କରୋନା ସଂକ୍ରମଣକୁ ମାତ୍ ଦେବା ପାଇଁ ଏବେ ବୁଷ୍ଟର ଡୋଜ ଦିଆଯାଉଛି । ଦୁଇଟି ଡୋଜ ନେଇସାରିଥିବା ବ୍ୟକ୍ତି କିଭଳି ସଂକ୍ରମଣରୁ ବର୍ତ୍ତିବେ ସେଥିପାଇଁ ବୁଷ୍ଟର ଡୋଜ ଦିଆଯାଉଛି । ଏବେ ଇଞ୍ଜେକସନ ଜରିଆରେ ବୁଷ୍ଟର ଡୋଜ ଦିଆଯାଉଥିବା ବେଳେ ଖୁବ ଶୀଘ୍ର ଦେଶରେ ଉପଲବ୍ଧ ହେବ କୋଭିଡର ନାଜାଲ ଡୋଜ । ନାଜାଲ କୋଭିଡ ବୁଷ୍ଟରର ଟ୍ରାଏଲ ଲାଗି ଭାରତ ବାୟୋଟେକକୁ ଡିସିଜିଆଇ ଅନୁମତି ଦେଇଛି ।
ଡିସେମ୍ବରରେ ଭାରତ ବାୟୋଟେକ କୋଭିଡ ଟିକାର ବୁଷ୍ଟର ଡୋଜର ତୃତୀୟ ପର୍ଯ୍ୟାୟ ପରୀକ୍ଷଣ ପାଇଁ ଆବେଦନ କରିଥିଲା । ଡିସିଜିଆଇର ବିଷୟଗତ ବିଶେଷଜ୍ଞ କମିଟି ବା ଏସଇସି ଏହି ଡୋଜର ଫେଜ-୩ ଟ୍ରାଏଲ ଲାଗି ଭାରତ ବାୟୋଟେକକୁ ଅନୁମତି ଦେଇଛନ୍ତି । ଯଦି ଏହି ଟିକାର ଟ୍ରାଏଲ ସଫଳତା ଲାଭ କରେ ତେବେ ଏହା ଦେଶର ପ୍ରଥମ ନାଜାଲ ଭ୍ୟାକସିନ ହେବ ।
ଭାରତ ସରକାରଙ୍କ ସ୍ୱାସ୍ଥ୍ୟସେବା ମହାନିର୍ଦ୍ଦେଶାଳୟ ଅନୁଯାୟୀ, ୯ଟି ସ୍ଥାନରେ ଏହି ଭ୍ୟାକସିନର ତୃତୀୟ ପଯ୍ୟାୟ ପରୀକ୍ଷଣ ହେବ । ଭାରତ ବାୟୋଟେକ ମତରେ ଭ୍ୟାକସିନର ଡବଲ ଡୋଜ ନେଇ ସାରିଥିବା ଅଢେଇ ହଜାର ଲୋକଙ୍କ ଠାରେ ଏହି ଭ୍ୟାକସିନର କ୍ଲିନିକାଲ ଟ୍ରାଏଲ କରାଯିବ ।
ନାଜାଲ ଭ୍ୟାକସିନ ହେଉଛି ନାକରେ ଦିଆଯାଉଥିବା ଏକ ଭ୍ୟାକସିନ । ବ୍ୟକ୍ତିଙ୍କ ନାକରେ ଭ୍ୟାକସିନର କିଛି ବୁନ୍ଦା ଦିଆଯାଇ ଏହି ଟିକାକରଣ କରାଯାଏ । ଏଥିରେ ଇଞ୍ଜେକସନର ଆବଶ୍ୟକତା ପଡିନଥାଏ । ଏହି ନାଜାଲ ଡୋଜ ଯୋଗୁଁ କରୋନା ଭାଇରସ ଶରୀରରେ ପ୍ରବେଶ କରିପାରିନଥାଏ । ଓମିକ୍ରନ ପରି ମାରାତ୍ମକ ଭୂତାଣୁର ମୁକାବିଲା ଲାଗି ସକ୍ଷମ ହୋଇପାରିବ ଏହି ନାଜାଲ ଡୋଜ ।