ନୂଆଦିଲ୍ଲୀ: ୟୁଏଇ ଓ ଓମାନରେ ଖେଳାଯାଉଥିବା ଟି ୨୦ ବିଶ୍ୱକପରେ ୩ଟି ଦଳ ସେମିଫାଇନାଲରେ ପ୍ରବେଶ କରିସାରିଛନ୍ତି। ଏବେ ଚତୃର୍ଥ ଦଳ ଭାବେ ସେମିଫାଇନାଲରେ କିଏ ପ୍ରବେଶ କରିବ ତାକୁ ନେଇ ସସପେନ୍ସ । ତେବେ ନ୍ୟୁଜିଲାଣ୍ଡ ଓ ଆଫଗାନିସ୍ତାନର ମ୍ୟାଚ ସ୍ଥିର କରିବ ଚତୃର୍ଥ ଦଳ ଭାବେ ସେମିଫାଇନାଲରେ କିଏ ପହଞ୍ଚିବ।
ଇଂଲଣ୍ଡ,ଅଷ୍ଟ୍ରେଲିଆ ଓ ପାକିସ୍ତାନ ସେମିଫାଇନାଲରେ ପ୍ରବେଶ କରିସାରିଛନ୍ତି। ଶନିବାର ବିଜୟ ସତ୍ୱେ ମଧ୍ୟ କମ ରନ ରେଟ କାରଣରୁ ଦକ୍ଷିଣ ଆଫ୍ରିକା ଟୁର୍ଣ୍ଣାମେଣ୍ଟରୁ ବିଦାୟ ନେଇଛି। ମ୍ୟାଚରେ ଯଦି ଦକ୍ଷିଣ ଆଫ୍ରିକା ଇଂଲଣ୍ଡକୁ ୬୦ରୁ ଅଧିକ ରନରେ ପରାସ୍ତ କରିଥାନ୍ତା ତେବେ ଦକ୍ଷିଣ ଆଫ୍ରିକା ସେମିଫାଇନାଲରେ ପ୍ରବେଶ କରିଥାନ୍ତା । କାରଣ ଦକ୍ଷିଣ ଆଫ୍ରିକାର ରନ ରେଟ ଅଷ୍ଟ୍ରେଲିଆଠୁ ଅଧିକ ହୋଇଥାନ୍ତା। ଦକ୍ଷିଣ ଆଫ୍ରିକା ଶେଷ ମ୍ୟାଚ ଜିତି ୫ ମ୍ୟାଚରୁ ୮ ପଏଂଟ ପାଇଥିଲେ ମଧ୍ୟ କମ ରନ ରେଟ କାରଣରୁ ସେମିଫାଇନାଲରୁ ବାଦ୍ ପଡିଛି।
ସେହିପରି ଗ୍ରୁପ-୨ରୁ ପାକିସ୍ତାନ ସେମି ଫାଇନାଲରେ ପହଞ୍ଚିସାରିଛି। ଆଜି ଗ୍ରୁପ ୨ରେ ଆଫଗାନିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ଗୁରୁତ୍ୱପୂର୍ଣ୍ଣ ମ୍ୟାଚ ଖେଳାଯିବ। ଏହି ମ୍ୟାଚ ନ୍ୟୁଜିଲାଣ୍ଡ ଜିତିଲେ ୪ ବିଜୟ ସହ ୮ ପଏଣ୍ଟ ପାଇଁ ସେମିଫାଇନାଲରେ ପହଞ୍ଚିବ। ନ୍ୟୁଜିଲାଣ୍ଡ ଜିତିଲେ ଭାରତ ଟୁର୍ଣ୍ଣାମେଣ୍ଟରୁ ବାହାରିଯିବ। ତେବେ ଯଦି ଆଫଗାନିସ୍ତାନ ମ୍ୟାଚ ଜିତିଯାଏ ତେବେ ଭାରତର ସେମିଫାଇନାଲ ଯିବା ଆଶା ଉଜ୍ବିବିତ ହେବ। କାରଣ ଗ୍ରୁପ ୨ରେ ଭାରତର ନେଟ୍ ରନ ରେଟ୍ ସବୁଠୁ ଅଧିକ ରହିଛି।
ଭାରତ ମଧ୍ୟ ନିଜର ଶେଷ ମ୍ୟାଚରେ ନାମିବିୟାକୁ ଭେଟିବ। ଏଥିରେ ଭାରତ ଜିତିବାର ଯଥେଷ୍ଟ ସମ୍ଭାବନା ରହିଛି। ଏମିତି ହେଲେ ଆଫଗାନିସ୍ତାନ, ଭାରତ ଓ ନ୍ୟୁଜିଲାଣ୍ଡ ସହିତ ସମସ୍ତ ପଏଣ୍ଟ ୬ରେ ସମାନ ରହିବ ଏବଂ ରନ ରେଟ ଆଧାରରେ ସ୍ଥିର ହେବ କେଉଁ ଦଳ ସେମିଫାଇନାଲରେ ଏଣ୍ଟ୍ରି କରିବ।