ଦିଲ୍ଲୀରେ ଜାନୁଆରୀ ମାସରେ ହୋଇଥିବା ବର୍ଷା ସବୁ ରେକର୍ଡ ଭାଙ୍ଗିଦେଇଛି । ପ୍ରବଳ ଶୀତ ଭିତରେ ବର୍ଷା ୩୨ ବର୍ଷ ପୁରୁଣା ରେକର୍ଡ ଭାଙ୍ଗିଛି । ଏବେ ଯାଏଁ ଦିଲ୍ଲୀରେ ଜାନୁଆରୀ ୬୯.୮ ମିଲିମିଟରରୁ ଅଧିକ ବର୍ଷା ରେକର୍ଡ ହୋଇଛି । ୩୨ ବର୍ଷ ପୂର୍ବରେ ୧୯୮୯ରେ ୭୯.୭ ମିମି ବର୍ଷା ଜାନୁଆରୀରେ ଦେଶର ରାଜଧାନୀ ଦିଲ୍ଲୀରେ ହୋଇଥିଲା ।
ଦିଲ୍ଲୀର ନରେଲା ଅଞ୍ଚଳରେ ୮.୫ ମିମି ,ନଜଫଗଡ଼ରେ ୧୦ ମିମି ,ଆର୍ୟନନଗର ୧୯ ମିମି ଏବଂ ପାଲମରେ ୧୯.୪ ମିମି ବର୍ଷା ରେକର୍ଡ କରାଯାଇଛି । ଦିଲ୍ଲୀ ବ୍ୟତୀତ ଗାଜିଆବାଦ,ଫରିଦାବାଦ,ନୋଏଡା,ଗୁରୁଗ୍ରାମରେ ପ୍ରବଳ ବର୍ଷା ଜାରି ରହିଛି । ପାଣିପାଗ ବିଭାଗର ଆକଳନ ଅନୁସାରେ ଆଜି ବି ଆକାଶ ମେଘୁଆ ରହିବ ଓ ବର୍ଷା ହେବାର ସମ୍ଭାବନା ରହିଛି । ପଞ୍ଜାବ,ହରିୟାଣା, ଉତ୍ତରପ୍ରଦେଶ,ରାଜସ୍ଥାନରେ ମଧ୍ୟ ବର୍ଷା ହେବାର ଆଶଙ୍କା ଅଛି । ଶନିବାର ରାତିରେ ସର୍ବାଧିକ ତାପମାତ୍ରା ୧୪.୭ ଡିଗ୍ରୀ ସେଲସିୟସ ଓ ସର୍ବନିମ୍ନ ତାପମାତ୍ରା ୧୧.୫ ଡିଗ୍ରୀ ସେଲସିୟସ ରହିଥିଲା । ଆଜି ରବିବାର ବର୍ଷା ହେବାର ସମ୍ଭାବନା ରହିଛି ଏବଂ ସର୍ବାଧିକ ତାପମାତ୍ରା ୧୬ ଡିଗ୍ରୀ ସେଲସିୟସ ରହିପାରେ । ସେହିପରି ସର୍ବନିମ୍ନ ତାପମାତ୍ରା ୧୦ ଡିଗ୍ରୀ ସେଲସିୟସ ଯାଏଁ ରହିବା ଅନୁମାନ କରାଯାଇଛି ।