ଦିଲ୍ଲୀରେ ପ୍ରଦୂଷଣ କମିବାର ନାଁ ନେଉନି । ଆଜି ବି ବାୟୁ ପ୍ରଦୂଷଣର ସ୍ତର ଅତି ଖରାପ ରହିଛି। ଆଜି ସକାଳେ ଦିଲ୍ଲୀରେ ବାୟୁର ଗୁଣବତ୍ତା ସ୍ତର (ଏକ୍ୟୁଆଇ) ୩୬୨ ଥିଲା ।ଯାହା ମଣିଷ ଶରୀର ପାଇଁ ଅତ୍ୟନ୍ତ କ୍ଷତିକାରକ । ଅନ୍ୟପଟେ ସୁପ୍ରିମକୋର୍ଟ ମଧ୍ୟ ଏହା ଉପରେ ନଜର ରଖିଛନ୍ତି । ବୁଧବାର ସୁପ୍ରିମକୋର୍ଟ କେନ୍ଦ୍ର ଓ ରାଜ୍ୟକୁ ଏନେଇ ତାଗିଦ୍ କରିଛନ୍ତି । ଦିଲ୍ଲୀଏନସିଆରରେ ପ୍ରଦୂଷଣ ହ୍ରାସ ପାଇଁ ଅନେକ ପଦକ୍ଷେପ ନିଆଯାଉଛି । କିନ୍ତୁ ଏବେ ଯାଏଁ ସ୍ଥିତିରେ କୌଣସି ସୁଧାର ଦେଖିବାକୁ ମିଳିନାହିଁ ।
ପ୍ରଦୂଷଣ ସ୍ତର କମାଇବା ପାଇଁ ସୀମାରେ ଟ୍ରକକୁ ଅଟକାଇବା ପ୍ରକ୍ରିୟା ଆରମ୍ଭ ହୋଇଯାଇଛି । ଟିକିରି ସୀମାରେ ପୁଲିସ ଯାଂଚ କଡାକଡି କରିବା ସହ ଟ୍ରକ ଗୁଡିକୁ ଅଟକାଇ ରଖୁଛି । ବୁଧବାର ଦିନ ଦିଲ୍ଲୀ ସରକାର ଏକ ନିର୍ଦ୍ଦେଶ ଜାରି କରି ଆସନ୍ତା ୨୧ ଯାଏଁ ଅନ୍ୟ ରାଜ୍ୟରୁ ଆସୁଥିବା ସମସ୍ତ ଟ୍ରକ ଉପରେ ପ୍ରତିବନ୍ଧକ ଲଗାଇଛନ୍ତି । ତେବେ ଅତ୍ୟାବଶ୍ୟକ ସାମଗ୍ରୀ ନେଇ ଯାଉଥିବା ଟ୍ରକକୁ ପ୍ରବେଶ ପାଇଁ ଅନୁମତି ରହିଛି ।
ନଜର ପକାନ୍ତୁ ପ୍ରଦୂଷଣ ପାଇଁ ଦିଲ୍ଲୀ-ଏନସିଆରରେ କ’ଣ କ’ଣ ପଦକ୍ଷେପ ନିଆଯାଇଛି ।
() ଦିଲ୍ଲୀରେ ପରବର୍ତ୍ତି ଆଦେଶ ପର୍ଯ୍ୟନ୍ତ ସ୍କୁଲ,କଲେଜ, ଶିକ୍ଷାନୁଷ୍ଠାନ ବନ୍ଦ ରହିବ ।
() ଦିଲ୍ଲୀରେ ସରକାରୀ ଅଫିସରେ ୧୦୦ % ଓ ଘରୋଇ ଅଫିସରେ ୫୦ % ୱାର୍କ ଫର୍ମ ହୋମରେ କାମ ହେବ ।
() ନଭେମ୍ବର ୨୧ ଯାଏଁ ସମସ୍ତ ନିର୍ମାଣ କାମ ଉପରେ ରୋକ୍ ଲଗାଯାଇଛି ।
() ଅତ୍ୟାବଶ୍ୟକ ସାମଗ୍ରୀ ଆଣୁଥିବା ଟ୍ରକ ବ୍ୟତୀତ ଅନ୍ୟ ସମସ୍ତ ଟ୍ରକର ଚଳାଚଳ ଉପରେ କଟକଣା ।
() ଦିଲ୍ଲୀରେ ମେଟ୍ରୋ ଓ ବସରେ ଛିଡା ହୋଇ ଯିବାକୁ ଅନୁମତି ।
() ପେଟ୍ରୋଲର ୧୫ ବର୍ଷ ପୁରୁଣା ଗାଡି ଓ ୧୦ ବର୍ଷ ପୁରୁଣା ଡିଜେଲ ଗାଡି ଚଳାଚଳ ଉପରେ କଟକଣା ।
() ଦିଲ୍ଲୀରୁ ୩୦୦ କିଲୋମିଟର ଭିତରେ ପଡୁଥିବା ୧୧ରୁ ୬ଟି ଥର୍ମାଲ ପାୱାର ପ୍ଲାଣ୍ଟ ନଭେମ୍ବର ୩୦ ପର୍ଯ୍ୟନ୍ତ ବନ୍ଦ ରହିବ ।
() ପଞ୍ଜାବରେ ଚାଷର ଅବଶିଷ୍ଟ ଅଂଶ(ନଡ଼ା) ଜାଳୁଥିବା ଚାଷୀଙ୍କ ବିରୋଧରେ ଅଢେଇ ହଜାରରୁ ୧୫ ହଜାର ଯାଏଁ ଜରିମାନା ଲାଗିପାରେ ।
() କେନ୍ଦ୍ର ସରକାର ୱାର୍କ ଫର୍ମ ହୋମ କରିବାକୁ ମନା କରିଦେଇଛନ୍ତି ।ହେଲେ କେନ୍ଦ୍ରୀୟ କର୍ମଚାରୀଙ୍କୁ କମ ଗାଡି ବ୍ୟବହାର କରିବା ପାଇଁ ନିର୍ଦ୍ଦେଶ ଦିଆଯାଇଛି ।