ଆଫଗାନିସ୍ତାନ: ଆଫଗାନିସ୍ତାନକୁ କବଜା କରିବା ପରେ ତାଲିବାନ ମଧ୍ୟବର୍ତ୍ତୀକାଳୀନ ସରକାର ଗଠନ ନେଇ ଘୋଷଣା କରିଛନ୍ତି। ମୁଲ୍ଲା ହସନ ଅଖୁନ୍ଦ ଆଫଗାନିସ୍ତାନର ପ୍ରଧାନମନ୍ତ୍ରୀ ହେବା ନେଇ ଘୋଷଣା ହୋଇଛି। ସେହିପରି ଅବଦୁଲ ଘନି ବରାଦର ହେବେ ଉପ ପ୍ରଧାନମନ୍ତ୍ରୀ । ତେବେ ଆଫଗାନିସ୍ତାନର ଆମେରିକାର ମୋଷ୍ଟ ଓ୍ବାଣ୍ଟେଡ୍ ଆତଙ୍କବାଦୀକୁ ଗୃହ ମନ୍ତ୍ରୀ କରାଯାଇଛି।
ସିରାଜୁଦ୍ଦିନ ହକ୍କାନି ମୁଣ୍ଡ ଉପରେ ଆମେରିକା ୫୦ ଲକ୍ଷ ଡଲାରର ପୁରସ୍କାର ଘୋଷଣା କରିଥିଲା । ଏବେ ଏହି ମୋଷ୍ଟ ଓ୍ବାଣ୍ଟେଡ୍ ଆତଙ୍କବାଦୀକୁ ତାଲିବାନ ନୂଆ ସରକାର ମୁଖ୍ୟ ଦାୟିତ୍ୱ ଦେଇଛି। ହକ୍କାନି ନେଟୱାର୍କର ମୁଖ୍ୟ ସିରାଜୁଦ୍ଦିନର ଲିଙ୍କ ପାକିସ୍ତାନର ଗୁଇନ୍ଦା ଏଜେନ୍ସି ଆଇଏସଆଇ ସହ ବି ଅଛି । ନିକଟରେ ଆଇଏସଆଇ ମୁଖ୍ୟ ଲେଫ୍ଟନାଣ୍ଟ ଜେନେରାଲ ଫେଜ ହମିଦ ଆଫଗାନିସ୍ତାନ ଆସି କାବୁଲର ଏକ ହୋଟେଲରେ ରହିଥିବା ଜଣାପଡିଥିଲା । ଏହାକୁ ନେଇ ଆଫଗାନ ନାଗରିକ ମାନେ ବିରୋଧ ବି କରିଥିଲେ।
ଫେଜ ହମିଦର କାବୁଲ ଗସ୍ତରୁ ଜଣାପଡୁଥିଲା ଯେ, ତାଲିବାନ ସରକାରରେ ପାକିସ୍ତାନ ନିଜ ସ୍ଥିତି ମଜଭୁତ କରିବାକୁ ଚାହୁଁଛି। ହମିଦର ଗସ୍ତ ପରେ ତାଲିବାନ ନୂଆ ସରକାର ଘୋଷଣା ସହ ସିରାଜୁଦ୍ଦିନ ହକାନିକୁ ଗୃହ ମନ୍ତ୍ରୀ ଭାବେ ଦାୟିତ୍ୱ ଦେଇଛି।
ଆମେରିକା ସିରାଜୁଦ୍ଦିନ ହକ୍କାନି ମୁଣ୍ଡ ଉପରେ ପୁରସ୍କାର ରଖିବା ସହ ତାକୁ ବଡ଼ ଆତଙ୍କବାଦୀ ଭାବେ ଘୋଷଣା କରିଥିଲା। ସିରାଜୁଦ୍ଦିନ ସୋଭିଏତ ବିରୋଧୀ
ମୁଜାହିଦ୍ଦିନ କମାଣ୍ଡର ଜଲ୍ଲାଉଦିନ ହକ୍କାନିର ପୁଅ। ସେ ୨୦୦୮ ଜାନୁଆରିରେ କାବୁଲରେ ହୋଇଥିବା ବିସ୍ଫୋରଣ ପାଇଁ ଏଫବିଆର ଓ୍ବାଣ୍ଟେଡ୍। ହୋଟେଲରେ
ହୋଇଥିବା ଏହି ବିସ୍ଫୋରଣରେ ୬ ଜଣଙ୍କ ଜୀବନ ଯାଇଥିଲା।
କେବଳ ଏତିକି ନୁହେଁ ସିରାଜୁଦ୍ଦିନ ହକ୍କାନି ୨୦୦୮ରେ ଆଫଗାନିସ୍ତାନର ତତକାଳୀନ ରାଷ୍ଟ୍ରପତି ହମିଦ କରଜାଇଙ୍କ ହତ୍ୟା ପାଇଁ ମଧ୍ୟ ଯୋଜନା କରିଥିଲା।
ଅନେକ ଆତ୍ମଘାତୀ ବିସ୍ଫୋରଣରେ ମଧ୍ୟ ଅଲକାଏଦା ସହ ହକ୍କାନିର ଘନିଷ୍ଠ ସଂପର୍କ ବି ଅନ୍ତଃରାଷ୍ଟ୍ରୀୟ ସମୁଦାୟ ପାଇଁ ଚିନ୍ତାର କାରଣ ।