ଷ ଓ ତାଙ୍କ ସର୍ମ୍ପକୀୟଙ୍କ ଘରୁ ୧୩ ଲକ୍ଷ ଟଙ୍କା ଜବତ କରିଥିଲା । ଆଉ ଏହି ଘଟଣା ପରେ ପିଏସ ବିରଞ୍ଚିଙ୍କୁ ଗିରଫ ସହ ଚାକିରିରୁ ବାଧ୍ୟତାମୂଳକ ଅବସର ଦେଇଛନ୍ତି ସରକାର। ତେବେ କେବଳ ବିରଞ୍ଚି ନୁହଁନ୍ତି ଓଏସଏସସି ଅଫିସରେ ନିଯୁକ୍ତି ନାଁରେ ବଡଧରଣର ଦୁର୍ନୀତି ହୋଇଥିବା ଅଭିଯୋଗହେଉଛି । ଆଉ ଏହି ଦୁର୍ନୀତିର ମୂଳ କେଉଁଠି ତାହାକୁ ଧରିବାକୁ ଭିଜିଲାନ୍ସ ଖୋଳତାଡ କରୁଛି । ଓଡ଼ିଶା ଷ୍ଟାଫ୍ ସିଲେକ୍ସନ୍ କମିଶନରେ ବର୍ଷ ବର୍ଷ ଧରି ଚାଲିଛି କି ନିଯୁକ୍ତି ଦୁର୍ନୀତି ? ବିରଞ୍ଚିଙ୍କ ଘଟଣା ସାମ୍ନାକୁ ଆସିବା ପରେ ଏବେ ଏଭଳି ଚର୍ଚ୍ଚା ଜୋର ଧରିଛି ।