ଦ୍ବିତୀୟ ଏମ୍ସ ପ୍ରତିଷ୍ଠା ଦାବିରେ ଆଜି ୧୨ ଘଣ୍ଟିଆ ସୁନ୍ଦରଗଡ ବନ୍ଦ ଡାକରା
ଭୁବନେଶ୍ବର: ଆଜି ସୁନ୍ଦରଗଡ ବନ୍ଦ। ରାଜ୍ୟର ଦ୍ୱିତୀୟ ଏମ୍ସ ସୁନ୍ଦରଗଡରେ ପ୍ରତିଷ୍ଠା ଦାବିରେ ୧୨ ଘଣ୍ଟିଆ ବନ୍ଦ ପାଳନ କରାଯାଉଛି। ଜିଲ୍ଲା କଂଗ୍ରେସ ପକ୍ଷରୁ ବନ୍ଦ ପାଳନ କରାଯାଉଛନ୍ତି। ସକାଳ ୬ଟାରୁ ବନ୍ଦ ପାଳନ ଆରମ୍ଭ ହୋଇଥିବା ବେଳେ ସନ୍ଧ୍ୟା ୬ ପର୍ଯ୍ୟନ୍ତ ଏହା ଚାଲିବ ।ବନ୍ଦ ପାଳନକୁ ଲୋକମାନେ ସମର୍ଥନ କରିଛନ୍ତି ।
ସହରର ସମସ୍ତ ଦୋକାନ,ବଜାର ବନ୍ଦ ରହିଛି। ସକାଳୁ ସକାଳୁ ବନ୍ଦର ପ୍ରଭାବ ଦେଖିବାକୁ ମିଳିଛି। ଗାଡି ଚଳାଚଳ ମଧ୍ୟ ବନ୍ଦ ରହିଛି । ପେଟ୍ରୋଲ ଟାଙ୍କି ଓ ଅଫିସ ମଧ୍ୟ ବନ୍ଦ ରହିଛି । ଓକିଲ ସଂଘ, ବଣିକ ସଂଘ ସମେତ ବହୁ ଅନୁଷ୍ଠାନ ବନ୍ଦକୁ ସମର୍ଥନ ଜଣାଇଛନ୍ତି । ବନ୍ଦ ପାଳନ ଯୋଗୁଁ ଏମସିଏଲରୁ କୋଇଲ ପରିବହନ ମଧ୍ୟ ବାଧାପ୍ରାପ୍ତ ହୋଇଛି।
ସୁନ୍ଦରଗଡରେ ନୂଆ କରି ତିଆରି ହୋଇଥିବା ଏନଟିପିସି ମେଡିକାଲରେ ରାଜ୍ୟର ଦ୍ୱିତୀୟ ଏମ୍ସ ପ୍ରତିଷ୍ଠା ପାଇଁ କେନ୍ଦ୍ରକୁ ଚିଠି ଲେଖିଥିଲେ ସରକାର । କେନ୍ଦ୍ରର ବୈଷୟକି ଟିମ ଏନଟିପିିସି ମେଡିକାଲ କଲେଜ ବୁଲି ଭିତ୍ତିଭୂମି ତଦାରଖ କରିଥିଲେ। ହେଲେ ଏବେ ୨୦୨୨-୨୩ ଶିକ୍ଷା ବର୍ଷ ପାଇଁ ନାମଲେଖା ବିଜ୍ଞପ୍ତି ଜାରି କରାଯିବା ପରେ ଏଠାରେ ଏମ୍ସ ପ୍ରତିଷ୍ଠା ହେବନି ବୋଲି ଜଣାପଡିଛି । ଯାହାକୁ ନେଇ ଅସନ୍ତୋଷ ଦେଖାଦେଇଛି।
ସୁନ୍ଦରଗଡ ଉପରେ ମୁଖ୍ୟତଃ ଝାଡ଼ଖଣ୍ଡ,ଛତିଶଗଡ ଓ ରାଜ୍ୟର ୩ ଜିଲ୍ଲାରୁ ଅଧିକ ସ୍ୱାସ୍ଥ୍ୟ ବ୍ୟବସ୍ଥା ଉପରେ ନିର୍ଭର କରନ୍ତି। ପଶ୍ଚିମ ଓଡିଶାରେ ଏବେ ସ୍ୱାସ୍ଥ୍ୟସେବା ବିପର୍ଯ୍ୟସ୍ଥ ହୋଇପଡିଥିବା ବେଳେ ସୁନ୍ଦରଗଡରେ ଦ୍ୱିତୀୟ ଏମସ ପ୍ରତିଷ୍ଠା ହେଉ ବୋଲି ଲୋକମାନେ ମଧ୍ୟ ଦାବି କରୁଛନ୍ତି ।